ސްޓުޓްގާޓް (ޖޫން 23) - ޔޫރޯ ފުޓްބޯޅަ މުބާރާތުގައި މިރޭ ހަންގޭރީއާ ދެކޮޅަށް ކުޅޭ މެޗަކީ ސްކޮޓްލެންޑްގެ ފުޓްބޯޅަ އަށް ވަރަަށް މުހިންމު މެޗެއް ކަމަށާއި އެކަމަކު، އެ ވާހަކަތައް ދައްކާ ނިސްބަތް މަދުވުމުން އެ ކަމާ ސްކޮޓްލެންޑްގެ ކޯޗު ސްޓީވް ކްލާކް ހިތްހަމަނުޖެހުން ފާޅުކޮށްފި އެވެ.
ޔޫރޯގެ ގްރޫޕް އޭގެ ފަހު ދެ މެޗު މިރޭ އެއް ވަގުތެއްގައި ކުޅޭނެ އެވެ. މި ގްރޫޕުން ޖަރުމަނު ވަނީ ކުޅުނު ފުރަތަމަ ދެ މެޗުން މޮޅުވެ، ގަދަ 16 އަށް ދަތުރުކޮށްފަ އެވެ. އެކަމަކު، ދެން އިން ޖާގަ ހޯދުމުގެ ފުރުސަތު ސްކޮޓްލެންޑާއި ސްވިޒަލެންޑަށް އޮތްއިރު، އެންމެ ފުލުގައި އޮތް ހަންގޭރީ އަށް ކިރިޔާ ވެސް ފުރުސަތެއް އޮތީ ގްރޫޕްގެ ތިން ވަަނައިގައި ނިންމައި، މުޅި މުބާރާތުގެ ހުރިހާ ގްރޫޕެއްގެ ތިން ވަނަ ޓީމުތަކުގެ ތެރެއިން، އެންމެ ރަނގަޅު ނަތީޖާ ނެރޭ ހަތަރު ޓީމުގެ ތެރޭގައި ހިމެނިގެންނެވެ.
ގްރޫޕް އެއް ވަނައިގައި ހަ ޕޮއިންޓާ އެކު ޖަރުމަނު އޮތްއިރު، ދެ ވަނައިގައި ސްވިޒަލެންޑް އޮތީ ހަތަރު ޕޮއިންޓް ހޯދައިގެންނެވެ. ތިން ވަނައިގައި އޮތް ސްކޮޓްލެންޑަށް ޕޮއިންޓެއް ލިބިފައިވާއިރު، ފުލުގައި އޮތް ހަންގޭރީ އަށް އަދި ޕޮއިންޓެއް ނުލިބެ އެވެ.
ހަންގޭރީއާ ދެކޮޅަށް މިރޭ ކުޅޭ މެޗުގެ ކުރިން ސްކޮޓްލެންޑްގެ ކޯޗު ކްލާކް ބުނީ، މިއީ މިހާތަނަށް ސްކޮޓްލެންޑްގެ ފުޓްބޯޅަ ތާރީހުގައި ކުޅޭ އެންމެ މުހިންމު މެޗުގެ ގޮތުގައި ބެލެވިދާނެ ކަމަށެވެ.
"އެންމެނަށް ވެސް އެނގޭނެ ވިސްނާލައިފިއްޔާ މިއީ ކިހާ ބޮޑު މެޗެއް ކަން. ވާހަކަ ދައްކަން ވީ ހަމަ ވާހަކަ ދައްކަންވީ، އެ ގޮތަށް ފުރަތަމަ މެޗުގެ ކުރިން ވެސް އަހަރެމެން ބައެއް ކަންކަން ކުރީ. އެކަމަކު، މި ފަހަރު ވާހަކަ ދައްކަންވީ މި ކަމުގެ މުހިންމުކަން ދަނެގެން ރަނގަޅަށް،" ކްލާކް ބުންޏެވެ.
މި މެޗު މުހިންމުވާ ސަބަބަކީ މި މެޗުން މޮޅުވެގެން، ސްކޮޓްލެންޑަށް ފުރަތަމަ ފަހަރަށް ބޮޑު މުބާރާތެއްގެ ގްރޫޕް ސްޓޭޖު ފަހަަނައަޅައި ދިއުމުގެ ފުރުސަތު އޮތުމުންނެވެ.
ކްލާކް ބުނީ ހުރިހާ މަސައްކަތެއް ކޮށްގެން ވެސް މި މެޗުގެ ތިން ޕޮއިންޓް ހޯދުން އެ ޓީމަށް މުހިންމު ކަމަށެވެ.
މިއީ ވާދަވެރި މެޗެއްގައި ސްކޮޓްލެންޑާއި ހަންގޭރީ ބައްދަލުކުރާ ފުރަތަމަ ފަހަރެވެ. މީގެ ކުރިން މި ދެ ޓީމު ކުޅުނު ނުވަ މެޗަކީ ވެސް އެކުވެރިކަމުގެ މެޗުތަކެވެ. ސްކޮޓްލެންޑް ތިން މެޗުން މޮޅުވިއިރު، ހަންގޭރީ ވަނީ ހަތަރު މެޗު ކާމިޔާބުކޮށްފަ އެވެ. އަނެއް ދެ މެޗު ނިމުނީ އެއްވަރުވެގެންނެވެ.
މިރޭ މި ދެ ޓީމު، ސްކޮޓްލެންޑާއި ހަންގޭރީ ކުޅޭ މެޗު ފަށާނީ ރާއްޖެ ގަޑިން 12 ޖަހާއިރު އެވެ.
