ޑަސެލްޑޯފް (ޖޫން 21) - ޔޫރޯގެ ގުރޫޕް އީގައި ކުޅުނު ފުރަތަމަ މެޗުގައި ރޫމޭނިއާ އަތުން ލަދުވެތި ގޮތަކަށް ބަލިވި މެޗުގެ މަތިން ހަނދާން ނައްތާލައި، މި ގުރޫޕްގައި މިރޭ ސްލޮވާކިއާއާ ދެކޮޅަށް ކުޅޭ މެޗު ކާމިޔާބުކުރަން ޓީމު އެކަތިގަނޑަކަށް ވާންޖެހޭ ކަމަށް ޔޫކްރެއިންގެ ކޯޗު ސާހޭއި ރެބްރޯވް ބުނެފި އެވެ.
މި ގުރޫޕްގައި ޔޫކްރެއިނުން ކުޅުނު ފުރަތަމަ މެޗުގައި ރޫމޭނިއާ އަތުން އެ ޓީމު ބަލިވީ 3-0 އިންނެވެ.
އެހެންކަމުން، މި މުބާރާތުގައި ކުރިއަށް ދިއުމަށް މިރޭ ސްލޮވާކިއާއާ ދެކޮޅަށް ކުޅޭ މެޗުގެ މުހިންމުކަން ޔޫކްރެއިން އަށް ބޮޑެވެ.
މެޗުގެ ކުރިން ވާހަކައްކަމުން ރެބްރޯވް ބުނީ ދެ ވަނަ މެޗަށް ނުކުންނައިރު ފުރަތަމަ މެޗުގެ ނަތީޖާ ހަނދާން ނައްތާލަންޖެހޭ ކަމަށެވެ.
"އެންމެންނަށް ވެސް އަހަރަމެންގެ ކުޅުން ރަނގަޅުކުރަން ޖެހޭކަން. މި އަށް ވުރެ ވަރުގަދަ ރޫހެއް ބޭނުންވާކަން. ފުރަތަމަ މެޗުން ބަލިވުމުގެ ޒިންމާ އެންމެންވެސް އުފުލާ. އަހަރެން ވެސް އަދި ކުޅުންތެރިން ވެސް،" ރެބްރޯވް ބުންޏެވެ.
ރެބްރޯވް ބުނީ ފުރަތަމަ މެޗަށްފަހު އެ ޓީމުގެ ޗޭންޖިން ރޫމުން ހުރިހާ އޮފިޝަލުން ނެރެ، ކުޅުންތެރިން ވަކިން މީޓިން އެއް ބޭއްވި ކަމަށެވެ.
"ފަހަރެއްގައި މިއީ ޖަރުމަންގައި މިއީ އާންމު ކަމެއް ނޫން. އެކަމަކު، ޔޫކްރޭންގައި މިއީ ކުރާ ކަމެއް. އެންމެން ވަކިން ތިބެގެން ގޯސްކޮށް ކުރެވުނު ކަންތައްތަކާމެދު މަޝްވަރާކޮށް، ސުވާލުކޮށް ހެދުން،" ރެބްރޯވް ބުންޏެވެ.
މި ގުރޫޕްގައި ކުޅުނު ފުރަތަމަ މެޗުގައި ބެލްޖިއަމް އަތުން މޮޅުވެ ސްލޮވާކިއާ އޮތީ ތިން ޕޮއިންޓާ އެކު އެވެ. މިރޭގެ މެޗުން މޮޅުވެއްޖެނަމަ، ސްލޮވާކިއާ އަށް ދެ ވަނަ ބުރުގެ ޖާގައެއް ލިބޭނެ އެވެ. ޔޫކްރެއިނުން މިރޭގެ މެޗުން މޮޅެއް ނުވަތަ މަދުވެގެން ޕޮއިންޓެއް ބޭނުންވެ އެވެ.
ޔޫކްރެއިނާ ދެކޮޅަށް ކުޅުނު އަށް މެޗުގެ ތެރެއިން ތިން މެޗުން ސްލޮވާކިއާ ވަނީ ބަލިވެފަ އެވެ. ދެ މެޗުން ސްލޮވާކިއާ މޮޅުވިއިރު، ތިން މެޗު ވަނީ އެއްވަރުވެފަ އެވެ. މިއީ މި ދެ ޓީމުން މުބާރާތެއްގައި ބައްދަލުކުރާ ފުރަތަމަ ފަަހަރެވެ. މިއަދު މި ދެ ޓީމު ކުޅޭ މެޗު ފަށާނީ 6 ޖަހާއިރު އެވެ.
