ކޮލޯން (ޖޫން 19) - ޔުއެފާ ޔޫރޯ ފުޓްބޯޅަ މުބާރާތުގައި ގެ ފުރަތަމަ މެޗުގައި ސްކޮޓްލެންޑްގެ ފަރާތުން އާދައިގެ ކުޅުމެއް ފެނިގެންދިޔަ ނަމަވެސް އެ ޓީމާ ދެކޮޅަށް ސްވިޓްޒަލެންޑުން ނުކުންނާނީ ސަމާލުވެގެން ކަމަށް އެ ޓީމުގެ ކޯޗު މުރާތު ޔަކިން ބުނެފި އެވެ.
ސްވިޓްޒަލެންޑުން މި މުބާރާތުގައި ކުޅުނު ފުރަތަމަ މެޗުން ހަންގޭރީ އަތުން 3-1 އިން ވަނީ މޮޅުވެފަ އެވެ. އެހެންވެ، ސްކޮޓްލެންޑް މެޗުން ތިން ޕޮއިންޓް ހޯދައި ދެ ވަނަ ބުރުގެ ޖާގަ ކަށަވަރު ކުރުމުގެ ފުރުސަތު ސްވިޓްޒަލެންޑަށް އެބައޮތެވެ.
ޔަކިން ބުނީ ސްވިޓްޒަލަންޑުން މި މެޗަށް ނުކުންނާނީ ސްކޮޓްލެންޑަކީ ބަލި ޓީމެއްގެ ގޮތުގައި ދެކިގެން ނޫން ކަމަށެވެ. މި މެޗުގައި ވެސް ސްވިޓްޒަލަންޑް ކުޅުންތެރިންގެ ފަރާތުން 100 ޕަސެންޓް މަސައްކަތް ފެނިގެންދާނެ ކަމަށް ޔަކިން އުންމީދުކުރެ އެވެ.
"ސްކޮޓްލެންޑްގެ ސްކޮޑް ދަށެއް ނޫން. އެ ޓީމުގައި އެބަތިބި ކޮލިޓީ ކުޅުންތެރިން މެޗުގެ ކޮންމެ ވަގުތަކުވެސް އަހަރެމެން އަށް އުނދަގޫ ކުރެވޭ ފެންވަރުގެ. މި މެޗު ފަސޭހަކޮށް ނެގޭކަށް އަހަރެމެންނަކަށް ނެތް" ޔަކިން ބުންޏެވެ.
ޔަކިން ބުނީ ޖަރުމުނު މެޗުގައި ސްކޮޓްލެންޑްގެ ފަރާތުން ފެނިގެންދިޔައީ އެ ޓީމުގެ އަސްލު ކުޅުން ނޫން ކަމަށެވެ. ހާއްސަކޮށް މެޗުގެ ބޮޑު ބައެއް އެއް ކުޅުންތެރިއަކު މަދުކޮށް ކުޅެން ޖެހުން އެއީ ސްކޮޓްލެންޑަށް ދިމާވި އަސްލު މައްސަލަކަމަށް ޔަކިން ދެކެ އެވެ.
ޔަކިން ބުނީ މި މެޗުގައި ސްވިޓްޒަލެންޑް ޓީމަށް ބަދަލުތަކެއް އައުން އެކަށީގެންވާ ކަމަށާއި, އެކަމަކު އަދި އެކަމަށް ވަކި އެއްޗެއް ބުނަން ނޭނގޭ ކަމަށެވެ.
ބައިނަލްއަގުވާމީ ބޮޑެތި މުބާރާތްތަކުގެ ގްރޫޕް ސްޓޭޖުގައި ސްވިޒަލެންޑުން އެންމެ ފަހުން ކުޅުނު 14 މެޗުގެ ތެރެއިން ބަލިވީ އެންމެ ދެ މެޗުންނެވެ. ޔަކިން ބުނީ މިއީ އޭނާގެ ޓީމަށް ލިބޭނެ ބޮޑު ހިތްވަރެއް ކަމަށާއި އުންމީދަކީ ރަނގަޅު ރޫހެއްގައި ތިބުން ކަމަށެވެ. އޭނާ ބުނީ ސަމާލުވާން ޖެހޭނެ އަނެއް ކަމަކީ، ސްކޮޓްލެންޑުން މި މެޗަށް ނުކުންނާނީ އަތުގައި ހުރި ހުރިހާ އެއްޗެއް ދީގެން، އެ ޓީމަށް މުބާރާތުގައި ކުރިއަށްދެވެން އޮތް ހަމައެކަނި ފުރުސަތަށްޓަކައި މަސައްކަތް ކުރުމުގެ ރޫހުގައި ކަމަށެވެ.
"އަހަރެމެން މެޗު ފަސޭހަނުކޮށް ކުރިއަށްދާންވީ، ކުރިން ވެފައި އޮތް ކަމެއް މުހިންމެއް ނޫން، ހަމަބިމުގައި ތިބެގެން ސަމާލުވެގެން ކުރިއަށްދާނީ،" ކުރިން ސްވިޒަލެންޑް ޓީމަށް ކުޅުނު ޔަކިން ބުންޏެވެ.
މި ދެ ޓީމު މީގެ ކުރިން ބައްދަލުކޮށްފައިވަނީ 2006 ވަނަ އަހަރު އެކުވެރިކަމުގެ މެޗެއްގަ އެވެ. ސްކޮޓްލެންޑްގައި ކުޅުނު އެ މެޗުން ސްވިޒަލެންޑް ވަނީ 3-1 އިން މޮޅުވެފަ އެވެ.
މިރޭ މި ދެ ޓީމު ކުޅޭ މެޗު ފަށާނީ 12 ޖަހާއިރު އެވެ.
