ކޮލޯން (ޖޫން 15) - ޖަރުމަނުގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި ސްވިޒަލެންޑުން ކުޅުނު ފުރަތަމަ މެޗުގައި ހަންގޭރީ އަތުން 3-1 އިން މޮޅުވެއްޖެ އެވެ.
ހަންގޭރީއާ ދެކޮޅަށް އެންމެ ފަހުން ސްވިޒަލެންޑުން ކުޅުނު ހަތަރު މެޗުން ވެސް ވަނީ މޮޅުވެފަ އެވެ. ހަންގޭރީން އެންމެ ފަހުން ސްވިޒަލެންޑް ބަލިކުރީ 1998 ވަނަ އަހަރު އެކުވެރިކަމުގެ މެޗެއްގަ އެވެ.
ކޮލޯން ސްޓޭޑިއަމްގައި މިރޭ ކުޅުނު މެޗު ފަށައިގެން ސްވިޒަލެންޑުން ދިޔައީ މެޗު ޑޮމިނޭޓްކޮށްގެން ކުޅެމުންނެވެ. އެ ގޮތުން، މެޗުގެ 12 ވަނަ މިނިޓްގައި، ސްވިޒަލެންޑުން ލީޑުނެގި އެވެ. މިއީ ގައުމީ ޓީމަށް ކުޅެދިން ދެ ވަނަ މެޗުގައި ކްވަޑްވޯ ޑުއާ ޖެހި ލަނޑެކެވެ. މިޝޭލް އަބިޝޭ ދިން ބޯޅައަކުން ޑުއާ މި ލަނޑު ޖެހުމުން ރެފްރީ ނިންމީ އޮފްސަައިޑް ކަމަށެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ގޯލެއް ކަމަށެވެ.
ހަންގޭރީ ޑިފެންޑަރުންނަށް ހެދުނު ގޯހެއްގެ ފައިދާނަގައި ސްވިޒަލެންޑްގެ ރުބެން ވާގާސް އަށް ލަނޑު ޖަހަން ހުސް ފުރުސަތެއް ލިބުނު ނަމަވެސް، އޭނާ ހުސްކޮށް އަރައި ޖެހި ބޯޅަ ހަންގޭރީގެ ކީޕަރު، ޕީޓާ ގުލާކްޝީ ވަނީ މަތަކޮށްފަ އެވެ.
މެޗުގެ 45 ވަނަ މިނިޓްގައި ސްވިޒަލެންޑުން ވަނީ ދެ ވަނަ ލަނޑު ޖަހައިފަ އެވެ. މިއީ، އޭރިއާބޭރުން ހަމަޖެހިލައިފައި އަބިޝޭ ޖެހި ގޯލެކެވެ. މިއީ، ގައުމީ ޓީމަށް އޭނާ ޖަހައިދިން ފުރަތަމަ ގޯލެވެ.
ހަންގޭރީގެ ވާގާ (ވ) އަތުން ބޯޅަ ހޯދަން ސްވިޒަލެންޑްގެ އަކަންޖީ ޓެކަލްކުރަނީ
ފުރަތަމަ ހާފުގައި ހަންގޭރީ އަށް ލަނޑެއް ޖަހަން އެންމެ ރަނގަޅު ފުރުސަތެއް ލިބުނީ އެ ޓީމުގެ ފަހަތަށް ކުޅޭ ވިލީ އޯބާން އަށެެވެ. ހަންގޭރީގެ ކެޕްޓަން، ޑޮމިނިކް ސޮބޯސްލާއި ހިލޭ ޖެހުމަކުން ނެގި ބޯޅަ އޮބާން ބޮލުން ފޮނުވާލުމުން، ސްވިޒަލެންޑްގެ ކީޕަރު، ޔެން ސޮމާ ވަނީ މަތަކޮށްފަ އެވެ.
ހަންގޭރީން ދެ ވަނަ ހާފުގައި ބަދަލުތަކެއް ގެނެސް، ޓީމުގެ ކުޅުމުގެ ސްޓައިލަށް ބަދަލުތަކެއް ގެނައި ނަމަވެސް، ސްވިޒަލެންޑްގެ އެޓޭކްތައް ނުުހުއްޓެވުނެވެ. އެ ގޮތުން، ދެ ވަނަ ހާފުގައި ސްވިޒަލެންޑްގެ ޑުއާ އާއި ވާގާސް ޖެހި ޝޮޓްތަކެއް ކީޕަރު ގުލާކްޝީ ވަނީ މަތަކޮށްފަ އެވެ.
މެޗުގެ ތެރެއަށް ވަންނަން ހަންގޭރީ އަށް ފުރަތަމަ ހުސް ފުރުސަތު ލިބުނީ 63 ވަަނަ މިނިޓްގަ އެވެ. އެ ގޮތުން، އޭރިއާތެރެއިން ހުސްކޮށް އަރައި، ހަންގޭރީގެ ބާނަބާސް ވާގާ ބޮލުން ޖެހި ބޯޅަ ދިޔައީ ދަނޑިކައިރިން ބޭރުންނެވެ. އެކަަމަކު، އޭގެ ތިން މިނިޓް ފަހުން، އޭރިއާތެރެއަށް ހުރަސްވި ބޯޅައެއް ބޮލުން ގޯލަށް ވައްދާލައި ވާގާ ވަނީ ހަންގޭރީ އަށް އުންމީދެއް ހޯދައިދީފަ އެވެ.
އޭގެ ފަހުން ހަންގޭރީން އެޓޭކް ރަނގަޅުކޮށް ކުރިއަށްޖެހިގެން ކުޅެން ފެށި އެވެ. ލަނޑެއް ޖަހައި އެއްވަރުކުރެވޭތޯ ގިނަ މަސައްކަތްތަކެއް ކުރި ނަމަވެސް، ކާމިޔާބެއްނުވި އެވެ.
ކައުންޓަ އެޓޭކުގައި ތިން ވަނަ ލަނޑެއް ޖަހަން ސްވިޒަލެންޑަށް ވެސް ރަނގަޅު ފުރުސަތުތަކެއް ލިބުނުއިރު، އިތުރު ވަގުތުގައި ތިން ވަނަ ލަނޑު ޖެހީ ބަދަލަކަށް ކުޅެން އެރި ބްރީލް އެމްބޯލޯ އެވެ. އޭނާ މި ލަނޑު ޖެހީ ހުސްކޮށް ލިބުނު ފުރުސަތެއްގައި ކީޕަރު ގުލާކްޝީ ބޯމަތިން އޮއްސާލައިގެންނެވެ.
މި ގްރޫޕްގައި ދެން ކުޅޭ މެޗުތަކަށް ބަލާއިރު، ހަންގޭރީން ކުޅޭނީ ޖަރުމަނާ އެވެ. އަދި ސްވިޒަލެންޑުން ނުކުންނާނީ ސްކޮޓްލެންޑާ ދެކޮޅަށެެވެ. ގްރޫޕްގެ ފުރަތަމަ މެޗުން ޖަރުމަނުން ވަނީ 5-1 އިން ސްކޮޓްލެންޑް ބަލިކޮށްފަ އެވެ.
