ކޮލޯން (ޖޫން 15) - ޔޫރޯ ފުޓްބޯޅަ މުބާރާތުގައި މި ފަހަރު ވާދަކުރާ ހަންގޭރީގެ ކެޕްޓަން ބޭންޑް އަޅައިގެން، ހުނަރުވެރި މިޑްފީލްޑަރު، ޑޮމިނިކް ސޮބޯސްލާއި ކުޅެން ތައްޔާރުވާއިރު، އޭނާ ވެގެންދާނީ ބޮޑު މުބާރާތެއްގައި އެ ޓީމު ލީޑު ކުރާނެ ހަންގޭރީގެ އެންމެ ޒުވާން ކެޕްޓަަނަށެވެ.
އެކަމަކު، އުމުރުން 23 އަހަރުގެ ސޮބޯސްލާއި، ބޭނުންވަނީ ހަމައެކަނި ޒުވާން ކެޕްޓަނެއްގެ ގޮތުގައި އޭނާގެ ނަން އެ ގައުމުގެ ފުޓްބޯޅައިގެ ތާރީހުގައި ލިޔެވިފައި އޮންނާކަށެއް ނޫނެވެ. އޭނާގެ އަމާޒަކީ އެ ގައުމުގެ ފުޓްބޯޅައިގައި ގައުމަށް ކާމިޔާބު ހޯދައިދިން ކުޅުންތެރިއެއްގެ ގޮތުގައި ގިނަ ބަޔަކަށް އޭނާ އެނގުމަށެވެ.
"އަހަރެން ބޭނުން މިސާލަކަށް ވާން، އަހަރެން ބޭނުންވަނީ ކުރިން ޔޫރަޕްގެ ފުޓްބޯޅައިގައި މީހުންނަށް އެނގުނު ހަންގޭރީ އަކަށް ވުރެ ވަރުގަދަ ޓީމެއް އެެބައޮތްކަން ދައްކުވައިދޭން،" ޔޫރޯގެ ފުރަތަމަ މެޗުގައި، ސްވިޒަލެންޑާ ދެކޮޅަށް ނުކުތުމުގެ ކުރިން ސޮބޯސްލާއި ބުންޏެވެ.
އޭނާ ބުނީ، ގްރޫޕް އޭގައި ހަންގޭރީގެ އިތުރުން ދެން އޮތް ސްވިޒަލެންޑާއި ޖަރުމަނު އަދި ސްކޮޓްލެންޑާ ދެކޮޅަށް ނުކުންނާނީ ޓީމެއްގެ ގޮތުގައި ކާމިޔާބު ހޯދުމަށް ކަމަށެެވެ. އިންޑިވިޖުއަލް ވިސްނުމެއްގައި ކަންކަން ކުރަން އުޅެގެން ފުޓްބޯޅައިގައި ކާމިޔާބު ނުލިބޭނެކަމަށް ސޮބޯސްލާއި ގަބޫލުކުރެ އެވެ.
ފަލަމަސްގަނޑަށް ލިބުނު އަނިޔާއަކަށް ފަރުވާ ހޯދަމުން އަންނަ ސޮބޯސްލާއި އަށް ފުރަތަމަ މެޗު ގެއްލުމުގެ ބިރު ވެސް އެބައޮތެވެ. އޭނާ ބުނީ އެއްކޮށް ފިޓްނުވާނަމަ، ރިސްކެއް ނުނަގާނެ ކަމަށެވެ.
"އަހަރެންގެ ސަބަބުން ޓީމު ގެއްލުމެއްގެ ތެރެއަށް ހުށަހެޅެން ބޭނުމެއް ނޫން. ދެން، އަހަރެން ބޭނުމެއް ނުވޭ ޓީމުން ބޭރުން ދުނިޔޭގެ އެތަންމިތަނުން އެ އިވޭ އަޑުތަކުން ޓީމަށް ޕްރެޝަރަކަށްވާން. ދެން، ފުޓްބޯޅައިގައި މި އޮންނަ ޕްރެޝަރުގެ އިހުސާސް ކުރެވޭނަމަ، މިއީ ޓީމެއް، އެކަކު އަނެކަކަށް އެހީވެގެން، ޔޫރޯގެ މި ފުރުސަތުގެ ބޭނުންހިފަންވީ،" ކްލަބް ލެވަލްގައި އިންގްލެންޑްގެ ލިވަޕޫލަށް ކުޅެމުން އަންނަ ސޮބޯސްލާއި ބުންޏެވެ.
އެންމެ ފަހުން، 2021 ވަނަ އަހަރު ބޭއްވި ޔޫރޯގައި ސޮބޯސްލާއި ނުކުޅެ އެވެ. އެއީ މުބާރާތަށް ކުޑަތަންވެފައި ވަނިކޮށް ލިބުނު އަނިޔާއެއްގެ ސަބަބުންނެވެ. އެހެންވެ، މި ފަހަރުގެ ޔޫރޯ އަށް ސޮބޯސްލާއި ހުރީ ތަފާތު ރޫހެއްގަ އެވެ. އެ ގައުމުގެ ފުޓްބޯޅަ އަށް ރަނގަޅު މުބާރާތަކަށް ޔޫރޯ ހެދުމަށެވެ.
