ކޮލޯން (ޖޫން 15) - ޔޫރޯ ފުޓްބޯޅަ މުބާރާތުގައި މިއަދުގެ މެޗަށް ނުކުންނައިރު، ހަންގޭރީ އަކީ އާދައިގެ ޓީމެއްގެ ގޮތުގައި ނުދެކޭނެ ކަމަށް ސްވިޒަލެންޑްގެ ކޯޗު މުރާތު ޔަކިން ބުނެފި އެވެ.
ގްރޫޕް އޭގައި ރޭ ޖަރުމަނުން ވަނީ ސްކޮޓްލެންޑް އަތުން 5-1 އިން މޮޅުވެފަ އެވެ. އެހެންކަމުން، އެ ގްރޫޕްގައި ދެން އޮތް ސްވިޒަލެންޑާއި ހަންގޭރީ އަށް މިއަދުގެ މެޗު ވަރަށް މުހިންމުވާނެ އެވެ.
ސްވިޒަލެންޑްގެ ކޯޗު ޔަކިން ބުނީ ހަންގޭރީން ދައްކަމުން އަންނަ ކުޅުމަށް ބަލާއިރު އެ ޓީމަކީ ވަރަށް އޯގަނައިޒްކޮށް ކުޅޭ ޓީމެއްކަން ފާހަގަކުރެވޭ ކަމަށެވެ.
"ވަރަށް ވަރުގަދަ އަށް ކުޅޭ ޓީމެއް. އެ މީހުންގެ ހުރިހާ ޑިޕާޓްމަންޓެއް ވެސް ފެންނަނީ ވަރަށް ވަރުގަދަކޮށް. އަހަރެން ކުޅުންތެރިން ގާތުގައި ބުނަމުން މި އަންނަނީ މި މެޗުގައި އާދައިގެ ވިސްނުމަކުން ކުރިމަތިނުލަން. ވަރަށް ފަރުވާ ބަހައްޓައިގެން މި ކުޅެނީ ވަރުގަދަ ޓީމަކާކަން ދަނެގެން ކުޅެން،" ޔަކިން ބުންޏެވެ.
ސްވިޒަލެންޑުން ވަނީ އެންމެ ފަހުން ބޭއްވި ޔޫރޯގެ ކުއާޓާ ފައިނަލަށް ދަތުުރުކޮށްފަ އެވެ. ޔަކިން ބުނީ، މި ފަހަރު އަމާޒަކީ އެއް ހަރުފަތް މައްޗަށް ޖައްސާލުން ކަމަށެވެ. އަދި އެ ޓީމުގެ ކިބައިގައި އެ ފެންވަރު އެބަހުރި ކަމަށް ޔަކިން ގަބޫލުކުރެ އެވެ.
"އަހަރެމެން ކުޅެން މަސައްކަތް މި ކުރާ ގޭމް ކުޅެން ޖެހޭނީ، އެހެން ވިސްނުންތަކެއް ގެނެސްގެން ބަދަލުތަކެއް ގެންނަން އުޅުން ރަނގަޅެއް ނުވާނެ. އިތުބާރާ އެކު ކުޅެ މޮޅުވުން އޮތީ،" ޔަކިން ބުންޏެވެ.
ސްވިޒަލެންޑާއި ފްރާންސަކީ އެންމެ ފަހުން ބޭއްވި ބައިނަލްއަގުވާމީ ފަސް މުބާރާތުގެ ވެސް ކުއާޓާ ފައިނަލުގައި ކުޅުނު ހަމައެކަނި ދެ ޓީމެވެ.
މި މެޗަށް ނުކުންނައިރު ސްވިޒަލެންޑާއި ހަންގޭރީ އަށް ވެސް އަނިޔާގެ މައްސަލަތަކެއް އެބަހުއްޓެވެ. އެ ގޮތުން، ދެ ޓީމުގެ މުހިންމު ކުޅުންތެރިން ކަމަށްވާ ހަންގޭރީގެ ޑޮމިނިކް ސޮބޯސްލާއި އާއި ސްވިޒަލެންޑްގެ ބްރީލް އެމްބޯލޯ މި މެޗަށް އެއްކޮށް ފިޓެއް ނޫނެވެ.
ހަންގޭރީގެ ކޯޗު މާކޯ ރޮސީ: އޭނާ ދެކޭގޮތުގައި ވާދަކުރެވޭނެ ފެންވަރު އެ ޓީމުގެ އެބަހުރި.
އެންމެ ފަހުން ހަންގޭރީ އާއި ސްވިޒަލެންޑް ބޮޑު މުބާރާތެއްގައި ބައްދަލުކުރީ 1938 ވަނަ އަހަރުގެ ވޯލްޑް ކަޕްގެ ކުއާޓާ ފައިނަލްގަ އެވެ. ހަންގޭރީ ވަނީ އެ މެޗުން 2-0 އިން މޮޅުވެފަ އެވެ.
ހަންގޭރީގެ ކޯޗު އިޓަލީ އަށް އުފަން މާކޯ ރޮސީ ދެކޭގޮތުގައި، މި ގްރޫޕްގެ ފޭވަރިޓުންނަކީ ޖަރުމަނާއި ސްވިޒަލެންޑް އެވެ. އެކަމަކު، އެ ޓީމުން ނޮކައުޓް ބުރަށް ދާން ކުރާ މަސައްކަތުގައި އޮތް ކޮންމެ ފުރުސަތަކަށް ވެސް މަސައްކަތްކުރާނެކަން ފާހަގަކޮށް، ރޮސީ ބުނީ، ހުރިހާ ގްރޫޕަކުން އެންމެ ރަނގަޅު ނަތީޖާ ނެރޭ ތިން ވަނަ ޓީމަށް ވެސް ފުރުސަތު އޮތުމަކީ، ހަންގޭރީން ކޮންމެވެސް ވަރަކަށް ވިސްނާނެ ކަމެއް ކަމަށެވެ.
"އަހަރެމެންގެ ވިސްނުމަކީ، ދެން ހުވަފެނަކީ ވެސް، ގަދަ 16 އަށް ދިއުން، މަސައްކަތް ކުރަނީ ވެސް އެ މިސްރާބަށް، އަހަރެމެން ސާބިތުކޮށްދީފައި އޮތީ ކޮންމެ ޓީމެއް އަތުން ވެސް މޮޅުވެވޭނެކަން، އެކަމަކު، ގަބޫލުކުރަން ޖެހޭ ހަގީގަތެއް އެއީ، ކޮންމެ ޓީމެއް އަތުން ބަލިވެސް ވެދާނެ. ހަމަބިމުގައި ފައި ބަހައްޓައިގެން އަދާކުރަން ޖެހޭ ވަޒީފާ އަށް ފަރުވާ ބަހައްޓަންވީ،" ރޮސީ ބުންޏެވެ.
ހަންގޭރީ އާއި ސްވިޒަލެންޑްގެ މެޗު ފަށާނީ މިރޭ ރާއްޖެ ގަޑިން 6:00 ގަ އެވެ.
