އަންނަ އަަހަރުގެ ކުރީކޮޅުގައި ޕާކިސްތާންގައި ސައުތު އޭޝިއަން ގޭމްސް ބޭއްވުމަށް ކުރަމުން އަންނަ މަސައްކަތުގެ ތެރެއިން، ޕާކިސްތާންގެ ސަރުކާރާއި އެ ގައުމުގެ އޮލިމްޕިކް ކޮމިޓީން ކުރިއަށްދާން ބޭނުންވާ ގޮތުގެ ޕްލޭނިން މަސައްކަތް، އޮގަސްޓް މަހުގެ ނިޔަލަށް ނިންމޭތޯ ކުރަން ޖެހޭ ކަންކަން ކުރަމުން އަންނަ ކަމަށް ޕާކިސްތާންގެ މީޑިއާ ރިޕޯޓްތައް ބުނެފި އެވެ.
ޕާކިސްތާނުގައި މިދިޔަ އަހަރު ބާއްވަން ނިންމާފައި އޮތް ސައުތު އޭޝިއަން ގޭމްސް މި އަހަރަށް ފަސްކުރަން ނިންމީ، 2022 ވަނަ އަހަރު ބޭއްވި ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ ބައްދަލުވުމެއްގަ އެވެ. ސާދަ ވަނަ ސައުތު އޭޝިއަން ގޭމްސް، ޕާކިސްތާންގައި ބާއްވަން ކުރާ މަސައްކަތުގައި އެއްބަސްނުވެވި އޮތް އެންމެ ބޮޑު ކަމަކީ، ގޭމްސްގެ މުބާރާތްތައް ކުޅޭނެ، ވެނިއުސްތަކެއް ކަނޑައަޅުމާއި ސަރުކާރާ ގުޅިގެން، ފަންޑް ހޯދައި، ގޭމްސްގެ މައިގަނޑު ހަބްތަކެއްގެ ގޮތުގައި ކަނޑައަޅާނެ ސިޓީތަކެއް ނިންމުމުގަ އެވެ.
އެ ގޮތުން، މާޗް މަހު ބޭއްވި ބައްދަލުވުމެއްގައި، ސައުތު އޭޝިއަން ގޭމްސްގެ މެއިން ހަބެއްގެ ގޮތުގައި، ލާހޯރް ކަމަށް ކަނޑައަޅަން މި ކަމުގައި މަޝްވަރާކުރި ފަރާތްތަކަށް އެއްބަސްވެވުނެވެ.
އެކަމަކު، އަދިވެސް އެކަމަށް އެއްބަސްވުމަށް ފަހު ދެން ކުރަން ޖެހޭ މުހިންމު ކަންކަން ހުރީ ހުއްޓިފަ އެވެ.
މިދިޔަ މަހު ޕާކިސްތާން އޮލިމްޕިކް ކޮމިޓީން ވަނީ އެ ގައުމުގެ ގައުމީ ކުޅިވަރު އެސޯސިއޭޝަންތަކާ ބައްދަލުކޮށް، ގޭމްސްގެ ކުޅިވަރުތައް ބާއްވާނެ ސިޓީތަކާއި ވެނިއުސްތައް ކަނޑައެޅުމުގައި ލަފާ ހޯދައިފަ އެވެ. އަދި މަރާމާތު ކުރަން ޖެހޭ ވެނިއުސްތައް ނިންމައި، އެ އަށް ސަރުކާރުން ފަންޑް ހޯދައި، ދެން ކުރިއަށްދާނެ ގޮތްތަކެއް ހޯދަަން ވެސް ވާހަކަ ދެކެވުނެވެ.
އެ ގޮތުން، މި މަސް ތެރޭ، ސައުތު އޭޝިއަން ގޭމްސްގެ އޮގަނައިޒިން ކޮމިޓީއެއް ރަސްމީކޮށް އެކުލަވާލައި، އަންނަ އޮގަސްޓް މަހުގެ ނިޔަލަށް ޕްލޭނިން ކަންކަން ފުރިހަމަ ކުރަން ވަނީ އަމާޒުހިފައިފައި ކަމަށް މީޑިއާ ރިޕޯޓްތައް ބުނެ އެެވެ.
އަދި ޕާކިސްތާން އޮލިމްޕިކް ކޮމިޓީން އަންނަނީ އެ ގައުމުން އަންނަ އަހަރުގެ ކުރީކޮޅުގައި ސައުތު އޭޝިއަން ގޭމްސް ބާއްވަން ކުރަމުން އަންނަ މަސައްކަތާ ގުޅޭ މައުލޫމާތު ދެކުނު އޭޝިއާގެ ހުރިހާ ގައުމެއްގެ އޮލިމްޕިކް ކޮމިޓީއާ ހިއްސާ ކުރަމުން ކަމަށް ވެސް، ރިޕޯޓްތައް ބުނެ އެވެ.
މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ. އެންމެ ފަހުން ސައުތު އޭޝިއަން ގޭމްސް ބޭއްވީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫ އާއި ޕޮކާރާގަ އެވެ. އޭގެ ކުރިން ބޭއްވީ 2016 ވަނަ އަހަރު، ފެބްރުއަރީ މަހު، އިންޑިއާގެ ޝިލޯން އާއި ގުވަހާޓީގަ އެވެ. އެ ދެ ފަަހަރު ވެސް ގޭމްސް ބޭއްވުނީ އެކި ފަހަރު މަތިން ޝެޑިއުލްކޮށްގެންނެވެ. އެންމެ ފަހުން ދެ ފަހަރު ވެސް ސައުތު އޭޝިއަން ގޭމްސް ބޭއްވުނީ ކަނޑައެޅި މުއްދަތަށް ވުރެ ފަހުންނެވެ.
