ދެކުނު އޭޝިއާގެ ފުޓްބޯޅަ ފެޑެރޭޝަން، ސާފް އިން މި އަހަރު ބާއްވާ އުމުރުފުރާ ދެ މުބާރާތެއްގައި ރާއްޖެ އާއި އިންޑިއާ އެއް ގްރޫޕެއްގައި ވާދަކުރަން ޖެހިއްޖެ އެެވެ.
ސާފް އިން މި އަހަރު ބާއްވާ ތިން މުބާރާތެއްގެ ގުރުއަތުލުން މިއަދު ވަނީ ކުރިއަށްގެންގޮސްފަ އެވެ. އެއީ، 17 އަހަރުން ދަށުގެ މުބާރާތާއި 20 އަހަރުން ދަށުގެ މުބާރާތުގެ އިތުރުން ސާފް ވިމެންސް ޗެމްޕިއަންޝިޕް އެވެ.
އެ ގޮތުން، އެންމެ ފުރަތަމަ އޮތީ އަންނަ އޮގަސްޓް 16-28 އަށް ނޭޕާލުގައި ކުރިއަށްދާ ސާފް 20 އަހަރުން ދަށުގެ މުބާރާތެވެެ. އެ މުބާރާތުގައި ރާއްޖެ ހިމެނެނީ، އިންޑިއާ އާއި ބޫޓާނާ އެކު ގްރޫޕް ބީގަ އެވެ. ގްރޫޕް އޭގައި ހިމެނެނީ ނޭޕާލް، ބަންގްލަދޭޝް، ޕާކިސްތާން އަދި ސްރީ ލަންކާ އެވެ.
ފުރަތަމަ ޑިވިޝަނުގެ ކްލަބްތަކުގެ މެދުގައި މާދަމާ ފަށާ 19 އަހަރުން ދަށުގެ ޔޫތު ޗެމްޕިއަންޝިޕަކީ، ސާފް 20 އަހަރުން ދަށުގެ މުބާރާތާއި އޭޝިއާގެ 20 އަހަރުން ދަށުގެ މުބާރާތުގެ ކޮލިފައިން އަށް ޓީމު އެކުލަވާލުމުގެ އަމާޒުގައި ކުރިއަށްދާ މުބާރާތެކެވެ.
ބޫޓާނުގައި ސެޕްޓެމްބަރު 18-28 އަށް ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ހިމެނެނީ، އިންޑިއާ އާއި ބަންގްލަދޭޝާ އެއް ގްރޫޕެއްގަ އެވެ. އަނެއް ގްރޫޕްގައި ހިމެނެނީ، ބޫޓާން، ނޭޕާލް، ޕާކިސްތާން އަދި ސްރީ ލަންކާ އެވެ.
މި މުބާރާތައް ތައްޔާރުވާން 16 އަހަރުން ދަށުގެ ޔޫތު މުބާރާތެއް ބާއްވަން އެފްއޭއެމް އިން ޝެޑިއުލްކޮށްފައިވެ އެވެ.
ސާފް ވިމެން ޗެމްޕިއަންޝިޕް މި ފަހަރު އޮތީ އޮކްޓޫބަރު 17-30 އަށް ނޭޕާލުގަ އެވެ. އެ މުބާރާތުގައި ރާއްޖެ ހިމެނެނީ، ނޭޕާލް، ސްރީ ލަންކާ އަދި ބޫޓާނާ އެކު ގްރޫޕް ބީގަ އެވެ. ގްރޫޕް އޭގައ ހިމެނެނީ، އިންޑިއާ އާއި ބަންގްލަދޭޝް އަދި ޕާކިސްތާން އެވެ.
ރާއްޖޭގައި އަންހެން ފުޓްބޯޅަ އަށް ހާއްސަ މުބާރާތެއް ނުބާއްވާތާ ގިނަ އަހަރުތަކެއް ވަނީ ވެފަ އެވެ. އެހެން ނަމަވެސް ގައުމީ އަންހެން ފުޓްބޯޅަ ޓީމުގެ މެޗުތައް އެކި ފަހަރު މަތިން ކުޅެފައިވާއިރު، އެންމެ ފަހުން 2022 ގައި ބޭއްވި މުބާރާތުގައި ރާއްޖެ ވަނީ ގްރޫޕް ސްޓޭޖުގެ ތިން މެޗުން ވެސް ބަލިވެފަ އެވެ.
