މައިނާ ހަންޏާސް ކަޕް 2024 ގެ ފައިނަލުން އެންމެ ފަހުގެ ޗެމްޕިއަން ލަކުޑި އަދި މަގުކޮޅު ސްޕޯޓްސް ކުލަބް ޖާގަ ހޯދައިފި އެވެ.
މި މުބާރާތުގައި ރޭ ވަނީ ސެމީ ފައިނަލް މެޗުތައް ކުޅެފަ އެވެ.
އދ. ހަންޏާމީދޫ އަށް ނިސްބަތްވާ މަގުކޮޅު ސްޕޯޓްސް އިން ފައިނަލުގެ ޖާގަ ކަށަވަރުކު ރީ އއ. މަތިވެރި އަށް ނިސްބަތްވާ ރޯޔަލް ނައިޓްސް 1-0 ގެ ނަތީޖާއަކުން ބަލިކުރުމަށްފަހު އެވެ.
ހަމަހަމަ ކުޅުމެއް ފެނިގެންދިޔަ މި މެޗުގެ ހަމައެކަނި ގޯލު ފުރަތަމަ ހާފުގެ 14 ވަނަ މިނެޓުގައި މަގުކޮޅު ސްޕޯޓްސް އަށް ކާމިޔާބުކޮށް ދިނީ އަހުނަފް ޒާހިރު އެވެ. މެޗުގެ ދެ ވަނަ ހާފުގައި, ރޯޔަލް ނައިޓްސްގެ އަޔާޒް އަހުމަދު އަދި އަލީ އަލްސަން ފޮނުވާލި ނުރައްކާތެރި ހަމަލާތައް ދިފާއު ކުރުމުގައި ތަފާތަކަށްވީ މި މެޗުގައި މޮޅު ކުޅުމެއް ދެއްކި މަގުކޮޅު ސްޕޯޓްސްގެ ގޯލްކީޕަރު ފައްޔާޒް ފަޔާޒް (ފައިއްޓެ) އެވެ.
މަގުކޮޅު ސްޕޯޓްސް އާއި ރޯޔަލް ނައިޓްސް ބައްދަލުކުރި މެޗުގެ ތެރެއިން - ފޮޓޯ: އަތޫފް އާތިފް / އަދަދު
ސެމީ ފައިނަލުގެ ދެ ވަނަ މެޗުގައި އެންމެ ފަހުގެ ޗެމްޕިއަން ލަކުޑިން ވަނީ ފަސޭހަކަމާ އެކީ ރައިވަލްސް ޔުނައިޓެޑްގެ މައްޗަށް 8-3 ގެ ނަތީޖާއަކުން ކުރިހޯދާފަ އެވެ.
މި މެޗުގައި ލަކުޑީގެ އަބްދުالله މިދުހަތް ފަހުމީ (ބިޗަޑް) ވަނީ ތިން ގޯލު ޖަހާ ހެޓްރިކް ހަދައިފަ އެވެ. މީގެ އިތުރުން އާދަމް ފަހުމާން ވަނީ ދެ ގޯލު ޖަހާފަ އެވެ. އަދި އަލީ އަޔާޒް, ޝުއައިދު ސައީދު އަދި އަހުމަދު ޒިފާން އިބްރާހީމް, މިއިން ކޮންމެ ކުޅުންތެރިއަކު ވަނީ ގޯލެއް ޖަހައިފަ އެވެ.
މި މެޗުގައި ރައިވަލްސް ހުސެއިން ސުހައިލް ދެ ގޯލު ޖެހިއިރު, އާދަމް ތޮލްހަތު ވަނީ ގޯލެއް ޖަހައިފަ އެވެ.
މި މުބާރާތުގެ ފައިނަލް މެޗު ކުޅޭނީ މިރޭގަ އެވެ.
