މައިނާ ހަންޏާސް ކަޕް 2024 ގެ ގްރޫޕް ސްޓޭޖު ފަހު މެޗުގައި އެފްސީ ގޯޅި ބަލިކޮށް މަގުކޮޅު ސްޕޯޓްސް ކުލަބުން ސެމީ ފައިނަލުގެ ފަހު ޖާގަ ކަށަވަރުކޮށްފި އެވެ.
ރޭ ކުޅުނު ގްރޫޕް ސްޓޭޖުގެ ފަހު މެޗުގައި ގޯޅީގެ މައްޗަށް މަގުކޮޅުން ކުރިހޯދީ 7-6 ގެ ނަތީޖާ އަކުންނެވެ.
މި މެޗުގެ ތިންވަނަ މިނެޓުގައި ގޯޅިން ވަނީ ގޯލު ޖަހާ ލީޑު ނަގައިފަ އެވެ. މި ގޯލު އެ ޓީމަށް ޖަހާދިނީ އަލީ އަޒުމީ އެވެ. އަދި އޭގެ ތިން މިނެޓު ފަހުން ގޯޅިން ވަނީ އިތުރު ގޯލެއް ޖަހާ ލީޑު ފުޅާ ކޮށްފަ އެވެ. މި ގޯލު އެ ޓީމަށް ޖަހާދިނީ އަހުމަދު ހުމާމް އެވެ.
އެކަމަކު، އޭގެ މިނެޓެއް ފަހުން މަގުކޮޅުގެ ކެޕްޓަން މުހައްމަދު ޖައިލަމް (އޮގީ) ގޯލެއް ޖަހާ ފަރަގު ކުޑަކުރި އެވެ. މެޗުގެ 16 ވަނަ މިނެޓުގައި އަޒުމީ ވަނީ އިތުރު ގޯލެއް ޖަހާ ގޯޅީގެ ލީޑު ފުޅާކޮށްފަ އެވެ.
ފުރަތަމަ ހާފު ނިމެން ދެ މިނެޓަށްވެފައި ވަނިކޮށް އޮގީ ވަނީ ލިބުނު ހިލޭ ޖެހުމަކުން ގޯލު ޖަހާ އަލުން ފަރަގު ކުޑަކޮށްފަ އެވެ. އެކަމަކު، އަޒުމީ ވަނީ ފުރަތަމަ ހާފުގެ ފަހު މިނެޓުގައި ގޯލު ޖަހާ އޭނާގެ ހެޓްރިކް ފުރިހަމަކޮށް ގޯޅީގެ ލީޑު އަލުން ފުޅާކޮށްފަ އެވެ.
ދެ ވަނަ ހާފު ފަށައިގެން ތިންވަނަ މިނެޓުގައި މަގުކޮޅުގެ އަހުނަފް ޒާހިރު ވަނީ ގޯލު ޖަހާ ފަރަގު ކުޑަކޮށްފަ އެވެ. އަދި އޭގެ މިނެޓެއް ފަހުން އަހުމަދު ބައްސާމް މުހައްމަދު ނައީމް (ބައްކު) ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. އެކަމަކު، އޭގެ ތިން މިނެޓު ފަހުން އަޒުމީ ވަނީ އިތުރު ގޯލެއް ޖަހާ އަލުން ގޯޅި އަށް ލީޑު ނަގާދީފަ އެވެ. އަދި އޭގެ ތިން މިނެޓު ފަހުން އަބްދުالله ޝިފާޒް ގޯލު ޖަހާ ގޯޅީގެ ލީޑު ފުޅާކުރި އެވެ.
މެޗުން މަގުކޮޅު މޮޅުކޮށްދިން ދެ ގޯލު ޖެހާ އަހުނަފް ވަނީ އޭނާގެ ހެޓްރިކް ފުރިހަމަ ކޮށްފަ އެވެ.
މި މުބާރާތުގެ ސެމީ ފައިނަލުގައި މިރޭ މަގުކޮޅުން ނުކުންނާނީ, ގްރޫޕް އޭގެ އެއް ވަނަ ރޯޔަލް ނައިޓްއާ ދެކޮޅަށެވެ. ދެ ވަނަ ސެމީގައި އެންމެ ފަހުގެ ޗެމްޕިއަން ލަކުޑިން ނުކުންނާނީ ރައިވަލްސް ޔުނައިޓެޑްއާ ދެކޮޅަށެވެ.
