އަންނަ ހުކުރު ދުވަހުގެރޭ ބާއްވަން މަސައްކަތް ކުރަމުން އަންނަ ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އިންތިހާބު މަޑުޖައްސާލަން އެންޓި ކޮރަޕްޝަން ކޮމިޝަން (އޭސީސީ) އިން އަންގައިފި އެވެ.
އައްޑޫ އިކުއޭޓްރަލް ވިލެޖުގައި ހުކުރު ދުވަހުގެރޭ ބާއްވަން ތާވަލުކޮށްފައި އޮތް ބެޑްމިންޓަން އެސޯސިއޭޝަންގެ އިންތިހާބު މި ވަގުތު ނުބާއްވަން ކޮމިޝަނާ އޮފް ސްޕޯޓްސް މުހައްމަދު ތޮލާލް ވެސް ވަނީ އަންގައިފަ އެވެ. އެއީ، ބެޑްމިންޓަން އެސޯސިއޭޝަންގެ ހިންގާ ގަވާއިދުގައި ހުރި މައްސަލަތަކެއްގެ ކަންކަން އިސްލާހު ކުރުމަށް ފަހު އިންތިހާބެއް ބޭއްވުމަށެވެ.
އެކަމަކު، ސްޕޯޓްސް ކޮމިޝަނަރުގެ އެންގުމަށް ބެލުމެއް ނެތި، ބެޑްމިންޓަން އެސޯސިއޭޝަނުން އިންތިހާބުގެ ކަންކަން ކުރަމުން ދަނިކޮށް، އިއްޔެ، އޭސީސީގެ ޓީމެއް ވަނީ ބެޑްމިންޓަން އެސޯސިއޭޝަންގެ އޮފީހަށް ވަދެފަ އެވެ.
"އަދަދު" އަށް އެނގިފައިވާ ގޮތުގައި، އޭސީސީން މިއަދު ވަނީ ބެޑްމިންޓަން އެސޯސިއޭޝަން އަށް ސިޓީއެއް ފޮނުވައި، އިންތިހާބުގެ ކަންކަން މަޑުޖައްސާލަން އަންގައިފަ އެވެ. އޭސީސީން އަންގާފައިވަނީ ބެޑްމިންޓަން އެސޯސިއޭޝަންގެ އިންތިހާބާ ގުޅޭ ކޮރަޕްޝަންގެ މައްސަލަތަކެއް ތަހުގީގު ކުރަމުން އަންނަ ކަމަށާއި ވަކި އެއްޗެއް އަންގަންދެން އިންތިހާބުގެ ކަންކަން ކުރިއަށް ނުގެންދިއުމަށެވެ.
ބެޑްމިންޓަން އެސޯސިއޭޝަންގެ ރައީސްގެ މަގާމު ތިން ވަނަ ދައުރަކަށް ފުރުއްވަމުން އަންނަ މޫސާ ނާޝިދު (މޫސަ) އަށް ވެސް ކޮރަޕްޝަންގެ ގިނަ ތުހުމަތުތަކެއް އަމާޒުވެ އެވެ. ކުރިއަށް އޮތް އިންތިހާބުގައި މޫސަ ރައީސްގެ މަގާމަށް ވާދަނުކުރެ އެވެ. މޫސަ ނަން ހުށަހަޅާފައިވަނީ، ނައިބު ރައީސްގެ މަގާމަށެވެ.
ރައީސްގެ މަގާމަށް ވާދަކުރަނީ، ބެޑްމިންޓަން އެސޯސިއޭޝަންގެ ކުރީގެ ޖެނެރަލް ސެކްރެޓަރީ، އިޝްފާން މުހައްމަދު (އިއްޕަ) އާއި ނުވަ ފަހަރު ގައުމީ ޗެމްޕިއަންކަން ހޯދާފައިވާ މުހައްމަދު އަޖުފާން (އަޖު) އެވެ. ރައީސް ކަމަށް ކުރިމަތިލުމަށް ފަހު، އަޖުފާން ވަނީ ގައުމީ ޓީމަށް ކުޅުން ހުއްޓާލަން ނިންމާފައިވާ ކަމަށް ހާމަކޮށްފަ އެވެ.
ބެޑްމިންޓަން އެސޯސިއޭޝަންގެ މިހާރުގެ ހިންގާ ބޯޑު އިންތިހާބު ކުރީ 2021 ވަަނަ އަހަރުގެ ފެބްރުއަރީ 24 ގަ އެވެ. އެ ހިންގާ ބޯޑު ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރީ، 2021، މާޗް 11 ގަ އެވެ. އެހެންކަމުން، މި މަހުގެ 11 އަށް މިހާރު އޮތް ބޯޑުގެ ދައުރު ވަނީ ހަމަވެފަ އެވެ.
