އެމްޕީއެލް އެފްއޭއެމް ދެ ވަނަ ޑިވިޝަން ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި، އިބްރާހިމް އިމްރާންގެ ހެޓްރިކާ އެކު، ލޮރެންޒޯ ސްޕޯޓްސް ކްލަބް އަތުން 5-1 އިން މޮޅުވެ، ލެގޫންސް ސްޕޯޓްސް ކްލަބުން ކުއާޓާ ފައިނަލުގެ ދެ ވަނަ ޖާގަ ހޯދައިފި އެވެ.
ލެގޫންސް، ކުއާޓާ ފައިނަލުން ފުރުސަތު ހޯދީ ގްރޫޕް ސީގެ ދެ ވަނަ ޓީމުގެ ގޮތުގަ އެވެ. އެ ގްރޫޕްގެ އެއް ވަނަ ލިބުނީ ކުޅުނު ހަތަރު މެޗުން މޮޅުވެ، 12 ޕޮއިންޓް ހޯދި ވިކްޓަރީ ސްޕޯޓްސް ކްލަބް އެވެ. ވިކްޓަރީ އަތުން ހަމައެކަނި ބަލިވި، ލެގޫންސް އަށް ވަނީ ހަތަރު މެޗުން ނުވަ ޕޮއިންޓް ލިބިފަ އެވެ. އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރޭގައި ހިމެނިގެން، މި ގްރޫޕްގެ ތިން ވަނަ ހޯދި، ކްލަބް ޕީކޭ ވެސް ވަނީ ކުއާޓާ އިން ފުރުސަތު ހޯދައިފަ އެވެ. ޕީކޭ އިން ވަނީ ހަަތަރު މެޗުން ހަ ޕޮއިންޓް ހޯދައިފަ އެވެ.
ހަތަރެއްގައި ނިންމާލި ލޮރެންޒޯ އަށް ވެސް މިއަދުގެ މެޗުން ތަފާތު ބޮޑުކޮށް މޮޅުވެގެން، ކުއާޓާ ފައިނަަލަށް ދެވެން އޮތެވެ. އެކަމަކު، އެ ޓީމު މުބާރާތް ނިންމާލީ ހަތަރު މެޗުން ތިން ޕޮއިންޓާ އެކު އެވެ. މި ގްރޫޕްގެ އެންމެ ފުލަށް ދިޔައީ ކުޅުނު ހަތަރު މެޗުން ވެސް ބަލިވި ބިސް ބުރު ސްޕޯޓްސް ކްލަބް އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި، ލެގޫންސް އިން ވަނީ ހަތަރު ވަަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ ހުސްކޮށް ލިބުނު ފުރުސަތެއްގައި ތިރިތިރިން ގޯލަށް ބޯޅަ ފޮނުވާލައިގެން އިމްރާން އެވެ. އޭނާ އެ ބޯޅަ ގޯލަށް ފޮނުވާލީ ލޮރެންޒޯގެ ކީޕަރު އަހުމަދު ނަވާޒަށް މާ ރަނގަޅު ފުރުސަތެއް ނުލިބޭ ގޮތަށެވެ.
ލެގޫންސްގެ ކުޅުންތެރިން ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އަބްދުﷲ އިޔާން / އަދަދު
މެޗުގެ 17 ވަނަ މިނިޓްގައި ލެގޫންސް ދެ ވަނަ ގޯލު ޖެހީ ވެސް އިމްރާން އެވެ. އޭނާ މި ލަނޑު ޖެހީ އޭރިއާތެރެއިން އެ ޓީމުގެ ރަޝިއާ ފޯވާޑް، ވްލަޑިސްލާވް ކޮރްމިޝިން ދިން ބޯޅައެއް ކޮންޓްރޯލް ކުރުމަށް ފަހު އެވެ. އަދި މެޗުގެ 35 ވަނަ މިނިޓްގައި ކޮރްމިޝިން ނަގައިދިން ހިލޭ ޖެހުމަކުން، އިމްރާން ވަނީ ބޮލުން ގޯލަށް ބޯޅަ ފޮނުވާލައި އޭނާގެ ހެޓްރިކް ފުރިހަމަކޮށްފަ އެވެ.
ލޮރެންޒޯ އިން ވަނީ މެޗުގެ 75 ވަނަ މިނިޓްގައި ލަނޑެއް ޖަހައިފަ އެވެ. މި ލަނޑު ޖެހީ، ނަސޫހު ސައީދު އެވެ. ނަސޫހު ބޯޅަ ހިފައިގެން އޭރިއާތެރެއަށް ވަދެ ފޮނުވާލި ބޯޅަ ގޯލުގެ މަތީ ކަނަށް އަމާޒުވީ ލެގޫންސްގެ ކީޕަރު، މުހައްމަދު އިމްރާން އަތްމަތިން ގޮހެވެ.
އޭގެ ފަހުން، މެޗުގެ 88 ވަނަ މިނިޓްގައި ލެގޫންސް އިން ވަނީ ހަތަރު ވަނަ ލަނޑެއް ކާމިޔާބުކޮށްފަ އެެވެ. މިއީ އޭރިއާތެެރެއިން ލިބުނު ފުރުސަތެއްގައި ގޯލުގެ މަތީ ކަނަށް ބޯޅަ ފޮނުވާލައިގެން، އަހުމަދު ރިފްޝާން އެވެ. އިތުރު ވަގުުތުގައި ލެގޫންސް އިން ފަސް ވަނަ ލަނޑު ޖެހިއިރު، މިއީ، އަހުމަދު މުހައްމަދު (އައްމަޑޭ) ދިން ބޯޅައަކަށް ހުސްކޮށް އަރައި، އަހުމަދު ރިޒްވާން އިސްމާއިލް ޖެހި ގޯލެކެވެ.
އެފްއޭއެމްގެ ފުރަތަމަ ޝެޑިއުލްގައި ކުއާޓާ ފައިނަލް މެޗުތައް ފަށާނީ ހަ ވަނަ ދުވަހު ކަމަށް ހާމަކުރި ނަމަވެސް ފަހުން ވަނީ ފަސް ވަނަ ދުވަހު ކުއާޓާ ފައިނަލްތައް ފަށަން ނިންމައިފަ އެވެ.
ކުއާޓާ ފައިނަލް މެޗުތައް:
މަސް އޮޑި ސްޕޯޓްސް ކްލަބް - ބީޖީ ސްޕޯޓްސް ކްލަބް (ފެބްރުއަރީ 5، 15:50)
ނިއު ރޭޑިއަންޓް ސްޕޯޓްސް ކްލަބް - ކްލަބް ޕީކޭ (ފެބްރުއަރީ 6، 15:50)
ވިކްޓަރީ ސްޕޯޓްސް ކްލަބް - ކުޑަހެންވޭރު ޔުނައިޓެޑް (ފެބްރުއަރީ 7، 15:50)
ލެގޫންސް ސްޕޯޓްސް ކްލަބް - ޓެންޓް ސްޕޯޓްސް ކްލަބް (ފެބްރުއަރީ 8، 15:50)
