ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިލެކްޓޯރަލް ކޯޑުގައި ހިމެނޭ އިންތިހާބާ ގުޅޭ ކޮމިޓީތައް ފާސްކުރަން، މި މަހު އަށް ވަނަ ދުވަހު އެފްއޭއެމްގެ އެކްސްޓްރާ އޯޑިނަރީ ކޮންގްރެސް އެއް ބާއްވަން ޝެޑިއުލްކޮށްފި އެވެ.
މި ކޮމިޓީތަކަކީ، 2020 ވަނަ އަހަރުގެ ޖުލައި މަހު އެފްއޭއެމްގެ ރައީސްގެ މަގާމަށް ބައްސާމް އަދީލް ޖަލީލް އިތުރު ދައުރަކަށް އިންތިހާބުވިއިރު، އުފައްދަން ޖެހޭ ކޮމިޓީތަކެކެވެ. މީގެ ތެރެއިން އިލެކްޓޯރަލް ކޮމިޓީ ފާސްކޮށްފައި އޮތީ އަސާސީ ގަވާއިދާ ހިލާފަށެވެ. އިލެކްޓޯރަލް އެޕީލް ކޮމިޓީއެއް އުފައްދައިފައި ވެސް ނެތެވެ.
އިއްޔެ ބާއްވަން އުޅުނު އެފްއޭއެމްގެ އިންތިހާބުގެ ކަންކަން ފީފާ އާއި އޭއެފްސީން ހުއްޓުވީ ވެސް އިންތިހާބުގެ ކަންކަން ކުރަން އޮތް އިލެކްޓޯރަލް ކޮމިޓީ އާއި އިލެކްޓޯރަލް އެޕީލް ކޮމިޓީ އެކުލަވާލާފައި އޮތީ ގަވާއިދާ ހިލާފަށް ކަމަށްވާތީ އެވެ. މިކަން ހާމަވީ، އެޕީލް މަރުހަލާއެއްގެ ތެރެއިންނެވެ.
އެފްއޭއެމްގައި ކުރިން އޮތް، އިލެކްޓޯރަލް ކޮމިޓީން، ވަނީ ވެލެންސިއާ އިން، އެފްއޭއެމްގެ އިންތިހާބުގައި ވާދަކުރި ދެ ކެންޑިޑޭޓުންނަށް (ކުރީގެ ރައީސް އަހުމަދު ތޯރިގު (ޓޮމް) އާއި އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އަށް) ވެސް ތާއީދު ސިޓީ ދީފައި އޮތުމުން ދެ ސިޓީ ވެސް ކެންސަލްކޮށްފަ އެވެ.
ވެލެންސިއާގެ ސިޓީ ކެންސަލްކުރުމުން، ތޯރިގުގެ ކެންޑިޑެސީ އަށް ބޭނުންވާ ފުރަތަމަ ޑިވިޝަނުގެ ތާއީދު (މަދުވެގެން ފުރަތަމަ ޑިވިޝަންގެ ތިން ކްލަބްގެ ތާއީދު) އަދަދު ހަމަނުވާތީ، އިލެކްޓޯރަލް ކޮމިޓީން ނިންމީ ތޯރިގުގެ ކެންޑިޑެސީ ބާތިލް ކަމަށެވެ. އިލެކްޓޯރަލް ކޮމިޓީގެ މި ނިންމުން އެޕީލް ކުރަން ތޯރިގު ހުށަހެޅިއިރު، އިލެކްޓޯރަލް އެޕީލް ކޮމީޓީއެއް ނެތެވެ. މި މައްސަލަ، މިހެން އޮތުމުން، ތޯރިގު އާއި އެފްއޭއެމް އިން ލަފަޔަކަށް އެދުމުން، ފީފާ/އޭއެފްސީ އިން އަންގާފައިވަނީ، ކުރިން ކުރި އިންތިހާބުގެ ކަންކަން ކެންސަލްކޮށް، އަލުން ކޮމިޓީތައް އެކުލަވާލައިގެން، ކަންކަން ކުރުމަށެވެ.
ފީފާ އާއި އޭއެފްސީގެ އެންގުމަށް ބޯލަނބައި، އެފްއޭއެމްގެ ހިންގާ ކޮމިޓީން ބޭއްވި ބައްދަލުވުމަށް ފަހު، އެކްސްޓްރާ އޯޑިނަރީ ކޮންގްރެސް އަކަށް ދިއުމަށް ނިންމީ އެވެ. މިހާރު އެ ބައްދަލުވުން ތާވަލުކޮށްފައި އޮތީ، މި މަހު 8 ވަނަ ދުވަހަށެެވެ.
މިކަން ހާމަކުރަން އެފްއޭއެމް އިން ނެރުނު ބަޔާނުގައި ބުނެފައިވަނީ، ކޮންގްރެސްގެ ހާއްސަ ޖަލްސާގެ އެޖެންޑާ އެސޯސިއޭޝަންގެ މެމްބަރުންނާ ހިއްސާކޮށްފައިވާނެ ކަމަށެވެ.
އެފްއޭއެމް އިން އެކްސްޓްރާ އޯޑިނަރީ ކޮންގްރެސް އެއް ބާއްވާއިރު،، 10 ކްލަބްގެ ތާއީދާ އެކު، މާޒިޔާ ސްޕޯޓްސް އެންޑް ރެކްރިއޭޝަނުން ވެސް ވަނީ އެފްއޭއެމްގެ އެކްސްޓްރާ އޯޑިނަރީ ކޮންގްރެސް އެއް ބާއްވަން ހުށަހަޅައިފަ އެވެ.
މީގެ 15 ދުވަސް ކުރިން، މާޒިޔާ އިސްވެ، އޮވެ، އެކްސްޓްރާ އޯޑިނަރީ ކޮންގްރެސް އަކަށް ގޮވާލިއިރު، ފާހަގަކޮށްފައިވާ ކަންކަމަކީ، އެފްއޭއެމް އިދާރީ ގޮތުން ހިންގުމުގައި ހުންނަން އަސާސީ ގަވާއިދު ލާޒިމް ކުރާ ކޮމިޓީތައް ނެތުމާއި، އުސޫލާޚިލާފަށް ބައެއް ކޮމިޓީތައް އެކުލަވާލެވިފައިވާތީއާއި ،ބައެއް މީހުން އިސްތިއުފާދީފައިވާތީއާ އެކު، އެ އިދާރާ މުއައްސަސާއެއްގެ ގޮތުގައި ހިންގަން ހުންނަންޖެހޭ ކޮމިޓީތައް އެކުލަވާލުމަށްޓަކައި އެކަށީގެންވާ ތާއީދާ އެކު، އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް އެދޭ ކަމަށެވެ.
މާޒިޔާ އިން މި ކަންކަން ހުށަހެޅީ އެފްއޭއެމްގެ މެމްބަރު 18 ކްލަބްގެ ތެރެެއިން 10 ކްލަބްގެ ތާއީދާ އެކު އެވެ.
