މިރޭ ސަރުކާރުން ބޭއްވި ރަސްމީ ޖަލްސާއެއްގައި ވާހަކަ ދައްކަވަމުން ގެންދަވަނިކޮށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވާހަކަފުޅުގެ މެދުތެރެއިން "ޓެކްނިކަލް މައްސަލައެއް" ޖެހިގެން ވާހަކަ ނުދައްކަވާ ފަސް މިނެޓު ހުންނެވުމުން، ޖަލްސާގެ ލައިވް ކަނޑާލަންޖެހިއްޖެ އެވެ.
ލޯކަލް ކައުންސިލްތަކަށް ސަރުކާރުން ދޭ "ކަންގަތި އެވޯޑް" ޖަލްސާއަށް ރައީސް މުއިއްޒު ވަޑައިގަތީ އެ ޖަލްސާގެ ޝަރަފުވެރި މެހެމާނުގެ ހައިސިއްޔަތުންނެވެ. އެ ޖަލްސާގައި ވާހަކަ ދައްކަވަން ފެއްޓެވުމަށްފަހު އަށް މިިނެޓާއި 13 ސިކުންތު ފަހުން ރައީސްގެ ވާހަކަ މެދުކެނޑުނެވެ.
އިރުކޮޅެއް ހުންނެވުމަށްފަހު ރައީސް ވިދާޅުވީ "މާފު ކުރައްވާ، ކުޑަކުޑަ ޓެކްނިކަލް މައްސަލައެއް، މިކަހަލަ ނިޒާމެއްގައި ދިމާވެދާނެ" ކަމަށެވެ. ވާހަަކަ ނުދައްކަވާ ޕޯޑިއަމް ކައިރީ ރައީސް ފަސް މިނެޓާއި 15 ސިކުންތު ހުންނެެވި އެވެ. އޭގެ ފަހުން ޖަލްސާގެ ލައިވް ކަނޑާލީ އެވެ.
އަލުން ޖަލްސާ ދައްކަން ފެށިއިރު ވާހަކަ ދައްކަނީ އެހެން ބޭފުޅެކެވެ. ނަމަވެސް ފަހުން ރައީސް ވަނީ އެމަނިކުފާނުގެ ތަގުރީރުގެ ބާކީ ބައި ފުރިހަމަކުރައްވައިފަ އެވެ.
މިރޭގެ ވާހަކައިގައި ރައީސް ވަނީ ބޯހިޔާވަހިކަމުގެ މައްސަލަ ހައްލު ކުރުމަށް ސަރުކާރުން ގެންގުޅޭ ސިޔާސަތާ ގުޅޭ ގޮތުން ވާހަކަ ދައްކަވައިފަ އެވެ. އަދި ސަރުކާރުން އެދުނު ގޮތަށް ފުށިދިއްގަރުފަޅު ހިއްކުމުގެ މަޝްރޫއަށް ކަނޑައަޅައިދޭން އެދުނު ބަޖެޓު ރައްޔިތުންގެ މަޖިލީހުން އުނި ކުރުމުން އެކަމުގެ ކަންބޮޑުވުން ވެސް ރައީސް ފާޅުކުރެއްވި އެވެ.
"އަޅުގަނޑުގެ މަގުސަދަކީ ގެދޮރުގެ ދަތިކަމުން އެންމެ އެންމެ ދިވެއްސަކު ވެސް ކަރުނައެއް އަޅަން ނުޖެހޭނެ ޒަމާނެއް ދިވެހީންނަށް ގެނެސްދިނުން. އެންމެ ޒަމާނީ ސިޓީތަކަށް ދިވެހީންގެ އާ ޖީލުގެ ދިރިއުޅުން ބަދަލުކޮށްލުން. ދެން ތިޔަ ބޭފުޅުން ހުރިހައި ދިވެހި ރައްޔިތުން ވިސްނަވާ. މި ކަންކަން ކުރެވޭނީ ބަޖެޓު ލިބިގެން. ފައިސާ ލިބިގެން. އެކަމަކު މި ފަދަ ފުން ހައްސާސީ މައްސަލައަކަށް ހިމެނިފައިވާ ބަޖެޓު އޮތް ގޮތަށް އުނިކޮށްލުމަކީ ކޮންފަދަ ކަމެއްތޯ،" ރައީސް ވިދާޅުވި އެވެ.
