ޕީޕީއެމްގެ މެމްބަރުންގެ ގޮތުގައި ތިބި ބައެއް ސަޕޯޓަރުން އެ ޕާޓީން ޕީއެންސީއަށް ސޮއި ދީފައި އެބަ ހުރި ކަމަށާއި އެއީ އަމިއްލަ އިހުތިޔާރުގައި އެ ގޮތް ބޭނުންވެގެން ބަދަލުވެފައިވާ ސަޕޯޓަރުން ކަމަށް، ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރެއްވި ފަހުން، ޕީޕީއެމް/ޕީއެންސީގެ ލީޑަރަކަށް ހުންނެވި ކުރީގެ ރައީސް އަބްދުﷲ ޔާމީނާ ދެމެދު ޖެހުނު އެންމެ ބޮޑު އެއް މައްސަލައަކީ ޔާމީން އޭރު ނިސްބަތްވާ ޕީޕީއެމުން ޕީއެންސީއަށް މެންބަރުން ބަދަލު ކުރަމުން ދިޔުމެވެ.
ޔާމީންގެ ޝަކުވާއަކަށްވީ، ޕީޕީއެމްގެ ހިންގުން ހުއްޓުވާފައި ބޭއްވުމެވެ. އެ ކަން ނިމުމަކަށް ގެންނަން ވެގެން ޕާޓީ ހިންގަން ކޮމިޓީއެއް ވެސް ނެންގެވި އެވެ. ނަމަވެސް ކޮމިޓީ ހިންގަން އިސްކޮށް ހުންނެވި މުހައްމަދު މަލީހު ޖަމާލު ޕާޓީން ވަކިކުރުމުން، ޔާމީން މިހާރު ވަނީ ޕީޕީއެމް ދޫކޮށްލައްވައިފަ އެވެ.
ޔާމީން ޕީޕީއެމް ދޫކޮށްލެއްވިކަން އިއުލާން ކުރެއްވުމުގެ ކުރިން ޝިޔާމް "އަދަދު" ނޫހަށް ދެއްވި ހާއްސަ އިންޓަވިއުއެއްގައި ވިދާޅުވީ ޕީޕީއެމްގެ މެންބަރުން ޕީއެންސީއަށް ބަދަލު ކުރުމުގެ ވިސްނުމެއް ބަހައްޓައިގެން އެފަދަ އެއްވެސް މަސައްކަތެއް ހިނގަމުން ނުދާ ކަމަށެވެ.
ރައީސުލްޖުމްހޫރިއްޔާ ވެސް އެބަ އޮތް ވިދާޅުވެފަ. ޕީޕީއެމުންނެއް ނޫން، އެހެން ޕާޓީތަކުން ޕީއެންސީއަށް މެންބަރުން ގެނައުމޭ ފޯކަސްގައި އޮތީ،" ރައީސް މުއިއްޒުގެ ސަރުކާރުގެ ފިޝަރީޒް މިނިސްޓަރަކަށް ވެސް ހުންނެވި ޝިޔާމް ވިދާޅުވީ އެވެ.
ޕީޕީއެމުން ޕީއެންސީއަށް ބައެއް މެންބަރުން ވަންނަމުންދާ ކަން އެނގެ އެވެ. މި ފަހުން ވެސް ބައެއް ކައުންސިލްތަކުގައި ތިބި ޕީޕީއެމްއަށް ނިސްބަތްވާ ކައުންސިލަރުން ވަނީ ޕީއެންސީއަށް ވެސް ބަދަލުވެފަ އެވެ. ޝިޔާމް ވިދާޅުވީ އެއީ އެ ގޮތަށް ބޭނުންވެގެން ބަދަލުވާ މެންބަރުން ކަމަށެވެ.
"އެހެންވިޔަސް ވާނެ ގޮތަކީ ޕީޕީއެމްގެ މެންބަރަކު، ޕީއެންސީއަށް ބަދަލު ވަންޏާ، އެއްވެސް ގާނޫނަކުން ވެސް މަނާ ކުރަމެއް ނޫން ވީމަ، ހުއްޓުވޭނެ ކަމެއް ނޫން،" ޝިޔާމް ވިދާޅުވި އެވެ.
ޕީއެންސީ/ޕީޕީއެމްއަކީ އެއް ސިޔާސީ ފިކުރެއްގެ ދެ ޕާޓީއަކަށް ވުމުން އެއީ މައްސަލައަކަށް ވެސް ވެގެން ނުވާނެ ކަމަށް ޝިޔާމް ވިދާޅުވި އެވެ. އަދި އެ އިއްތިހާދުގެ ސަރުކާރުގެ ރައީސް ނިސްބަތްވާ ޕާޓީގައި ގިނަ އަދަދެއްގެ މެންބަރުން ތިބުމަކީ މުހިންމު ކަމެއް ކަމަށް ވެސް އޭނާ ވިދާޅުވި އެެވެ.
"ރައީސުލްޖުމްހޫރިއްޔާ ނިސްބަތްވާ ޕީއެންސީ، ޕާޓީގައި މަދުވެގެން 15،000 މީހުން ތިބެން ވާނެ، އެ ކަމުގައި އަޅުގަނޑުމެންގެ އެއް ފިކުރެއްގެ ކޯލިޝަނަކަށް ވާތީވެ މެންބަރުން އިތުރު ކުރަން އެއްބާރު ލުން ދެވޭނެ،" ޝިޔާމް ވިދާޅުވި އެވެ.
ޕީޕީއެމް ނުހިނގާ ކަމަށް ދެކެވޭ ވާހަކަތައް އޭނާ ދޮގު ކުރެއްވި އެވެ. ސަރުކާރު ހިންގުމުގެ ފޯކަސް ބޮޑުކޮށް، ކުރިއާލައި ނަތީޖާތަކެއް ނެރުމަކީ ވެސް ޕާޓީ ހިންގުމާ ގުޅުން ހުރި ކަންކަން ކަމަށް ވެސް އޭނާ ވިދާޅުވި އެވެ.
"ޕާޓީ ނުހިނގަނީކީ ވެސް ނޫން، ދެ ޕާޓީ ވެސް އެބަ ހިނގާ، ދެ ޕާޓީއަށް ވެސް މެންބަރުން އެބަ ވަދޭ، ޕީޕީއެމަށް ވެސް އެބަ ވަދޭ، ޕީއެންސީއަށް ވެސް އެބަ މީހުން ވަދޭ،" ޝިޔާމް ވިދާޅުވި އެވެ.
ޕީއެންސީގެ ފަސްފަހަތް
ޕީއެންސީ/ޕީޕީއެމަކީ ދެ ޕާޓީއެއް ނަމަވެސް ޖޮއިންޓް ކައުންސިލެއް އޮވެގެން އެއް ޕާޓީއެއްގެ ގޮތުގައި ހަރަކާތްތެރިވަމުން އަންނަ ކޯލިޝަނެކެވެ. ދެ ޕާޓީގެ ވެސް ލީޑަރަކަށް މިވީހާތަނަށް ހުންނެވީ ޔާމީނެވެ.
ޕީޕީއެމަކީ ޔާމީނުގެ ބޭބޭފުޅު އަދި ކުރީގެ ރައީސް މައުމޫން އަބްދުލްގައްޔޫމް އިސްވެ އުފެއްދެވި ޕާޓީއެކެވެ. ޔާމީނުގެ ވެރިކަމުގައި ދެބެއިންގެ ދެމެދު އުފެދުނު ހިޔާލުތަފާތުވުންތަކަށް ފަހު، ޕާޓީގެ ސުލޫކީ ކޮމިޓީން މައުމޫން ޕާޓީގެ މެންބަރު ކަމުން ވަކިކުރީ އެވެ.
އޭރު މެންބަރަކު ޝަރީއަތަށް ދިޔައީ މައުމޫން ވަކިކުރީ އިޖުރާއަތްތަކާ ހިލާފަށް ކަމަށް ބުނެ އެވެ. އަދި ޔާމީނަށް ޕާޓީގެ ލީޑަރުކަން ދިނީ ގޯސްކޮށް ކަމަށް ބުނެ އެވެ. އަދި ޕީޕީއެމް އަނބުރާ މައުމޫނަށް ރައްދު ކޮށްދިނުމަކީ އޭރުގެ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
ޕީއެންސީއަކީ އޭރު ޝަރީއަތުގައި އޮތް މައްސަލަ ނިމިގެންދާ ގޮތަކުން ޕީޕީއެމްގެ ބާރު ޔާމީނަށް ގެއްލިދާނެ ކަމުގެ ބިރުވެރިކަން އޮތުމުން އެ ހާލަތަކަށް ތައްޔާރުވުމުގެ ގޮތުން އުފެއްދި ބެކްއަޕް ޕާޓީއެކެވެ.
އޭގެ ފަހުން މި އަހަރުގެ ރިޔާސީ އިންތިހާބުގައި ޕީއެންސީ/ޕީޕީއެމުން ވާދަކުރާނެ ކެންޑިޑޭޓެއްގެ ގޮތުގައި ފުރަތަމަ ނިންމެވީ ވެސް ޔާމީނެވެ. ނަމަވެސް އެމަނިކުފާނުގެ މައްޗަށް އިއްވާފައިވާ ޖަލު ހުކުމެއް އޮތުމުން ވާދަނުކުރެވޭނެ ކަމަށް ސުޕްރީމް ކޯޓުން ކަނޑައެޅި އެވެ.
ޔާމީނަށް ވާދަނުކުރެވޭ ހާލަތަށް ތައްޔާރުވުމުގެ ގޮތުން ވެސް ބެކްއަޕް ޕާޓީ، ޕީއެންސީން ކެންޑިޑޭޓެއް ނެރުމަށް ނިންމެވި އެވެ. ޕީއެންސީގެ ކެންޑިޑޭޓު މުއިއްޒަކީ އެއިރު ޔާމީނަށް ވާދަނުކުރެވޭނެ ހާލަތަކަށް ތައްޔާރުވި ބެކްއަޕް ކެންޑިޑޭޓެކެވެ.
ރައީސް މުއިއްޒު ރިޔާސީ އިންތިހާބު ކާމިޔާބުވި ފަހުން ޕީއެންސީއަށް މެންބަރުން އިތުރު ކުރުމުގެ މަސައްކަތް ފެއްޓެވި އެވެ. ކާނިވާ ސަރަހައްދުގައި ޕީއެންސީއަށް ވަކި ހާއްސަ އޮފީހެއް ވެސް ވަނީ ގާއިމުކޮށްފަ އެވެ. އަދި ޕީއެންސީގެ ރައީސްގެ މަގާމަށް މުއިއްޒު އައްޔަން ކުރި އެވެ.
ޔާމީނާއި މުއިއްޒުއާ ދެމެދު އުފެދުނު ހިޔާލުތަފާތުވުންތަކަށް ފަހު މިހާރު ޔާމީން ގެންދަވަނީ މުޅީން އާ ސިޔާސީ ޕާޓީއެއް އުފެއްދެވުމުގެ މަސައްކަތް ކުރައްވަމުންނެވެ. މާދަމާ އެ ޕާޓީ އުފެއްދުމުގެ ހުއްދައަށް އިލެކްޝަންސް ކޮމިޝަނުގައި އެދޭނެ ކަމަށް އެ ކަމުގައި އިސްކޮށް ހަރަކާތްތެރިވާ ޓީމުން ބުނެފައިވެ އެވެ.
