ޕޮލިސް ބޯޑުގައި ކުރިން ތިއްބެވި ބައެއް މެމްބަރުން ވަކިކޮށް އެ ބޯޑަށް ރައީސް ޑރ. މުހައްމަދު މުއިއްޒު އާ މެމްބަރުން ހަމަޖައްސަވައިފި އެވެ.
ވަކި ކުރީ ކުރިން އެ ބޯޑުގައި ތިއްބެވި އަހުމަދު ޝަރީފާއި އަލީ ނަސީރު ގާސިމް އާއި އަހުމަދު އަޒީމް އާއި އަހުމަދު ސައީދެވެ. އަލަށް އައްޔަން ކުރީ، މ. ހަޒާރީވިލާ، އަހުމަދު ފަޔާޒް އާއި ލަންކާ ސަފީރަކަށް ހުންނެވި އަލީ ފާއިޒް އާއި މއ. ގޯލްޑަން މޫން، އަހުމަދު ނާޝިދާއި ގ. ޑިމްލައިޓް، އާދަމް އިބްރާހިމެވެ.
އަލަށް އައްޔަނު ކުރީ ރައީސް އައްޔަން ކުރައްވަންޖެހޭ މެމްބަރަކާއި މިނިސްޓަރުގެ ލަފާގެ މަތިން ރައީސް އައްޔަން ކުރަންޖެހޭ، ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ މަގާމަށް ތިން މެމްބަރުންނެވެ.
އޭގެ އިތުރުން ދެން ބޯޑުގައި ހިމެނެނެނީ، ރައީސް އައްޔަން ކުރައްވާ މަގާމުގައި ކުރިން ވެސް ހުންނެވި އައިޝަތު ނޫރާ މުހައްމަދާއި އާންމު ރައްޔިތުންގެ ތެރެއިން ހޮވާފައިވާ ކުރީގެ މަޖިލީހުގެ މެމްބަރު ހާމިދު އަބްދުލްގަފޫރާއި ވަކީލުން ފަރާތުން ހޮވާފައިވާ ސަފާ ޝަރީފެވެ.
