ކަނޑުގެ ލޮނުގަނޑު އުފުލި ދިވެހިރާއްޖެ އަޑިއަށް ހިނގައިދާނެ ކަމަށް ގަބޫލުނުކުރައްވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު 'އަލް ޖަޒީރާ' ގައި ވިދާޅުވި ބަހުގެ މުރާދަކީ އެއީ ނޫން ކަމަށާއި މޫސުމީ ބަދަލުތަކުގެ އަސަރު ރާއްޖެ އަށް ކުރާކަން އެމަނިކުފާނު ގަބޫލުކުރައްވާ ކަމަށް ތަރުޖަމާނު މުހައްމަދު ފިރްޒުލް އަބްދުﷲ ހަލީލް މިއަދު ވިދާޅުވެއްޖެ އެވެ.
ރާއްޖޭގެ ރައީސްކަމަށް އިންތިހާބުވެވަޑައިގެން ފަހުން މުއިއްޒު ބޭރުގެ މީޑިއާއަކަށް ދެއްވި ފުރަތަމަ އިންޓަވިއުގައި، މޫސުމީ ބަދަލުތަކުގެ ސަބަބުން ރާއްޖެ އަށް އެންމެ ބޮޑަށް ކޮށްފާނެ ކަމަށް ބެލެވޭ ގެއްލުން ނަފީކުރެއްވުމާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ. އަދި ތިމާވެށީގެ މައްސަލަތަކުގައި ބައިނަލްއަގްވާމީ މައިދާނުގައި ރާއްޖޭން ގެންގުޅޭ އަޑުހަރު ސިޔާސަތު އާ ސަރުކާރާ އެކު ބަދަލުވުމުގެ ކަންބޮޑުވުން ބައެއް މީހުން ފާޅުކުރި އެވެ.
އިންގާލީ މަރުހަލާގެ ތަފްސީލުތައް ދެއްވުމަށް ފިރްޒުލް ބާއްވަވާ ސިލްސިލާ ނޫސްވެރިންގެ ބައްދަލުވުމުގައި މިއަދު އެ ސުވާލު އަމާޒުވުމުން އޭނާ ވިދާޅުވީ، މޫސުމީ ބަދަލުތަކުގެ ސަބަބުން ރާއްޖެ އަށް ހުރި ގޮންޖެހުންތަކާއި، އެކަމަށް ތައްޔާރުވާން ކުރަން ޖެހޭ މަސައްކަތްތައް ހުރިކަން މުއިއްޒު ގަބޫލުކުރައްވަވާ ކަމަށާއި އެކަން އެ އިންޓަވިއުގައި ވެސް ފާހަގަކުރެއްވި ކަމަށެވެ.
"އަޅުގަނޑަށް ހީވަނީ އިންތިހާބީ ރައީސް ދެއްކެވި ވާހަކައެއް މަހްފުމޫން ބޭރުން މާނަކުރެވުނީމާ ހެން އެ ގޮތަށް މާނަކުރެވުނީ،" ފިރްޒުލް ވިދާޅުވި އެވެ.
ރާއްޖެ އަޑިއަށް ދާނެ ކަމަށް ގަބޫލުނުކުރައްވާ ކަމަށް މުއިއްޒު ވިދާޅުވީ، ފިރްޒުލް އިޝާރާތްކުރެއްވި ގޮތުގައި ތިމާވެށީގެ މައްސަލަތަކާ އެކު ވެސް، ރާއްޖެ މިދިޔަ ޒަމާންތަކުގައި ގައުމެއްގެ ގޮތުގައި އަދި ދައުލަތެއްގެ ގޮތުގައި ދެމި އޮތް ގޮތަށް އޮންނާނެ ކަމުގެ ޔަގީންކަން ދެއްވުމަށެވެ. އަދި އެއީ ރާއްޖެ ނެތިދާނެކަމުގެ ބިރުގައި ބޭރުގެ އިންވެސްޓަރުން ނާންނާނެ ކަމަށް ވާހަކަ ދެކެވޭތީ، އެ ފަދަ ފަރާތްތައް ރާއްޖެ އަށް ގެނައުމުގެ މިސްރާބަށް މަސައްކަތްކުރާނެކަމުގެ ޔަގީންކަން ދެއްވުމުގެ ބޭނުމުގައި ވިދާޅުވި ބަސްފުޅެއް ކަމަށް ވެސް ފިރްޒުލް އިޝާރާތްކުރެއްވި އެވެ.
"އިންތިހާބީ ރައީސް ވިދާޅުވި ރާއްޖެ އަކީ ބޮޑެތި އިގްތިސާދުތަކުގެ އަމަލުތަކުގެ ސަބަބުން ތިމާވެށީގެ މައްސަލަތަކުގައި ވިކްޓިމައިޒްވެފައި ތިބި ބައެއް ކަމަށް. އަދި ކާބަން ނިއުޓްރަލް ގައުމަކަށް ރާއްޖެ ހެދުމުގެ މަގަށް ކުރާ މަސައްކަތް ބައްޓަން ކުރަން ގެންގުޅޭނެ ސިޔާސަތުގެ ވާހަކަ ވެސް ވިދާޅުވެދެއްވި،" ފިރްޒުލް ވިދާޅުވި އެވެ.
"އެހެންކަމުން އިންތިހާބީ ރައީސް ތިމާވެށީގެ ބަދަލުތަކާއި ލިބޭ ގެއްލުންތައް ގަބޫލުފުޅުނުކުރައްވާ ކަމަށް މާނަކުރުމުގެ ޖާގައެއް އޮތް ކަމަށް ނުދެކެން."
