އިންތިހާބީ ރައީސް ޑރ. މުހައްމަދު މުއިއްޒު ގެންދަވަނީ ކުރީގެ ރައީސް އަބްދުﷲ ޔާމީންގެ މަޝްވަރާ އާއި ލަފާ ހޯއްދަވަމުން ކަމަށާއި ނަމަވެސް އެންމެ އެދެވޭ ވަރަށް އެެކަން ނުކުރެވޭ ކަމަށް އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް މިއަދު ވިދާޅުވެއްޖެ އެވެ.
ރިޔާސީ އިންތިހާބަށް ޕީޕީއެމް/ޕީއެންސީން ފުރަތަމަ ނިންމި ކެންޑިޑޭޓަކީ ވެސް އެ ކޯލިޝަންގެ ލީޑަރު ޔާމީނެވެ. ނަމަވެސް ޔާމީނަށް އިންތިހާބުގައި ވާދަނުކުރެވުނީ އެމަނިކުފާނުގެ މައްޗަށް އިއްވާފައިވާ 11 އަހަރުގެ ޖަލު ހުކުމް ދެމިއޮތުމުން ވާދަނުކުރެވޭނެ ކަން ސުޕްރީމް ކޯޓުން ކަނޑައެޅުމުންނެވެ.
ޑރ. މުއިއްޒަކީ، ޔާމީނަށް ވާދަނުކުރެވޭ ހާލަތެއްގައި އިންތިހާބަށް ނެރެން ހަމަޖެއްސި ކޯލިޝަންގެ މައިނޯރިޓީ ޕާޓީ ކަމަށްވާ ޕީއެންސީން ކަނޑައަޅާފައިވާ ބެކްއަޕް ކެންޑިޑޭޓެކެވެ.
އިންތިހާބީ ރައީސްގެ ތަރުޖަމާނު ފިރުޒުލް ކޮންމެ ދުވަހަކު ބާއްވަވާ ނޫސްވެރިންގެ ބައްދަލުވުމުގެ ތެރެއިން މިއަދުގެ ބައްދަލުވުމުގައި ނޫސްވެރިޔަކު ޔާމީނާއި މުއިއްޒާ ދެމެދު އެއްވެސް ހިތްހަމަނުޖެހުމެއް އޮތްތޯ ސުވާލު ކުރި އެވެ. އޭގެ ޖަވާބުގައި ފިރުޒުލް ވިދާޅުވީ އެއްވެސް ހިތްހަމަނުޖެހުމެއް ނެތް ކަމަށާއި ސަރުކާރު އެކުލަވާލުމުގެ މަސައްކަތް ހިނގަނީ ޔާމީނުގެ މަޝްވަރާއި ލަފާ ހޯއްދަވައިގެން ކަމަށެވެ.
"އެއްވެސް މައްސަލައެއް ނެތް، އެންމެ އެދިވަޑައިގަންނަވާ ގޮތަށް މަޝްވަރާ ކުރައްވަން ފުރުސަތު ލިބިވަޑައިނުގަންނަވާ ކަމަށް، އެ ކަމުގެ މައިގަނޑު ސަބަބަކީ ގާނޫނީ ހާލަތު، އަދި އިންތިގާލީ މަސައްކަތްތަކުގައި އިންތިހާބީ ރައީސް ބުރަ ޝެޑިއުލް،" ފިރުޒުލް ތަފުސީލުކޮށްދެއްވި އެވެ.
ފިރުޒުލް މިހެން ވިދާޅުވިއިރު އިންތިހާބީ ރައީސް މުއިއްޒު ވަނީ ޔާމީން މިނިވަން ކުރުމުގެ މަސައްކަތް ކުރައްވާނެ ކަމުގެ ޔަގީންކަން ސަޕޯޓަރުންނަށް ދެއްވައިފަ އެވެ. ނަމަވެސް މަގުމަތީގައި މުޒާހަރާ ނުކުރުމަށާއި ގައުމު ހަލަބޮލިވާނެ އެއްވެސް ކަމެއް ނުކުރުމަށް ސަޕޯޓަރުންގެ ކިބައިން އިންތިހާބީ ރައީސް އިލްތިމާސްކުރެއްވި އެވެ.
އެކަމަކު، ޔާމީނުގެ ސަޕޯޓަރުން އޭގެ ފަހުން ވެސް އެމަނިކުފާނުގެ ގެކޮޅު ކައިރިއަށް އެއްވެ ޔާމީން މިނިވަން ކުރުމަށް ގޮވާލާފައިވެ އެވެ. އަދި ޔާމީން ވެސް ވަނީ އެއިން ރެއެއްގައި ކުޑަދޮރު ކައިރި ހުންނަވައިގެން ސަޕޯޓަރުންނާ ވާހަކަ ދައްކަވައިފަ އެވެ.
ސަޕޯޓަރުންނާ ވާހަކަ ދައްކަވަމުން ޔާމީން ވިދާޅުވެފައިވަނީ އާ ސަރުކާރު އެކުލަވާލެވިފައި ވަނީ އެމަނިކުފާނާއި އާންމު ސަޕޯޓަރުންގެ އެތައް މަސައްކަތަކުން ކަމަށެވެ. އަދި އެމަނިކުފާނު މިނިވަން ކުރުމަށް މަގުމަތީގައި އުޅެން، މަގާމުތަކަށް ލިބުނު މީހުންގެ އެ ހިތްވަރު ހުންނަވާން ޖެހޭ ކަމަށް ވިދާޅުވެފަ އެވެ.
"އިންސާނީ ތޮބީއަތުގައި ދެރަ ކަމަކަށް މި ވަނީ މަގާމުތަކަށް އައިމަ ހަނދާން ނެތޭތީ،" ވަކި ބޭފުޅެއްގެ ނަން ފާހަގަ ނުކުރައްވައި ޔާމީން ވިދާޅުވި އެވެ. ނަމަވެސް ބެލެވޭ ގޮތުގައި އެ މަނިކުފާނު އިޝާރާތް ކުރެއްވީ އިންތިހާބީ ސަރުކާރުގެ އިސް ވެރިންނަށެވެ.
ކުރިއަށް އޮތް ރައްޔިތުންގެ މަޖިލީހަށް ޝައުގުވެރިވެގެން އަންނަ ބޭފުޅުންކީ އެ މަނިކުފާނު މިނިވަން ކުރުމުގެ މަސައްކަތުގައި ސަޕޯޓަރުންނާއެކު ބައިވެރިވި ބައެއްތޯ ބެއްލެވުމަށާއި، ބައިވެރި ނުވާނަމަ ނުވީ ކީއްވެގެންތޯ އާއި އެ ދުވަހު ފިނި ކޮޓަރިތަކުގައި އެ ބޭފުޅުން ތިއްބެވީ ކީއްވެގެންތޯ ސުވާލު ކުރުމަށް ޔާމީން އެދިވަޑައިގަތެވެ.
ޔާމީނު މިިނިވަންވާނީ އެމަނިކުފާނަށް ކޮށްފައިވާ ހުކުމް ހައިކޯޓުން ބާތިލުކުރުމުން ކަަމަށް މުއިއްޒު ވަނީ ނުސީދާކޮށް ވިދާޅުވެފަ އެވެ. އެމަނިކުފާނު ވިދާޅުވީ ނޮވެމްބަރު 17، އާ ހިސާބަށް ދާއިރު ރައީސް ޔާމީނު މިނިވަން ވެވަޑައިނުގަންނަވާ ނަމަ އެއީ ކޯޓުތަކަށް ސަރުކާރުގެ ނުފޫޒު އޮތުމުގެ ސަބަބުންވާ ކަމެއް ކަމަށެވެ.
"އަަޅުގަނޑު މި ދަންނަވަނީ [ނޮވެމްބަރު] 17 ވަނަ ދުވަހާ ހަމައަށް ދާއިރު ގައި މިހާރު އޮތް ޕްރޮސެސް އިން [ހައިކޯޓުގައި ކުރިއަށްދާ އިސްތިއުނާފުގެ ޝަރީއަތުން] އެމަނިކުފާނު މިނިވަން ނުވާ ނަމަ މިނިވަން ނުވާނީ ސަރުކާރުން ނުފޫޒު ފޯރުވާތީ. ރައީސުލް ޖުމްހޫރިއްޔާގެ އޮފީހުން ކޯޓުތަކަށް ނުފޫޫޒު ފޯރުވާތީ،" މުއިއްޒު ވިދާޅުވި އެވެ.
މުއިއްޒު ވިދާޅުވެފައިވަނީ އޭނާ މަގާމާ ހަވާލުވާ ދުވަހަކީ އެ ނުފޫޒު ނިމުމަކަށް އަންނާނެ ދުވަސް ކަމަށެވެ. އަދި އެ ދުވަހުން ޔާމީން މިނިވަން ވާނެ ކަމުގެ ޔަގީންކަން މުއިއްޒު ތަކުރާރުކޮށް ދެއްވާފައިވެ އެވެ.
