ނިމިގެން އެ ދިޔައީ ތާރީހީ އިންތިހާބެކެވެ. ފެހި ގާނޫނު އަސާސީގެ ދަށުން ބޭއްވި ހަތަރު ވަނަ ރިޔާސީ އިންތިހާބުގައި ޖުމުލަ އަށް ކެންޑިޑޭޓުން ވާދަ ކުރެއްވި އެވެ. އެމްޑީޕީގެ ޓިކެޓު އެ ޕާޓީގެ އޭރުގެ ރައީސް މުހައްމަދު ނަޝީދަށް ގެއްލި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހޯއްދެވި ނަމަވެސް، އެމްޑީޕީ ދެ ފަޅިވެ، ނަޝީދު ދަ ޑިމޮކްރެޓްސް އުފެއްދި އެވެ. އެންމެ ބޮޑު އިދިކޮޅު ޕާޓީގެ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ކެންޑިޑެސީ ގެއްލި، ޕީޕީއެމް/ޕީއެންސީގެ އެ ޓިކެޓަށް ތައްޔާރުވެވަޑައިގެން ހުންނެވި މާލޭ ސިޓީގެ މޭޔަރު އަދި ޕީޕީއެމްގެ ނައިބު ރައީސް ޑރ. މުހައްމަދު މުއިއްޒު ޓިކެޓު ހޯއްދެވީ ޕީޕީއެމް ދޫކުރައްވައި، ޕީއެންސީއަށް ބަދަލުވެވަޑައިގެންނެެވެ.
އާ ޕާޓީއަކާ ގުޅިވަޑައިގެންނެވިތާ އެންމެ ކުރު ވަގުތެއްގައި ރިޔާސީ ޓިކެޓު ހޯއްދެވި ކެންޑިޑޭޓަކަށް މުއިއްޒު ވެގެން ދިޔަ އެވެ. އިންތިހާބު ކާމިޔާބު ކުރެއްވުން ވެގެން ދިޔައީ މެމްބަރުން މަދު ޕާޓީއަކަށް އިންތިހާބު ކާމިޔާބުވި ފުރަތަމަ ފަހަރަށް ވުމެވެ.
ފުރަތަމަ ބުރުގެ ނަތީޖާއިން ހައިރާންކަން ލިބިގެން ދިޔައީ، ރައީސް ސޯލިހުގެ މައްޗަށް މުއިއްޒު ހޯއްދެވި ކާމިޔާބީގެ އިތުރުން، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަށް ލިބިވަޑައިގެންނެވި ބޮޑު ނާކާމިޔާބީ އާއި، އަމިއްލަ ގޮތުން ވާދަ ކުރެއްވި އުމަރު ނަސީރު، ގާސިމަށް ވުރެ ގިނަ ވޯޓު ހޯއްދެވުމެވެ.
މި އިންތިހާބުގެ ކަވަރޭޖު، "ނިންމުން 2023" ގެނެސް ދިނީ ހަބަރާއި ރިޕޯޓާއި ވީޑިއޯ، އަދި ނަތީޖާ ގެނެސްދިނުމަށް ތައްޔާރު ބަލާލަން ފަސޭހަ ވެބްސައިޓުންނެވެ. ކަވަރޭޖުގެ އެންމެ ފަހުކޮޅުގައި މުޅި ރާއްޖޭގައި ވެސް އެންމެ ބޮޑަށް ނަން ހިންގައިގެން ދިޔައީ ސްކީލާން ޑޮކިއުމެންޓްރީ އެވެ.
މި ލިޔުމުގައި މި ގެނެސްދެނީ މިފަހަރުގެ ކަވަރޭޖަށް ތައްޔާރުކުރި މުހިންމު ބައެއް ކޮންޓެންޓެވެ.
