ދައުލަތުގެ އެކި މަގާމުތަކަށް ރައީސުލްޖުމްހޫރިއްޔާ އައްޔަނުކުރައްވާފައިވާ ބޭފުޅުން މި ރިޔާސީ ދައުރު ނިމެންދެން ހަވާލުކުރެވިފައިވާ މަސްއޫލިއްޔަތު އަދާކުރުމުގައި ދެމިތިބެން ރައީސް އިބްރާހިމް މުހައްމަދު ސޯލިހު މިއަދު އިލްތިމާސްކުރައްވައިފި އެވެ.
ރައީސް މިގޮތަށް އިލްތިމާސްކުރެއްވީ ވެރިކަން ބަދަލުވުމުގެ މަރުޙަލާގައި އިންތިހާބީ ރައީސުލްޖުމްހޫރިއްޔާގެ ހައިސިއްޔަތުން ކުރަންޖެހޭ ކަންތައްތައް ކުރުމަށް ޓަކައި "އިންތިހާބީ ރައީސުލްޖުމްހޫރިއްޔާގެ އޮފީސް" ގާއިމްކުރެއްވުމަށް ނެރުއްވި ދެންނެވުމުގަ އެވެ.
"ދިވެހިރާއްޖޭގެ ގާނޫނު އަސާސީންނާއި، ގާނޫނުތަކުން ރައީސުލްޖުމްހޫރިއްޔާ މީހުން އައްޔަނުކުރައްވާ މަގާމުތަކުގައި ތިއްބެވި ފަރާތްތަކުން ހިނގަމުންދާ ރިޔާސީ ދައުރު ނިމެންދެން، އެ ފަރާތަކާ ހަވާލުވެފައިވާ މަސައްކަތްތައް ކުރެއްވުމުގައި ދެމިތިއްބެވުމަށް ރައީސުލްޖުމްހޫރިއްޔާ ވަނީ ބާރު އަޅުއްވާފައިވާ," މިކަމާ ގުޅިގެން ރައީސް އޮފީހުން އާންމުކުރި މައުލޫމާތުގައި ވެ އެވެ.
އެ ދެންނެވުމުގައިވާ ގޮތުގައި ރައީސް ވަނީ އެމަނިކުފާނު އައްޔަނުކުރައްވާ މަގާމުތަކުގައި ތިއްބެވި ފަރާތްތަކުން، އެ ފަރާތަކާ ހަވާލުވެފައިވާ މަސައްކަތް ކުރުމުގައި ދެމިތިބުމަށް ބާރުއަޅުއްވާފަ އެވެ. ހަމައެހެންމެ، ވެރިކަން ބަދަލުވުމުގެ ކަންކަން ފަސޭހަކުރުމަށްޓަކައި ވެރިކަން ބަދަލުވުމުގެ މަރުހަލާގެ ކަންކަމުގައި ފުރިހަމައަށް އެއްބާރުލުން ދިނުމަށް ވެސް ރައީސް ވަނީ އެ ފަރާތްތަކަށް އަންގާފަ އެވެ.
