ސެޕްޓެމްބަރު 30، ގައި އޮންނަ ރިޔާސީ އިންތިހާބުގެ ދެވަނަ ބުރުގައި ވޯޓު ލުމަށް ރީ-ރަޖިސްޓްރީކުރަން ހުޅުވާލި ފުރަތަމަ ދުވަހު އެކަނި 9,000 އަށް ވުރެ ގިނަ މީހުން ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
ދެ ވަނަ ބުރުގެ ވޯޓަށް ރީ-ރަޖިސްޓްރީކުރަން ބޭނުންވާ މީހުންނަށް ކޮމިޝަނުން ހުޅުވާލީ ތިން ދުވަހުގެ މުއްދަތެކެވެ. އެއީ އިއްޔެއިން ފެށިގެން މާދަމާގެ ނިޔަލަށެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ކުރެއްވި ޓުވީޓެއްގައި ވިދާޅުވީ އިއްޔެ އެ ކޮމިޝަނަށް 9،000 އަށް ވުރެ ގިނަ ފޯމު ހުށަހެޅި އިރު އޭގެ ތެރޭގައި އޮންލައިންކޮށް 7،000 އަށް ވުރެ ގިނަ ފޯމު ހިމެނެ އެވެ.
ރިޔާސީ އިންތިހާބުގެ ފުރަތަމަ ބުރު ކޮމިޝަނަށް ފޯމު ހުށަހަޅައިގެން ރީ-ރަޖިސްޓްރީ ކުރުމަށް 21 ދުވަހުގެ މުއްދަތެއް އަދި އޮންލައިންކޮށް ފޯމު ހުށަހަޅައިގެން ރީ-ރަޖިސްޓްރީ ކުރުމަށް 17 ދުވަހުގެ މުއްދަތެއް ކޮމިޝަނުން ދިނެވެ. އެ މުއްދަތުގެ ތެރޭގައި ރީރަޖިސްޓްރީކުރީ 35،849 މީހުނެވެ.
ފުރަތަމަ ބުރު ވޯޓު ލުމުގެ ހައްގު 282،395 މީހުނަށް ލިބުނު ނަމަވެސް ވޯޓު ލާފައިވަނީ 225,486 މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 79 އިންސައްތަ އެވެ. މިއީ ރިޔާސީ އިންތިހާބެއްގައި ވޯޓުލީ ނިސްބަތް ނުވަތަ ވޯޓާ ޓާން އައުޓް އެންމެ ދަށް ފަހަރެވެ.
އިލެކްޝަންސް ކޮމިޝަނުން ބުނެފައިވާ ގޮތުގައި ދެ ވަނަ ބުރުގައި ސެޕްޓެމްބަރު 30، އާ ހަމައަށް 18 ފުރޭ ކޮންމެ މީހަކަށް ވެސް ވޯޓު ލެވޭނެ އެވެ. އެހެންކަމުން އިތުރު 403 ޒުވާނުންނަށް ވޯޓު ލުމުގެ ހައްގު ލިބެ އެވެ. އެއީ ޖުމުލަ 282،803 މީހުނެވެ.
