ރިޔާސީ އިންތިހާބުގެ ދެވަނަ ބުރަށް ނުކުންނައިރު ދަ ޑިމޮކްރެޓްސް އާއެކުވެސް ކޯލިޝަން ހަދަން ތައްޔާރަށް ހުންނެވި ކަމަށާއި އެކަމާ މެދު ގޮތެއް ނިންމަންވީ ޑިމޮކްރެޓްސް އިން ކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
އޭނާ މިހެން ވިދާޅުވީ ރިޔާސީ އިންތިހާބުގެ ފުރަތަމަ ބުރުން ނާކާމިޔާބުވި މޯލްޑިވްސް ނެޝަނަލް ޕާޓީ (އެމްއެންޕީ) އާއެކު، ކޯލިޝަން އެއްބަސްވުން ގާއިމުކޮށް އެކަން އިއުލާނުކުރުމަށް ޕްރޮގްރެސިވް ކޯލިޝަނުން ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އާއި ޕްރޮގްރެސިވް ކޯލިޝަން މިހާތަނަށް ފެންނަމުން އައީ އަބަދުވެސް ހިޔާލު ތަފާތު ދެ ސިޔާސީ ފިކުރެއް ގޮތުގަ އެވެ. ނަމަވެސް, ރިޔާސީ އިންތިހާބުގެ ދެވަނަ ބުރުގައި ރައީސް ނަޝީދުގެ ދަ ޑިމޮކްރެޓްސް އާއެކުވެސް ކޯލިޝަން ހެދުމުގެ މަޝްވަރާތައް އެ ކޯލިޝަނުން އަންނަނީ ކުރަމުންނެވެ.
އިންތިހާބު ކާމިޔާބުކުރުމަށް އެކީގައި މަސައްކަތްކުރަން ރައީސް ނަޝީދާއެކު އެއްބަސްވުމަކަށް އާދެވިދާނެކަމުގެ ފުރުސަތެއް އެބައޮތްތޯ ނޫސްވެރިއަކު ސުވާލުކުރުމުން ޑރ. މުއިއްޒު ވިދާޅުވީ ދިވެހީންގެ ރާއްޖެއަށް ދިއުމަށް އެ ޕާޓީން ފަށައިގެން އުޅޭ ދަތުރުގައި ބައިވެރިވުމުގެ ފުރުސަތު ހުރިހާ ޕާޓީތައަކަށް ވެސް އޮތް ކަމަށެވެ.
އަދި އެ ފުރުސަތު ރައީސް ނަޝީދު އާއި ދަ ޑިމޮކްރެޓްސް އަށްވެސް އޮތްކަން ފާހަގަކުރައްވަމުން މުއިއްޒު ވިދާޅުވީ "ބޯލް އިސް އިން ދެއާ ކޯޓް" ކަމަށެެވެ.
ޕީޕީއެމް/ޕީއެންސީ ކޯލިޝަނުން ދަ ޑިމޮކްރެޓްސް އާއެކު ކުރަމުންދާ މަޝްވަރާތަކުގައި ރާއްޖޭގެ ވެރިކަން ކުރާ ނިޒާމު ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ޑިމޮކްރެޓްސް އިން ޝަރުތުކޮށްފައިވާ ކަމަށް ބައެއް މީޑިއާތަކުން ރިޕޯޓުކޮށްފައިވާއިރު އެކަމަށް ޕީޕީއެމް/ޕީއެންސީން އެއްބަސްވެދާނެތޯ ސުވާލުކުުރުމުން މުއިއްޒު ސީދާ ޖަވާބެއް ނުދެއްވަ އެވެ. އަދި ވިދާޅުވީ މިވަގުތު ދައްކަނީ ނިޒާމުގެ ވާހަކަ އެއް ނޫން ކަމަށާއި މިއީ ރިޔާސީ އިންތިހާބުގެ ވާހަކަ ދައްކާ ވަގުތު ކަމަށެވެ.
އަޅުގަނޑުމެންގެ މައިގަނޑު ސިޔާސަތުތަކާއި ގަބޫލުކުރާ ހަމަތަކުގެ މަތިން މަސައްކަތް ކުރަން ބޭނުންވާ ހުރިހާ ފަރާތަކަށް އޮތީ ފުރުސަތު ހުޅުވާލެވިފައި. ދެން މީކީ ނިޒާމުގެ ވާހަކައެއް ނޫން މިއަދު މީ ރިޔާސީ އިންތިހާބުގެ ވާހަކަ ދައްކާ ދުވަސް," މުއިއްޒު ވިދާޅުވި އެވެ.
ދަ ޑިމޮކްރެޓްސްގެ ޝަރުތުތަކާ ގުޅޭގޮތުން ވާހަކަ ދައްކަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ކޮންމެ ބަޔަކުވެސް އެއްބަސްވުމެއް ގާއިމުކުރަން ވާހަކަދައްކަމުން ދާއިރު ދެ ފަރާތުންވެސް އެކިި ކަންތައް ހުށަހަޅާނެ ކަމަށެވެ. އަދި އެ ހުށަހެޅުންތަކާ މެދު ޖެހޭނީ އިތުރަށް ވާހަކަދައްކައި އެއްބަސްވުމަކަށް އަންނަން ކަމަށާއި ދަ ޑިމޮކްރެޓްސްއާއެކު އަދި އެއްބަސްވުމަކަށް ނާދެވޭ ކަމަށްވެސް ވިދާޅުވި އެވެ.
