ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ ވެރިކަން ހިންގާ އެމްޑީޕީން ހުށަހެޅި މައްސަލައިގައި ސޮއި ކުރެއްވި ގިނަ މެމްބަރުންގެ ސޮއި އަނބުރާ ގެންދެވުމުން އެ މައްސަލަ މަޖިލީހުން މިއަދު ބޭރުކޮށްލައިފި އެވެ.
ނަަޝީދުގެ މައްސަލަ އަނބުރާ ގެންދާނެ ކަމަށް އެމްޑީޕީން އިއްޔެ ބުނި ނަމަވެސް އެ މައްސަލަ މިއަދު އެޖެންޑާކޮށް ކުރިއަށްގެންދިޔައީ އެފަދަ މައްސަލައެއް ހުށަހަޅަން ބޭނުންވާ 22 މެމްބަރުންގެ ސޮއި ހަމަވާތީ އެވެ.
ނަޝީދުގެ އިތުބާރު ނެތް ކަމަށް ހުށަހެޅި ގަރާރުގައި ސޮއި ކުރި 25 މެމްބަރަކު މިއަދުގެ މަޖިލިސް ފެށުނު ވަގުތު އޮތީ އެ ގަރާރަށް ކުރި ތާއީދު އަނބުރާ ގެންގޮސްފަ އެވެ. ފަހުން ވަގުތުކޮޅެއް ނެގުމަށްފަހު އިތުރު މެމްބަރުންގެ ސޮއި އަނބުރާ ގެންދިޔަ އެވެ.
މަޖިލީހުގެ ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފު ވިދާޅުވީ މިހާރު ގަރާރުގައި އޮތީ 21 މެމްބަރުންގެ ސޮއި ކަމަށެވެ. އެއާއެކު އެ މައްސަލަ މަޖިލީހުގައި ކުރިއަށް ނުގެންދެވޭނެ ކަމަށް އޭނާ ކަނޑައެޅުއްވި އެވެ.
ނަޝީދާއި މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލަ އެމްޑީޕީން ނަގަން ނިންމީ ހޮނިހިރު ދުވަހުގެ އިންތިހާބަށްފަހެވެ. އެ އިންތިހާބުގައި ވޯޓުލީ މީހުންގެ 45 ޕަސެންޓު ހޯދައިގެން ކުރި ހޯއްދެވީ ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.
އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 38 ޕަސެންޓެވެ. ނަޝީދުގެ ޕާޓީ ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބަށް ލިބިވަޑައިގަތީ ހަތް ޕަސެންޓެވެ. ވޯޓުލާން ނުނިކުންނަ 21 ޕަސެންޓު މީހުން ތިއްބެވެ.
