މިއަދު ބޭއްވި މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި ވޯޓުލާން ނުކުތީ ޖުމުލަ 222،509 މީހުންނެވެ. އެއީ ވޯޓުލެވޭ އާބާދީގެ 79 ޕަސެންޓު މީހުންނެވެ. މާނައަކީ 21 ޕަސެންޓު މީހުން މިއަދުގެ އިންތިހާބުގައި ވޯޓުނުލާކަމެވެ. ގޮތެއް ނުނިންމާ ކަމެވެ.
އިންތިހާބުގައި ބެހެއްޓި ވޯޓު ފޮށިތަކުގެ ތެރެއިން އިނގިރޭސިވިލާތުގައި ބެހެއްޓި ފޮށި ފިޔަވާ ހުރިހާ ފޮއްޓެއްގެ ނަތީޖާ ލިބިފައިވާއިރު، ވޯޓުގައި ބަހެއް ނުބުނެ 59،000 އެއްހާ މީހުން އެބަ ތިބިކަމަށް ފެނެ އެވެ.
މިއީ ރާއްޖޭގެ ތާރީހުގައި ވެސް މިހާ ގިނަ އަދަދެއްގެ ބަޔަކު ރިޔާސީ އިންތިހާބެއްގައި ވޯޓުނުލާ ތިބި ފުރަތަމަ ފަހަރެވެ. މައި ދެ ފިކުރަށް ވާދަވެރިކޮށް, ހަމަހަމައަށް ބެހުނު މިއަދުގެ އިންތިހާބުގައި ކުރި ހޯދި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށް ލިބުނީ 100،322 ވޯޓެވެ. ދެ ވަނަ އަށް ދިޔަ އެމްޑީޕީ ކެންޑިޑޭޓު ރައީސް އިބްރާހިމް މުހައްމަދު ސޯލިހު އަށް ލިބުނީ 85،045 ވޯޓެވެ.
ވޯޓުނުދިން ބޮޑު އާބާދީގެ 20 ޕަސެންޓުގެ ވޯޓުން ވެސް މިއަދުގެ އިންތިހާބު ބަދަލުކުރެވުނީހެވެ. ނަމަވެސް, އެ ފަރާތްތަކުން ވޯޓުލާން ނުނިކުތުމަކީ ގައުމަށް ދޭ ބޮޑު މެސެޖެކެވެ. ސިޔާސީ ޕާޓީތަކުން ވިސްނަންޖެހޭ ކަމެކެވެ.
މީގެ ކުރިން ބޭއްވި 2018 ވަނަ އަހަރުގެ ރިޔާސީ އިންތިހާބުގައި އެމްޑީޕީއަށް ލިބުނީ 134,705 ވޯޓެވެ. ޕީޕީއެމަށް ލިބުނީ 96,052 ވޯޓެވެ. މިއަދުގެ އިންތިހާބުގައި ޕީޕީއެމުން އެއަށްވުރެ އިތުރަށް 4270 ވޯޓު ހޯދި އެވެ.
އަނެއްކޮޅުން އެމްޑީޕީއަށް އޭރު ލިބުނު ވޯޓަށްވުރެ މިއަދުގެ ވޯޓުގައި 49،660 ވޯޓު މަދެވެ. އެ ޕާޓީން ވަކިވެ އާ ޕާޓީއެއް އުފެއްދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޑިމޮކްރެޓްސްއަށް ލިބުނީ 15،404 ވޯޓެވެ. އޭރު އެ ޕާޓީއާއެކު ދެން އޮތް ޖޭޕީގެ ގާސިމް އިބްރާހިމަށް މިއަދު ލިބުނީ 5,428 ވޯޓެވެ. އެކު ޖުމްލަ އެއީ 20،832 ވޯޓެވެ. އެމްޑީޕީއަށް މަދުވި 49،660 ވޯޓުން އެ ވޯޓުތައް ކެނޑި ނަމަވެސް 28،828 ވޯޓު މަދުވެ އެވެ.
ސިޔާސީ މީހުން ދެކެ ފޫހިވީ؟
މިފަހަރު ވޯޓުދޭ އާބާދީގެ ބޮޑު އިންސައްތައަކީ ޒުވާނުންނެވެ. ގާނޫނު އަސާސީއަށް އަމަލުކުރަން ފެށިފަހުން މި ރިޔާސީ އިންތިހާބާ ހަމައަށް ވެއަތު މިވީ 15 އަހަރު ދުވަހުގެ ތެރޭގައި ސިޔާސީ މީހުންނާއި ސިޔާސީ ވައުދުތައް ދެކެ ދިވެހިން ފޫހިވެއްޖެ އެވެ. ސިޔާސީ ކަންކަމުގައި ޝާމިލުވާ މީހުންގެ އަދަދުވެސް ބޮޑުތަނުން މަދުވެއްޖެ އެވެ.
ސިޔާސީ ޕާޓީތަކުން ރަށްރަށަށް ކުރާ ދަތުރުތަކުގައި މަރުހަބާ ދަންނަވަން ނުކުންނަ މީހުންގެ އަދަދު ކުރިއާ އަޅާ ބަލާއިރު ވަރަށް ބޮޑަށް މަދެވެ. ރަށްރަށުގައި ސިޔާސީ ކަންކަމުގެ ފޯރިވެސް އެހާވަރަކަށް ނެތެވެ. ރައީސުލްޖުމްހޫރިއްޔާ އެކަން އޭރު ސިފަ ކުރެއްވީ ރާއްޖޭގައި އޮތް ސިޔާސީ ހަމަޖެހުމުގެ ނަތީޖާގެ ގޮތުގަ އެވެ. އެހެންނަމަވެސް ވޯޓުގެ ނަތީޖާއިން ފެންނަނީ އެ މަންޒަރެއް ނޫނެވެ.
ދެ ވަނަ ބުރަކަށް މި މަހު 30 ގައި އެމްޑީޕީ އަދި ޕީއެންސީއިން ނިކުންނައިރު, ދެ ޕާޓީން ވެސް އެންމެ ބޮޑު އިސްކަމެއްދޭނީ ވޯޓުނުލާ ތިބި މީހުންގެ ވޯޓުތައް ހޯދުމަށް ކަމަށް ބެލެވެ އެވެ. ދެ ޕާޓީގެ ދޭތެރޭގައި އޮތް ފަރަގު ބަދަލުކޮށްލެވޭނެ އެންމެ ފަސޭހަ ގޮތެއްގެ ގޮތުގައި މިހާރު ފެންނަން އޮތީ ވޯޓު ނުލި އާބާދީ ނެރެ, އަނެއް ކެންޑިޑޭޓު ބަލި ކުރުމެވެ. ދެ ކެންޑިޑޭޓުންވެސް އަމާޒު ހިފާނީ އެކަމަށެވެ.
