ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް މާލޭގެ މޭޔަރް ޑރ. މުހައްމަދު މުއިއްޒު ނުކުމެވަޑައިގެންނެވީ ކުޑަކުޑަ ޕާޓީއަކުން ކަމަށް ބުނެ، އޭނާއަށް އަމާޒުކުރާ ފާޑުކިއުންތަކަށް ޕީއެެންސީގެ ރައީސް އަބްދުއްރަހީމް އަބްދުﷲ މިއަދު ރައްދު ދެއްވައިފި އެވެ.
މުއިއްޒަކީ ކުޑަ ޕާޓީއަކުން ނުކުމެވަޑައިގެން ހުންނެވި ކެންޑިޑޭޓެއް ކަމަށް އެެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހާއި އެމަނިކުފާނުގެ ކެމްޕެއިން ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ ވެސް ތަކުރާރުކޮށް ސިފަކުރެއްވި އެވެ.
އައްޑޫގައި މިހާރު ކުރިއަށް ގެންދާ ކެމްޕެއިނުގައި ޕީއެެންސީގެ ރައީސް އަބްދުއް ރަހީމް އަބްދުﷲ ރައްދު ދެއްވީ އެވާހަކަތަކަށެވެ.
"އަޅުގަނޑުމެންގެ ވާދަވެރިން އެބަ ބުނޭ ކުޑަކުޑަ ޕާޓީއަކުން ނުކުމެ ހުރި ބޭފުޅެކޭ، ޕީއެންސީން ނުކުމެ ހުރި ކެންޑިޑޭޓެކޭ. އެހެން އެ ވިދާޅުވާ ބޭފުުޅުންނަށް ޕީއެންސީ އަކީ ކޯއްޗެއް ކަން ނޭނގޭތީ އޭ އަޅުގަނޑު ދަންނަވާނީ އެހެން އެ ވިދާޅުވަނީ. ޕީޕީއެމް އަކީ ޕީއެންސީ، ޕީއެންސީ އަކީ ޕީޕީއެމް. މި ދެޕާޓީއަކީ ރައީސް ޔާމީން،" އަބްދުއް ރަހީމް ވިދާޅުވި އެވެ.
ޕީޕަލްސް ނެޝަނަލް ކޮންގްރެސްއަކީ ޕްރޮގްރެސިވް ޕާޓީ އޮފް މޯލްޑިވްސްގެ މިލްކުވެރިކަން ހޯއްދަވަން އެޕާޓީގެ ކުރީގެ ޒައީމް، ކުރީގެ ރައީސް މައުމޫނު އަބްދުލް ގައްޔޫމް ކޯޓަށް ވަޑައިގެންނެވުމުން، ކުރީގެ ރައީސް އަބްދުﷲ ޔާމީނުގެ އެންގެވުމަކަށް ހެދި ޕާޓީ އެކެވެ. ޕީއެންސީ ރަޖިސްޓްރީކުރަން 3،000 މެމްބަރުން ހަމަކުރީ ޕީޕީއެމްގެ ބައެއް މެމްބަރުން އެޕާޓީއަށް ބަދަލުވެގެންނެވެ. ޕީޕީއެމްގެ ލީޑަޝިޕް ބައެއް ބޭފުޅުން ވެސް އޭގެ ތެރޭގައި ހިމެނެ އެވެ.
މިފަހަރުގެ ރިޔާސީ އިންތިހާބަށް ޕީޕީއެމުން ނެރެން މަސައްކަތްކުރީ ކުރީގެ ރައީސް އަބްދުﷲ ޔާމީނެވެ. އެހެން ނަމަވެސް ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމެއް އޮތުމުން އެމަނިކުފާނުގެ ޝަރުތުހަމަނުވާ ކަމަށް އިލެކްޝަންސް ކޮމިޝަން (އީސީ) އިން ނިންމި އެވެ. އެ ނިންމުން ބާތިލުކޮށްދޭން އެދިވަޑައިގެން ޔާމީނުގެ ފަރާތްޕުޅުން ސުޕްރީމް ކޯޓަށް ހުށަހެޅުމުން އެކޯޓުން މައްސަލަ ނިންމީ އީސީއާ އެއްކޮޅަށެވެ.
ޔާމީނުގެ ބަދަލުގައި ޕީއެންސީން ކެންޑިޑޭޓަކު ނެރެެން ޕީޕީއެެމް/ޕީއެންސީ ކޯލިޝަނުން ނިންމީ އެހިސާބުންނެވެ.
