ސަރުކާރުގެ ސިޔާސީ މަގާމުތަކާއި، ސިޔާސީ ބޭނުމަށް ސަރުކާރުގެ އެކި އިދާރާތަކާއި ކުންފުނިތަކުގައި އުފައްދާފައިވާ "ބޭކާރު" ވަޒީފާތަކުގެ މައްސަލަ ހައްލު ކުރާނީ ވަޒީފާތަކުގައި ތިބި މީހުނަށް އެ ވަޒީފާގެ ބަދަލެއް ދައްކުވައިދީފައި ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕެއިނުގައި ރާއްޖޭގެ އުތުރުގެ ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން މިރޭ ހއ. ދިއްދޫގައި ބޭއްވި ޖަލްސާގައި ވާހަކަ ދައްކަވަމުން އޭނާ ވިދާޅުވީ ވަޒީފާތައް އުފެއްދުމުގެ ވިސްނުން ސަރުކާރުން ގެންގުޅެން ވާނީ އިގުތިސޯދީ މަޝްރޫއުތައް މެދުވެރިކޮށް ކަމަށެވެ.
"އެއާޕޯޓު ހިންގުމުގެ ތެރެއިން، ސިޓީ ހޮޓާތަކާއި ގެސްޓް ހައުސް ވިޔަފާރިން ވެސް އުފެދެނީ ވަޒީފާ، ވަޒީފާ ލިބި، ޒުވާނުންނާއި، އެކި އުމުރުފުރާގެ ފަރާތްތަކަށް އެ ލިބެނީ އިގުތިސޯދީ ބާރުވެރިކަން، އަމިއްލަ މިނިވަންކަން، އަމިއްލަ ފުދުންތެރިކަން، އެއީ ސަރުކާރަށް ލިބެން ޖެހޭ އެންމެ އުފާވެރިކަން،" މުއިއްޒު ވިދާޅުވި އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުގެ ކުންފުނިތަކުގެ ވަޒީފާތައް އިތުރުކުރުމުގެ ސިޔާސަތު، އިދިކޮޅު ޕީޕީއެމް/ޕީއެންސީ އިއްތިހާދުގެ ތާއީދާއެކު ނުކުންނެވި ކެންޑިޑޭޓު މުއިއްޒު ވެސް ތުހުމަތު ކުރެއްވީ "ސިޔާސީ ބޭނުމަށް" ސަރުކާރަށް ތާއީދު ހޯދަން ވެގެން "ބޭކާރު" ގޮތުގައި އުފައްދާފައިވާ ވަޒީފާތަކެއްގެ ގޮތުގަ އެވެ.
ކުރީގެ ރައީސް އަބްދުﷲ ޔާމީނުގެ އިތުރުން ކުރީގެ ރައީސް ޑރ. މުހައްމަދު ވަހީދުގެ ސަރުކާރުގައި އެ ހިނގި ހަތް އަހަރުގެ މުއްދަތުގައި ހައުސިން މިނިސްޓަރަކަށް ހުންނެވި މުއިއްޒު ވިދާޅުވީ، އިތުރު ވަޒީފާތަކުގެ މައްސަލަ ހައްލު ކުރަން ޖެހޭ ކަމަށެވެ.
ނަމަވެސް މައްސަލަ ހައްލުކުރުމުގެ ތެރެއިން އެއްވެސް މީހަކު ވަޒީފާއިން ބާކީވެގެން ނުދާނެ ގޮތެއް ސަރުކާރުގެ ނިޒާމުގެ ތެރެއިން ހަމަޖައްސަވައިދެއްވާނެ ކަމުގެ ޔަގީންކަން، މުއިއްޒު ދެއްވި އެވެ.
"އެއްވެސް ރައްޔިތަކަށް ލިބޭ ފުރުސަތަކުން އަޅުގަނޑުމެންގެ ސަރުކާރުން މަހުރޫމު ނުކުރާނަމޭ، އެކަމަކު ފަހަރެއްގައި އެ ވަޒީފާ އެ ކުންފުންޏަކުން ދެން ނޯވެދާނެ، ނަމަވެސް މުޅި ސަރުކާރުގެ ނިޒާމުގެ ތެރެއިން، ކޮންމެ ވެސް ވަޒީފާއެއް، ހަމަ އެ މުސާރައަށް ހަމަޖައްސައިދޭނަން،" މުއިއްޒު ވިދާޅުވި އެވެ.
ވަޒީފާގެ ބިރު ހިތުގައި އޮވެ ނުދެއްވާށޭ، ސިޔާސީ ގޮތުން ތަޅު އެޅުވުމަށް ވަޒީފާދޭ ކަމަށް ހީކޮށްދޭން އުޅުނަސް އެ ހީގައި ނުޖެހޭށޭ - މުއިއްޒު
ސަރުކާރު ކުންފުންޏަކަށް ބޭނުން ނުވާ ވަރަށް ވުރެ އިތުރަށް ވަޒީފާ ދީފައިވާނަމަ، ވަޒީފާގައި ތިބި މީހުންނަށް ބަދަލު ހަމަޖައްސައިދެއްވާނެ ގޮތުގެ ބައެއް މިސާލުތައް ވެސް އޭނާ ކިޔައިދެއްވި އެވެ.
"ކުންފުންޏެއްގެ މާލިއްޔަތަށް ނުތަކާ ވަރަށް ވަޒީފާތައް އޮވެދާނެ، ފިނޭންސް މިނިސްޓްރީގެ ބަޖެޓުން އެތައް މިލިއަނެއް ކޮންމެ މަހަކު ހަރަދު ކުރަން ޖެހޭ ގޮތަށް އޮވެދާނެ، އެހެންވީމާ ބަދަލުތަކެއް އައިސްދާނެ، އެހެންވާނަމަ އެހެން ކުންފުންޏަކަށް ވެސް ބަދަލުކުރަން ޖެހިދާނެ،" މުއިއްޒު ވިދާޅުވި އެވެ.
މީގެ ދެ އަހަރެއް ކުރިން މާލޭގެ މޭޔަރަކަށް އިންތިހާބުވި މުއިއްޒު ވިދާޅުވި ގޮތުގައި ބައެއް ހާލަތްތަކުގައި ސިޔާސީ ފިކުރު އެއްފަރާތްކޮށްފައި ގައުމީ ވިސްނުމެއްގައި މަސައްކަތް ކުރަން ޖެހޭނެ އެވެ. އެހެންކަމުން އަންނަ އިންތިހާބު މާ ގިނަ ބުރުތަކަށް ބާއްވަން ނުޖެހޭ ގޮތަށް ވޯޓު ދިނުމަށް އިލްތިމާސްކުރެއްވި އެވެ.
ރިޔާސީ އިންތިހާބު ކާމިޔާބުކުރަން މަދުވެގެން ވޯޓުލާ މީހުންގެ 50 އިންސައްތަ އަދި އިތުރު އެއް ވޯޓު ހޯދަން ޖެހެ އެވެ. ފުރަތަމަ ބުރުގައި އެއްވެސް ކެންޑިޑޭޓަކަށް އެ ވަރަށް ވޯޓު ނުލިބޭނަމަ، އެންމެ ގިނަ ވޯޓު ލިބޭ ދެ ކެންޑިޑޭޓުންގެ މެދުގައި ދެވަނަ ބުރެއްގެ ވޯޓު ލުން ބާއްވަން ޖެހެ އެވެ.
މުއިއްޒު އެދިވަޑައިގަންނަވަނީ ފުރަތަމަ ބުރުގައި ވެސް ރައްޔިތުންގެ ސާފު އަޣުލަބިއްޔަތު އޭނައަށް ދިނުމަށެވެ.
