ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓު ޑރ. މުހައްމަދު މުއިއްޒުގެ ފުރަތަމަ ކެމްޕޭނު ހަރަކާތުގެ ގޮތުގައި ތާއިދު ހޯއްދެވުމަށާއި ހިޔާލު ހޯއްދެވުމަށް މިއަދު ހަވީރު ހިޔާ ފްލެޓްތަކަށް ޒިޔާރަތް ކުރައްވައިފި އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ބިނާކުރި ހިޔާ ފްލެޓްތަކުގައި ދިރިއުޅޭ ރައްޔިތުންނާ ބައްދަލުކުރުމަށް ފަހު ނޫސްވެރިންނާ ވާހަކަ ދައްކަވަމުން، މާލޭ ސިޓީގެ މޭޔަރަކަށް ވެސް ހުންނެވި މުއިއްޒު ވިދާޅުވީ ހިޔާ ފްލެޓްތަކަކީ އޭރުގެ ސަރުކާރުން ހިންގި މަޝްރޫއަކަށް ވެފައި އެ ތަނުގައި ދިރިއުޅޭ ގިނަ ރައްޔިތުން އެކަން ބަލައިގަންނަ ކަމަށެވެ.
"އަޅުގަނޑަކީ އެ ސަރުކާރުގައި [ހައުސިން މިނިސްޓަރުގެ ހައިސިއްޔަތުން] ރައީސް ޔާމީންގެ ފަރާތްޕުޅުން އެ މަސައްކަތުގައި އުޅުނު މީހާ. ރައީސް ޔާމީނަށް އޮންނަ ތާއީދު މިއަދު މި ފެނިގެން ދިޔައީ،" މުއިއްޒު ވިދާޅުވި އެވެ.
ހިޔާގެ 25 ބުރީގެ 16 ޓަވަރުގައި މީހުން ދިރިއުޅެން ފެށީ 2021 ގަ އެވެ. އޭރު ފްލެޓު ސިއްހީ ހިދުމަތް ލިބޭނެ ގޮތާއި ފިހާރުތަކެއް އަދި ކުނި އުކާލެވޭނެ ގޮތެއް ވެސް ނެތެވެ.
ފްލެޓްތަކުގައި މީހުން ދިރިއުޅެން ފެށިއިރު އެންމެ އަސާސީ ހިދުމަތްތައް ގާއިމު ނުކޮށްދެވުނު ކަމަށް މުއިއްޒު ވިދާޅުވި އެވެ. އެއީ އިހުމާލެއްގެ ގޮތުގައި އޭނާ ފާހަގަ ކުރެއްވި އެވެ.
އަދިވެސް ގިނަ ހިދުމަތްތައް ރަނގަޅަށް ގާއިމު ނުވާއިރު ކުރީގެ ސަރުކާރުން ތައްޔާރުކޮށްފައިވާ ޕްލޭނުގެ ބޮޑު ބައެއް ތަންފީޒުނުވެ އޮތުމުން މުއިއްޒު ފާޑުވިދާޅުވި އެވެ.
"އަޅުގަނޑުމެންގެ ސަރުކާރެއްގައި ހުޅުމާލެ ދެވަނަ ފިޔަވަހީގެ ހަގީގީ މަންޒަރު ފެނިގެން ދާނެ. މި ތަނަށް އަންނަންވާ ތަރައްގީ ހަގީގީ ސިފައެއްގައި އަންނާނެ،" މުއިއްޒު ވިދާޅުވި އެވެ.
ހިޔާ ފްލެޓުގައި އަސާސީ ހިދުމަތް މި ސަރުކާރުން ގާއިމު ނުކޮށްދޭ ކަމަށް ފާހަގަ ކުރައްވައި މުއިއްޒު ފާޑުވިދާޅުވިއިރު، ހިޔާ ފްލެޓުގެ ބައެއް ޔުނިޓުތައް ދިރިއުޅުމަށް ދޫނުކޮށް، ފިހާރަތަކާއި އާންމު ހިދުމަތްތަކާއި އެހެނިހެން އަސާސީ ހިދުމަތްތަކަށް ހާއްސަކުރީ މި ސަރުކާރުންނެވެ. މިހާރު ހިޔާ ފްލެޓުގައި މަޝްހޫރު ފިހާރަތަކާއި ކްލިނިކްތަކާއި ކެފޭ، ރެސްޓޯރެންޓުތައް އެބަ ހުއްޓެވެ. އަދި ފޭސް ދޭއްގައި ފަސް ސްކޫލަކާއި ދެ ޕްރީ ސްކޫލެއް އަޅަން ނިންމައި، ސެކަންޑްރީ އެއް ސްކޫލާއި ޕްރައިމަރީ ސްކޫލެއް ވަނީ ހުޅުވައިފަ އެވެ. އެ ސަރަހައްދުގައި ހޮސްޕިޓަލްތައް ހަދަން ވެސް ބިން ވަނީ ދޫކޮށްފަ އެވެ.
މުއިއްޒު އިންތިހާބުގައި ވާދަކުރުމަށް، ޕީއެންސީގެ ޓިކެޓު ހޯއްދަވަން ކުރިމަތިލެއްވީ ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީނަށް ވާދަނުކުރެވޭނެ ހާލަތަކަށް ތައްޔާރުވާން ޕީއެންސީން ކެންޑިޑޭޓެއް ނެރެން އެ ޕާޓީގެ ސެނެޓުން ނިންމުމުންނެވެ. ޕީއެންސީގެ ޕްރައިމަރީގައި މުއިއްޒުއާ އާދަމް ޝަރީފް ވާދަކުރެއްވިއިރު މުއިއްޒު އިންތިހާބުވީ އެންމެ ދެ ވޯޓުގެ ފަރަގުންނެވެ.
ޔާމީނުގެ މައްޗަށް 11 އަހަރުގެ ޖަލު ހުކުމެއް އިއްވާފައި އޮތުމުން، ރިޔާސީ އިންތިހާބުގައި އެމަނިކުފާނަށް ވާދަކުރުމުގެ ޝަރުތު ހަމަނުވާ ކަމަށް ސުޕްރީމް ކޯޓުން ކަނޑައެޅުމުން އިންތިހާބު ބޮއިކޮޓް ކުރުމަށް ނުވަތަ ޕީއެންސީގެ ކެންޑިޑޭޓާއެކު ކުރިއަށް ދިއުމަށް ޕީޕީއެމްގެ ސެނެޓުގައި މަޝްވަރާކުރި އެވެ. ހައިޖާނު ބޮޑުވި، އެ ބައްދަލުވުމުގައި ފާސްވީ މުއިއްޒާއެކު އިންތިހާބުގައި ނުކުތުމަށެވެ.
