ޒިއުރިކް (ޖުލައި 29) - ޔުއެފާގެ ފައިނޭންޝިއަލް ފެއާޕްލޭ (އެފްއެފްޕީ) ގަވާއިދުތަކާ ހިލާފުވެގެން، އިޓަލީގެ ޔުވެންޓަސް އެއް އަހަރަށް ޔޫރަޕްގެ މުބާރާތްތަކުން ސަސްޕެންޑް ކުރިއިރު، މާލީ ލިޔެކިޔުންތަކެއްގެ މައްސަލައިގައި ޗެލްސީ ޖޫރިމަނާ ކުރަން ޔުއެފާ އިން ނިންމައިފި އެވެ.
ޔުއެފާ އިން ބުނީ ޔުވެންޓަސް އިން މާލީ ކަންކަން ނިންމުމުގައި އުސޫލުން ބޭރުން ކަންތައްތައް ކޮށްފައިވާތީ، އެއް އަހަރަށް ސަސްޕެންޑްކުރަން ނިންމާފައިވާ ކަމަށާއި އަދި 22 މިލިއަން ޑޮލަރުން ޖޫރިމަނާ ކުރަން ވެސް ހަމަޖެހިފައިވާ ކަަމަށެވެ. އެކަމަކު، މި ވަގުތު މި 22 މިލިއަން ޑޮލަރުގެ ތެރެއިން ޔުވެންޓަސް އިން ދައްކަން ޖެހޭނީ އެއް ބައެވެ. އަނެއް ބައި ދައްކަން ޖެހޭނީ، ކުރިއަށް އޮތް ތިން އަހަރު ވެސް އެ ޓީމަށް މާލީ އަޑިގަނޑުން އަރައިގަނެ، އުސޫލުތެރެއިން ކަންކަން ނުނިންމޭނަމަ އެވެ.
އަންނަ ސީޒަނުގައި ޔުއެފާ ކޮންފަރެންސް ކަޕްގައި ވާދަކުރަން އޮތް ފުރުސަތު ޔުވެންޓަސް އަށް މި ވަނީ ގެއްލިފަ އެވެ. އެހެން ނަމަވެސް ޔުއެފާގެ ނިންމުމާ ދެކޮޅަށް އެޕީލްނުކުރަން އެ ކްލަބުން ވަނީ ނިންމައިފަ އެވެ.
ޔުވެންޓަސް އަށް ވަނީ މާލީ މައްސަލަަތަކެއްގެ ސަބަބުން މިދިޔަ ދޮޅު އަހަރެއްހާ ދުވަހު އިޓަލީ ފުޓްބޯޅަ ފެޑެރޭޝަނުން ވެސް ގިނަ ފިޔަވަޅުތަކެއް އަޅައިފަ އެވެ.
ޗެލްސީ ޖޫރިމަނާ ކުރަން ޔުއެފާ އިން ނިންމީ އެ ކްލަބްގެ ކުރީގެ ވެރިޔާ، ރަޝިއާގެ މަހުޖަނު ރޯމަން އަބްރަމޮވިޗް ހުރިއިރު، އެ ޓީމުގެ މާލީ މުއާމަލާތްތަކެއްގެ ލިޔެކިޔުން ފުރިހަމަނުވެ ހުރި މައްސަލައެއްގަ އެވެ. މި ކަމަށް ޔުއެފާ އިން ނިންމީ ޗެލްސީ 10 މިލިއަން ޑޮލަރުން ޖޫރިމަނާ ކުރުމަށެވެ. އެ ގޮތުން، ޗެލްސީގެ ލިޔެކިޔުންތައް މައްސަލަ ޖެހިފައިވަނީ 2012-2019އާ ދެމެދުގަ އެވެ.
