އިދިކޮޅު ޕީޕީއެމުން ދާދި ފަހުން ކެނޑިގެން ދިޔަ، މާލެ ސިޓީ މޭޔަރު ޑރ. މުހައްމަދު މުއިއްޒުގެ ދެބެއިންގެ ދެދަރި ކޮއްކޮ އަހުމަދު ގާލިބު ވެރިކަން ކުރާ މައި ޕާޓީ އެމްޑީޕީއަށް ސޮއިކޮށްފި އެވެ.
ޕީޕީއެމްގެ ކެލާ ދާއިރާގެ ސެނެޓަރުގެ މަގާމުގައި ހުއްޓައި، އެ ޕާޓީން ވަކިވި ގާލިބު އެމްޑީޕީއަށް ސޮއިކުރިކަން އެމްޑީޕީން ކުރި ޓްވީޓަކުން ވަނީ ހާމަކޮށްފަ އެވެ.
އެމްޑީޕީން ބުނި ގޮތުގައި ގާލިބުގެ އިތުރަށް ވެސް ޕީޕީއެމްގެ އިތުރު މެންބަރުންތަކެއް މިރޭ ވަނީ އެ ޕާޓީއާ ގުޅިފަ އެވެ.
ޕީޕީއެމުން ވަކިވިކަން ހާމަކުރަމުން ގާލިބު މީގެ ކުރިން ކުރި ޓްވީޓެއްގައި ލިޔެފައިވަނީ އެ ޕާޓީގައި ކުރިއަށް ދިޔުމަށް އެކަށީގެންވާ މާހައުލެއް ނެތް ކަމަށެވެ.
ހއ. ވަށަފަރު ކައުންސިލްގެ ނައިބު ރައީސްކަން ވެސް މީގެ ކުރިން ކުރައްވާފައިވާ ގާލިބު އެމްޑީޕީއަށް މިއަދު ގުޅުނު އިރު، ކުރިއަށް އޮތް ރިޔާސީ އިންތިހާބުގައި ޕީޕީއެމްގެ ޓިކެޓުގައި ވާދަކުރުމުގެ ޝައުގުވެރިކަން އޭނާގެ ބޭބެ އަދި މާލޭގެ މޭޔަރު މުއިއްޒު ގެންގުޅުއްވާ ކަމުގެ އަޑުތައް ގަދަ އެވެ.
ނަމަވެސް މުއިއްޒު އެ ކަން ދޮގުކުރައްވަ އެވެ. މީގެ ކުރިން "އަދަދު" ނޫހަށް ދެއްވި އިންޓަވިއުއެއްގައި ވެސް މުއިއްޒު ވިދާޅުވީ މާލޭގެ ރައްޔިތުން އޭނާއަށް ހަވާލުކޮށްފައިވާ ޒިންމާ ދައުރުގެ މެދު ތެރެއިން ދޫކޮށްލުމުގެ ވިސްނުމެއް ނެތް ކަމަށެވެ.
ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައިވާއިރު، ރިޔާސީ ޓިކެޓާ ގުޅިގެން ހިޔާލުތަފާތުވުންތަކެއް އުޅޭ ކަމަށް ވެސް އަޑު ފެތުރިފައިވެ އެވެ. ނަމަވެސް ގާލިބު އެ ޕާޓީން ވަކިވީ މިފަދަ ސަބަބަކާ ގުޅިގެން ކަމެއް އަދި ނޭނގެ އެވެ.
