ލަންޑަން (މެއި 29) - އާޖެންޓީނާ އަށް އުފަން ކޯޗު، މައުރީސިއޯ ޕޮޗެޓީނޯ، ދެ އަހަރުގެ ކޮންޓްރެކްޓެއްގައި ޗެލްސީއާ ހަވާލުވެއްޖެ އެވެ.
ޗެލްސީ އަކީ ޕޮޗެޓީނޯގެ 14 އަހަރުގެ ކޯޗިން ކެރިއަރުގައި އިރުޝާދުދޭނެ ފަސް ވަނަ ޓީމެވެ. މީގެ ކުރިން ޕޮޗެޓީނޯ ވަނީ ސްޕެއިނުގެ އެސްޕަންޔޯލާއި އިނގިރޭސި ދެ ކްލަބް ކަމަށްވާ ސައުތެމްޓަން އާއި ޓޮޓެންހަމްގެ އިތުރުން ފްރާންސްގެ ގަދަބާރު، ޕީއެސްޖީ އަށް ކޯޗުކޮށްދީފަ އެވެ.
ޕޮޗެޓީނޯ، 51، އަކީ ޗެލްސީ ހިންގުމާ އެމެރިކާގެ މަހުޖަނު ޓޮޑް ބޯލީ ހަވާލުވި ފަހުން، ޗެލްސީ އަށް އިރުޝާުދުދޭ ފުލްޓައިމް ތިން ވަނަ ކޯޗެވެ. އޭގެ އިތުރުން، ވަގުތީ ގޮތުން ޗެލްސީ އަށް ދެ ކޯޗުން އިރުޝާދު ދިނެވެ. އެ ގޮތުން ބޯލީ ހަވާލުވިއިރު، ފުރަތަމަ ހުރީ ޖަރުމަނުގެ ކޯޗު ތޯމަސް ޓުޗެލް އެވެ.
ޓުޗެލް ވަކިކޮށް ދިގު ކޮންޓްރެކްޓެއްގައި ގެނައީ ބްރައިޓަންގައި ހުރި ގްރަހަމް ޕޮޓާ އެވެ. ފަސް އަހަރުގެ ކޮންޓްރެކްޓެއް ދިން ޕޮޓާ ވަކިކުރީ ހަތް މަސް ދުވަސްތެރޭ އެވެ. ޕޮޓާ ވަކިކުރުމަށް ފަހު، ދެން ވަގުތީ ގޮތުން ޗެލްސީ އަށް އިރުޝާދުދިނީ ބްރޫނޯ ސަލްޓޯ އާއި ކުރިން ޗެލްސީ އަށް ކުޅެ ފަހުން، ކޯޗެއްގެ ގޮތުގައި ވެސް ހުރި ފްރޭންކް ލަމްޕާޑް އެވެ. ޗެލްސީ ސީޒަން ނިންމާލީ ލީގުގެ 12 ވަނައިގަ އެވެ. މިއީ 1994 ވަނަ އަހަރަށް ފަހު ޗެލްސީ އެންމެ ދަށްކޮށް ދިޔަ ފަަހަރެވެ.
ޖުލައި އެއް ވަނަ ދުވަހު ރަސްމީކޮށް ޕޮޗެޓީނޯ ޗެލްސީގެ މަސައްކަތާ ހަވާލުވާއިރު، އޭނާގެ ކޮންޓްރެކްޓްގައިވާ ގޮތުން ދެ އަހަރު ނިމުމަށް ފަހު އިތުރު އެއް އަހަރަށް އެއްބަސްވުން އާ ކުރެވޭނެ އެވެ. އެއީ ފުރަތަމަ ދެ އަހަރު ތެރޭ ޗެލްސީގެ ބޯޑު ހިތްހަމަޖެހޭ ވަރުގެ މަސައްކަތެއް ޕޮޗެޓީނޯ އަށް ކުރެވިއްޖެނަމަ އެވެ.
ޗެލްސީން ބުނީ ޕޮޗެޓީނޯ އަކީ އެ ކްލަބުން ދާން ބޭނުންވާ މިސްރާބަށް ބަލާއިރު، ތަފާތެއް ގެނެވިދާނެ ފަދަ ރަނގަޅު "ޓްރެކް ރެކޯޑް" އެއް އޮތް ކޯޗެއް ކަމަށެވެ.
ޕޮޗެޓީނޯ ކޯޗިން ކެރިއަރު ފެށީ 2009 ވަަނަ އަހަރު ސްޕެއިނުގެ އެސްޕަންޔޯލް އިންނެވެ. އެ ޓީމަށް ތިން އަހަރު އިރުޝާދު ދިނުމަށް ފަހު، ޕޮޗެޓީނޯ، 2013 ވަނަ އަހަރު ވަނީ އިނގިރޭސި ކްލަބް، ސައުތެމްޓަނާ ހަވާލުވެފަ އެވެ. އެ ޓީމުގައި އެއް އަހަރު ކުރި ރަނގަޅު މަސައްކަތާ އެކު، 2014 ވަނަ އަހަރު ޓޮޓެންހަމް ހޮޓްސްޕާސް އަށް ގެންދިޔަ އެވެ. ކޯޗިން ކެރިއަރުގައި މިހާތަނަށް ޕޮޗެޓީނޯ އެންމެ ރަނގަޅު މަސައްކަތެއް ކުރީ ޓޮޓެންހަމްގައި ހޭދަކުރި ފަސް އަހަރުގަ އެވެ. އެ ގޮތުން 2019 ވަނަ އަހަރުގެ ނޮވެމްބަރު މަހާ ހަމައަށް ޓޮޓެންހަމަށް ކޯޗުކޮށްދިންއިރު، އެ ޓީމަކީ ޗެމްޕިއަންސް ލީގުގައި ވާދަކުރެވޭނެ ޓީމަކަށް ހަދައި، ރަނގަޅު ސްކޮޑެއް އެކުލަވާލި އެވެ.
އެންމެ ފަހުން ޕޮޗެޓީނޯ، ކޯޗެއްގެ ގޮތުގައި ފެނިފައިވަނީ ޕީއެސްޖީންނެވެ. ފްރާންސްގެ ޗެމްޕިއަން ޕީއެސްޖީގެ ކޯޗުކަމުން މިދިޔަ ސީޒަނަށް ފަހު ޕޮޗެޓީނޯ ވަކިކުރިއިރު، އޭނާ ވަނީ އެ ޓީމަށް 18 މަސް ދުވަހު ކޯޗުކޮށްދީފަ އެވެ. ޕޮޗެޓީނޯ ވަނީ ޕީއެސްޖީ އަށް ފްރެންްޗް ލީގާއި ފްރެންޗް ކަޕް ހޯދައިދީފަ އެވެ.
