ލަންޑަން (މެއި 14) - އަންނަ ސީޒަނުން ފެށިގެން ޗެލްސީގެ ކޯޗުކަމާ ހަވާލުވާން އާޖެންޓީނާ އަށް އުފަން ކޯޗު، މައުރީސިއޯ ޕޮޗެޓީނޯ އެއްބަސްވުމަކަށް އަތުވެފައިވާ ކަމަށް ރިޕޯޓްތައް ބުނެފި އެވެ.
ޕޮޗެޓީނޯ، 51، އަކީ ޗެލްސީ ހިންގުމާ އެމެރިކާގެ މަހުޖަނު ޓޮޑް ބޯލީ ހަވާލުވި ފަހުން، ޗެލްސީ އަށް އިރުޝާުދުދޭ ފުލްޓައިމް ތިން ވަނަ ކޯޗެވެ. އޭގެ އިތުރުން، ވަގުތީ ގޮތުން ޗެލްސީ އަށް ދެ ކޯޗުން އިރުޝާދު ދިނެވެ.
ރިޕޯޓްތައް ބުނާގޮތުން ކޮންޓްރެކްޓްގެ ހުރިހާ ކަމެއް ހަމަޖެހިގެން ދިއުމާ އެކު ޗެލްސީން ރަސްމީކޮށް ޕޮޗެޓީނޯ އަކީ އެ ޓީމުގެ ކޯޗުކަން އިއުލާނުކުރާނެ އެވެ.
މި ސީޒަން ފެށިއިރު، ޗެލްސީގެ ކޯޗަކަށް ހުރި ތޯމަސް ޓުޗެލް، މިދިޔަ ސެޕްޓެމްބަރު މަހު ވަކިކުރިއިރު، ޓުޗެލްގެ ބަދަލުގައި ގެނައި، ގްރަހަމް ޕޮޓާ ވަނީ މީގެ މަހެއްހާ ދުވަސް ކުރިން މަގާމުން ދުރުކޮށްފަ އެވެ. ދިގު ކޮންޓްރެކްޓެއްގައި ޗެލްސީއާ އެކު ސޮއިކުރި ޕޮޓާ މަގާމުން ދުުރުކުރީ ހަތް މަސް ވެސް ނުވަނީހެވެ.
ސީޒަނުގެ ނިޔަލަށް ޗެލްސީގެ ކޯޗުކަަމާ ހަވާލުވީ ކުރިން އެ ޓީމަށް ކުޅެ، ކޯޗުކަން ވެސް ކޮށްދިން ފްރޭންކް ލަމްޕާޑް އެވެ. ޕޮޗެޓީނޯ، ރަސްމީކޮށް ޗެލްސީގެ ކޯޗުކަމާ ހަވާލުވާނީ މި ސީޒަން ނިމުމުންނެވެ.
އެންމެ ފަހުން ޕޮޗެޓީނޯ، ކޯޗެއްގެ ގޮތުގައި ފެނިފައިވަނީ ޕީއެސްޖީންނެވެ. ފްރާންސްގެ ޗެމްޕިއަން ޕީއެސްޖީގެ ކޯޗުކަމުން މިދިޔަ ސީޒަނަށް ފަހު ޕޮޗެޓީނޯ ވަކިކުރިއިރު، އޭނާ ވަނީ އެ ޓީމަށް 18 މަސް ދުވަހު ކޯޗުކޮށްދީފަ އެވެ. ޕޮޗެޓީނޯ ވަނީ ޕީއެސްޖީ އަށް ފްރެންްޗް ލީގާއި ފްރެންޗް ކަޕް ހޯދައިދީފަ އެވެ.
ޕޮޗެޓީނޯ ކޯޗިން ކެރިއަރު ފެށީ 2009 ވަަނަ އަހަރު ސްޕެއިނުގެ އެސްޕަންޔޯލް އިންނެވެ. އެ ޓީމަށް ތިން އަހަރު އިރުޝާދު ދިނުމަށް ފަހު، ޕޮޗެޓީނޯ، 2013 ވަނަ އަހަރު ވަނީ އިނގިރޭސި ކްލަބް، ސައުތެމްޓަނާ ހަވާލުވެފަ އެވެ. އެ ޓީމުގައި އެއް އަހަރު ކުރި ރަނގަޅު މަސައްކަތާ އެކު، 2014 ވަނަ އަހަރު ޓޮޓެންހަމް ހޮޓްސްޕާސް އަށް ގެންދިޔަ އެވެ. ކޯޗިން ކެރިއަރުގައި މިހާތަނަށް ޕޮޗެޓީނޯ އެންމެ ރަނގަޅު މަސައްކަތެއް ކުރީ ޓޮޓެންހަމްގައި ހޭދަކުރި ފަސް އަހަރުގަ އެވެ. އެ ގޮތުން 2019 ވަނަ އަހަރުގެ ނޮވެމްބަރު މަހާ ހަމައަށް ޓޮޓެންހަމަށް ކޯޗުކޮށްދިންއިރު، އެ ޓީމަކީ ޗެމްޕިއަންސް ލީގުގައި ވާދަކުރެވޭނެ ޓީމަކަށް ހަދައި، ރަނގަޅު ސްކޮޑެއް އެކުލަވާލި އެވެ.
