މާލޭ ލޯކަލް މާރުކޭޓު ތަރައްގީކޮށް، އާ އިމާރާތެއް އެޅުމަށް ސިޓީ ކައުންސިލުން އިއުލާނު ކުރި މަޝްރޫއު ޕްލޭނިން މިނިސްޓްރީއިން ހުއްޓުވައިފި އެވެ.
މިދިޔަ ހަފުތާ މާލެ ސިޓީގެ މޭޔަރު ޑރ. މުހައްމަދު މުއިއްޒު އިއުލާންކުރެއްވި އެ މަޝްރޫއު ހުއްޓުވުމަށް ޕްލޭނިން މިނިސްޓްރީއިން މި ހަފުތާގެ ތެރޭގައި ސިޓީއެއް ފޮނުވާފައިވާކަން "އަދަދު" އަށް ވަނީ ކަށަވަރުވެފަ އެވެ.
އެގޮތުން އެ ސިޓީގައި މިނިސްޓްރީން ވަނީ ސިޓީ ކައުންސިލްގެ މި މަޝްރޫއު ކުރިއަށް ގެންދެވޭނީ މާލޭ ޕްލޭނިން ގަވާއިދުގެ ދަށުން އެ މިނިސްޓްރީގެ ހުއްދަ ލިބި، ކޮންސެޕްޓު ޑިސައިން ފާސްކޮށްގެން ކަމަށެވެ.
މިހާރު ލޯކަލް މާރުކޭޓު ހިންގާ ބިމުގައި އެ އިމާރާތް އެޅުމަށް ސިޓީ ކައުންސިލުން އާންމުކުރި ޕްލޭނުގައި ބުނެފައިވާ ގޮތުން އެ ބިން ހުސްކުރުމަށްފަހު މިހާރު ގޮޅި ހިންގާ ފަރާތްތަކަށް މާލޭގެ ދެ ސަރަހައްދެއްގައި ވަގުތީ މާރުކޭޓުތަކެއް އެޅޭނެ އެވެ. ނަމަވެސް މިނިސްޓްރީން ވަނީ އެކަންވެސް ހުއްޓުވާފަ އެވެ.
އެގޮތުން ހައި ކޯޓު ކުރިމަތީ އޮންނަ، މިހާރު ވަގުތީގޮތުން ޕާކިންއަށް ބޭނުންކުރާ މާލޭ ކޮށި ނަމްބަރު 211 ގައި އެޅުމަށް ސިޓީ ކައުންސިލުން ނިންމި ވަގުތީ މާރުކޭޓު ނޭޅޭނެ ކަމަށް ވެސް އެ ސިޓީގައި ވަނީ ބުނެފަ އެވެ.
މިދިޔަ އަންގާރަ ދުވަހު ފޮނުވި އެ ސިޓީގައި މިނިސްޓްރީން ބުނީ އެ ބިމަކީ ދައުލަތުގެ ބޭނުމަށް ނަގާފައިވާ ބިމެއް ކަމަށެވެ.
މި މަޝްރޫއާ ގުޅޭގޮތުން މި ނޫހަށް މައުލޫމާތު ދެއްވަމުން މޭޔަރު މުއިއްޒު ވިދާޅުވީ މި މަޝްރޫއުގެ ކަންކަން މަޝްވަރާކޮށް ރާވަމުން ގެންދާތާ އަހަރެއްވެފައިވާ ކަމަށާއި މިހާރު އެ މަޝްރޫއު ވަނީ އިއުލާންކޮށްގެން، ކޮންޓްރެކްޓާ ފައިނޭންސިންގެ އުސޫލުން ބަޔަކާ ހަވާލުކޮށްފައި ކަމަށެވެ.
ޕްލޭނިން މިނިސްޓްރީގެ ސިޓީއާ ގުޅިގެން ސުވާލުކުރުމުން މުއިއްޒު ވިދާޅުވީ މަޝްރޫއު ހުއްޓުވިކަން އަދި އޭނާއަށް ނޭނގޭ ކަމަށެވެ. ނަމަވެސް ސިޓީ ކައުންސިލުން "ކޮންމެ ކަމެއް" ކުރަން އުޅުނަސް ސަރުކާރުން ދަތިކުރާ ކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ އެ މަޝްރޫއުގެ ދަށުން ބޭސްމަންޓު ހިމެނޭހެން ހަތަރު ފަންގިފިލާގެ އިމާރާތެއް އެޅުމަށް ސިޓީ ކައުންސިލުން ވަނީ ނިންމާފަ އެވެ. އެގޮތުން ބޭސްމަންޓުގައި ޕާކިން އޭރިއާ، ގްރައުންޑު ފްލޯގައި މަސްމާރުކޭޓު، 1-3 ވަނަ ފްލޯއަށް އާންމު މާރުކޭޓުތައް އެޅުމަށް ނިންމާފައިވާއިރު އެ އިމާރާތުގެ ޓެރަސް އެޅުމަށް ހަމަޖެހިފައިވަނީ ކުއްޔަށް ދެވޭ ކެފޭއެއްގެ ޑިޒައިނަށެވެ.
