ލަންޑަން (އޭޕްރީލް 25) - ޗެލްސީން އާ ކޯޗެއް ހޯދުމަށް ކުރަމުންދާ މަސައްކަތުގައި، އާޖެންޓީނާގެ ކޯޗު މައުރީސިއޯ ޕޮޗެޓީނޯއާ އެކު މަޝްވަރާތައް ކުރިއަށް ގެންދަމުންދާ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ އަހަރު ޕީއެސްޖީގެ ކޯޗުކަމުން ވަކިކުރި ފަހުން، ޕޮޗެޓީނޯ، 51، ހުރީ ޓީމަކާ ހަވާލުނުވެ އެވެ. ޕީއެސްޖީގެ ކޮންޓްރެކްޓެއްގައި ހުއްޓައި، އޭނާ ވަކިކުރިއިރު، އެ ކްލަބުން ވަނީ މި ސީޒަނުގެ ނިޔަލަށް އޭނާ އަށް ބަދަލުގެ ގޮތުގައި މުސާރަ ދޭން އެއްބަސްވެފަ އެވެ.
ޓޮޓެންހަމްގެ ކޯޗުގެ ގޮތުގައި ހޭދަކުރި ފަސް އަހަރުގެ ތެރޭ ޕޮޗެޓީނޯ ވަނީ ރަނގަޅު މަސައްކަތްތަކެއް ކޮށްފަ އެވެ. ޕޮޗެޓީނޯގެ އިރުޝާދުގެ ދަށުން 2019 ވަނަ އަހަރު ޗެމްޕިއަންސް ލީގުގެ ފައިނަލަށް ވެސް ޓޮޓެންހަމް ދަތުރުކުރި އެވެ. އެ ޓީމުގައި ފަހުގެ ތާރީހެއްގައި އެންމެ ގިނަ ދުވަސްވަންދެން ކޯޗެއްގެ ގޮތުގައި ދެމިހުރީ ޕޮޗެޓީނޯ އެވެ.
ޗެލްސީ އެންމެ ފުރަތަމަ ޕޮޗެޓީނޯއާ ވާހަކަދެއްކިއިރު، އެ ކްލަބާ ގުޅެން އޭނާ ބޭނުމެއްނުވި އެވެ. އެކަމަކު، ޕޮޗެޓީނޯ ބޭނުންވާ ގޮތަށް އޭނާ އަށް ބައެއް ބާރުތައް ދިނުމަށް ޗެލްސީން އެއްބަސްވެ، މަޝްވަރާތައް މިހާރު ކުރިއަށްދާ ކަމަށް ރިޕޯޓްތައް ބުނެ އެވެ.
ޗެލްސީގެ ކޯޗުކަމުން ގްރަހަމް ޕޮޓާ ވަކިކޮށް، މި ސީޒަންގެ ނިޔަލަށް އެ ކްލަބުގެ ކޯޗުކަން ވަނީ އެ ޓީމުގެ ކުރީގެ ކެޕްޓަން ފްރޭންކް ލަމްޕާޑްއާ ހަވާލުކޮށްފަ އެވެ.
ބަޔާންގެ ކުރީގެ ކޯޗު ހޫލިއަން ނާގަލްސްމަންއާ ވެސް ޗެލްސީން މަޝްވަރާކުރިއެވެ. އެކަމަކު، އެ މަޝްވަރާތައް ކުރިއަށް ނުދިޔައެވެ. ސަބަބަކީ ނާގަލްސްމަން ބޭނުންވާ ގޮތަށް ކަންކަން ކުރަން ޗެލްސީގެ ބޯޑުގެ މެޖޯރިޓީ ނުލިބުން ކަމަށް ޖަރުމަނުގެ މީޑިއާ ރިޕޯޓްތައް ބުނެ އެވެ.
ޗެލްސީއާ ދެން ހަވާލުވާނެ ކޯޗެއް ހޯދުމުގެ މަސައްކަތުގައި ޝޯޓްލިސްޓްކޮށްފައިވާ ކޯޗުންގެ ތެރޭގައި މެންޗެސްޓާ ސިޓީގެ ކުރީގެ ކެޕްޓަން ވިންސެންޓް ކޮމްޕެނީ ވެސް ހިމެނޭ ކަމަށް ވެސް ރިޕޯޓްތައް ބުނެ އެވެ.
