ލަންޑަން (ފެބްރުއަރީ 11) - ޗެލްސީ އަށް ކުޅެމުން އަންނަ ބްރެޒިލްގެ ތަޖުރިބާކާރު ޑިފެންޑަރު ތިއާގޯ ސިލްވާގެ ކޮންޓުރެކްޓް އަންނަ ސީޒަންގެ ނިޔަލަށް އާކޮށްފި އެވެ.
އުމުރުން 38 އަހަރުގެ ސިލްވާ ޕީއެސްޖީ ދޫކޮށް ޗެލްސީ އަށް ބަދަލުވީ 2020 ވަނަ އަހަރެވެ. ޗެލްސީއާ އެކު ސިލްވާ ވަނީ ޗެމްޕިއަންސް ލީގާއި ޔުއެފާ ސުޕަ ކަޕް އަދި ކްލަބް ވޯލްޑް ކަޕް ކާމިޔާބުކޮށްފަ އެވެ.
ޗެލްސީ އަށް މިހާތަނަށް 106 މެޗު ސިލްވާ ކުޅެދީފައިވާއިރު، އެފްއޭ ކަޕްގެ ދެ ފައިނަލާއި ލީގު ކަޕްގެ ފައިނަލެއް ވެސް ވަނީ ކުޅެދީފަ އެވެ.
ޗެލްސީން މި ސީޒަންގައި އާ ކުޅުންތެރިން ހޯދުމަށް 600 މިލިއަން ޑޮލަރަށް ވުރެ ބޮޑު ހޭދައެއްކުރި ނަމަވެސް، ސިލްވާ ދެމިހުރީ އެ ޓީމަށް މުހިންމު ކުޅުންތެރިއެއްގެ ގޮތުގަ އެވެ.
"އަހަރެން ފުރަތަމަ ޗެލްސީއާ ގުޅުނީ އެއް އަހަރު ދުވަހު ކޮންޓުރެކްޓެއްގެ ދަށުން. އެކަމަކު މިހާރު ހަތަރު ވަނަ އަހަރު މި ކުޅެނީ،" ސިލްވާ ބުންޏެވެ.
"ވަރަށް އުފާވެއްޖެ ޗެލްސީގެ ކޮންޓުރެކްޓް އާކޮށް، މި ކްލަބުގައި މަޑުކުރެވޭތީ."
ޗެލްސީގެ މެޖޯރިޓީ ހިއްސާގެ ވެރިޔާ، ޓޮޑް ބޯލީ އާއި ބެހެދާދް އެގްބާލީ ނެރުނު ބަޔާނެއްގައި ބުނީ ސިލްވާގެ ތަޖުރިބާ އާއި ލީޑަޝިޕަކީ މި ވަގުތު ޗެލްސީ އަށް ވަރަށް މުހިންމު ކަމެއް ކަމަށެވެ.
"ސިލްވާ އަކީ ދުނިޔޭގެ ފެންވަރުގެ ކުޅުންތެރިއެއް. އޭނާގެ ލީޑަޝިޕާއި ތަޖުރިބާއަކީ އަހަރަމެން ކުރިއަށް ދާން ވިސްނާއިރު ވަރަށް މުހިންމު ކަމެއް،" އެ ބަޔާނުގައި ބުނެފައިވެ އެވެ.
އިނގިރޭސި ޕްރިމިއާ ލީގުގައި މިއަދު ހަވީރު ކުޅޭ މެޗުގައި ޗެލްސީން ނުކުންނާނީ ރަށުންބޭރުގައި ވެސްޓް ހޭމް ޔުނައިޓެޑާ ދެކޮޅަށެވެ.
