ޕެރިސް (ފެބްރުއަރީ 2) - ޗެލްސީ އަށް ކުޅެމުން އަންނަ މޮރޮކޯގެ ވިންގް، ހަކީމް ޒިޔެޗް އަށް، ޓްރާންސްފާ މާކެޓްގެ ފަހު ދުވަހުގައި ފްރާންސްގެ ޗެމްޕިއަން ޕީއެސްޖީ އަށް ބަދަލުނުވެވުމާ ގުޅޭގޮތުން މީޑިއާގައި ގިނަ ވާހަކަތަކެއް ދެކެވޭއިރު، ގިނަ ތުހުމަތުތަކެއް ޗެލްސީ އާއި ޕީއެސްޖީ އަށް އަމާޒުވެއްޖެ އެވެ.
ޒިޔެޗް، 29، ވަނީ ހަ މަސް ދުވަހުގެ ލޯން އެއްބަސްވުމެއްގެ ދަށުން ޕީއެސްޖީ އަށް ބަދަލުވުމަށް، މެޑިކަލް ހަދައި، ކޮންޓްރެކްޓަކާ މެދު ވެސް ހުރިހާ ކަމެއް ފައިނަލްކޮށްފަ އެވެ. އެކަމަކު، ޗެލްސީ އާއި ޕީއެސްޖީން ފަހު ވަގުތު ޒިޔެޗްގެ ޓްރާންސްފާ ރަޖިސްޓްރީ ކުރަން ފޮނުވަން ޖެހޭ ލިޔެކިޔުންތައް ވަގުތަށް ފުރިހަމަކޮށްފައި ނުވާތީ، ޒިޔެޗްގެ ޑީލް އެއްކޮށް ނިންމައިނުލެވުނެވެ.
ފްރާންސްގެ މީޑިއާ ރިޕޯޓްތައް ބުނާގޮތުން، ޒިޔެޗް ގެންދަން ޕީއެސްޖީން ދޭން އެއްބަސްވި ލޯން ފީއާ މެދު ފަހު ވަގުތު ޗެލްސީން ހިތްހަމަނުޖެހި، ގަސްދުގައި ލިޔެކިޔުންތައް ވަގުތަށް ނުފޮނުވީ އެވެ. ފްރާންސްގެ ލެކިއުޕޭ ނޫހުން ރިޕޯޓްކުރާ ގޮތުގައި ޗެލްސީން ބެންފީކާގެ އެންޒޯ ފެނާންޑޭސްގެ ޑީލް ނިންމަން ހާއްސަ ސަމާލުކަމެއް ދިނުމުގެ ގޮތުން، ޒިޔެޗްގެ ޑީލްގައި ފަރުވާ ކުޑަކޮށްލީ އެވެ. އަދި ޒިޔެޗްގެ ޓްރާންސްފާއާ ގުޅޭ ނުރަނގަޅު ތިން ލިޔުމެއް ޗެލްސީން ފޮނުވި ކަމަށް ވެސް ފްރާންސް ނޫސްތަކުން ވަނީ ރިޕޯޓްކޮށްފަ އެވެ.
އެކަމަކު، އިނގިރޭސި މީޑިއާތަކުން ރިޕޯޓްކުރާ ގޮތުގައި ޒިޔެޗްގެ ޓްރާންސްފާ ރަޖިސްޓްރީ ކުރުމުގައި ލަސްތަކެއް އުޅުނީ ޕީއެސްޖީގެ ފަރާތުންނެވެ.
ކުރިން އަޔަކްސް އަށް ކުޅުނު ޒިޔެޗްގެ ކޮންޓްރެކްޓް ރަޖިސްޓްރީ ކުރަން ފުރުސަތެއް ދޭތޯ، ފްރެންޗް ފުޓްބޯޅަ ލީގު ހިންގާ އެލްއެފްޕީ ކައިރިން ޕީއެސްޖީން އެދުނެވެ. އެހެން ނަމަވެސް އެ އަށް އެއްބާރުލުމެއް ލިބޭ ގޮތެއް ނުވެ، ޒިޔެޗްގެ ޓްރާންސްފާގެ ދޮރުތައް ޕީއެސްޖީ އަށް އެއްކޮށް ބަންދުވީ އެވެ.
މިހާރު މި ދިމާވި ގޮތުން، ޒިޔެޗް އަށް މި ވަނީ ސީޒަނުގެ ނިޔަލަށް ޗެލްސީގައި މަޑުކުރަން ޖެހިފަ އެވެ. ޗެލްސީން މި މަހު އެކަނި ވެސް އަށް ކުޅުންތެރިން ގެނެސްފައިވާއިރު، ޒިޔެޗަށް މެޗުތަކުގައި ކުޅެލަން ލިބޭ ފުރުސަތު ކުރިއަށް ވުރެ ވެސް މަދުވާނެ އެވެ.
