މޯލްޑިވްސް ޕޫލް ބިލިއާޑް އެސޯސިއޭޝަން (އެމްބީޕީއޭ) އިން އިންތިޒާމްކޮށްގެން ކުރިއަށްގެންދާ 8 ބޯލް ޗެމްޕިއަންޝިޕްގެ ފިރިހެން ފައިނަލުން އިސްމާއިލް ސުވެއިދު އާއި ހަސަން ޝާޒް އަހުމަދު ޖާގަ ހޯދިއިރު، އަންހެން ބައިގެ ފައިނަލުން އާމިނަތު އަޒުރާ އާއި ދީނާ އަހުމަދު ޖާގަ ހޯދައިފި އެވެ.
އެމްޕީބީއޭ މާލޭ ބިލިއާޑް ސެންޓަރުގައި ކުރިއަށްދާ މުބާރާތުގެ ފިރިހެން ބައިގެ ފުރަތަމަ ޖާގަ ސުވެއިދު ހޯދީ ސެމީ ފައިނަލް ފުރަތަމަ މެޗުގައި ޝާޒްގެ މައްޗަށް 9-7 ފްރޭމުން ކުރި ހޯދައިގެންނެވެ.
ޑަބަލް އެލިމިނޭޝަން އުސޫލުން ކުޅޭ މުބާރާތުގެ ވިނާސް ބްރެކެޓްގައި ސުވެއިދު ވަނީ ސެމީ ފައިނަލުގެ ކުރިން މި މުބާރާތުގައި ރަނގަޅު ފޯމެއްގައި ކުޅެމުން އައި އަހުސަން ހާޝިމް 9-2 ފްރޭމުން ބަލިކޮށްފަ އެވެ. ޝާޒް ވިނާސް ބްރެކެޓުގެ ސެމީ ފައިނަލުން ޖާގަ ހޯދީ މުހައްމަދު ޝާރީފް (ކުޑަ ޝަރީ) 9-5 ފްރޭމުން ބަލިކޮށްގެންނެވެ.
ވިނާސް ބްރެކެޓުގެ ސެމީ ފައިނަލުން ބަލިވި ނަމަވެސް ޝާޒް ވަނީ ލޫޒާސް ބްރެކެޓުގެ ފަހު މެޗުގައި މުހައްމަދު ޝަރީފް ބަލިކޮށް ފައިނަލުގެ ފަހު ޖާގަ ހޯދާފަ އެވެ. އެ މެޗު ޝާޒް ކާމިޔާބުކުރީ 9-2 ފްރޭމުންނެވެ. މި މެޗުން ބަލިވުމުން ޝަރީފަށް ލިބުނީ މުބާރާތުގެ ތިން ވަނަ އެވެ.
ހަތަރު ވަނަ އަށް ދިޔައީ ލުޒާސް ބްރެކެޓުގައި ޝަރީފް އަތުން ބަލިވެގެން ކެޓި އަހުސަން ހާޝިމް އެވެ. މި މެޗުން އަހުސަން ބަލިވީ 9-5 ފްރޭމުންނެވެ. އަހުސަން ވަނީ މިދިޔަ އަހަރު އެންމެ ކާމިޔާބު ކުޅުންތެރިޔާ ހުސައިން ފަޔާޒު ލޫޒާސް ބްރެކެޓުގައި ކަޓުވާލައިފަ އެވެ. އަހުސަން އަތުން ފަޔާޒު ބަލިވީ 9-4 ފްރޭމުންނެވެ.
މުބާރާތުގެ މެޗެއްގެ ތެރެއިން އަޒްރާ: އަޒްރާ ވަނީ ފައިނަލުން ފުރުސަތު ހޯދާފައި.--- ފޮޓޯ: އެމްޕީބީއޭ
މި އަހަރުގެ ފުރަތަމަ ބިލިއާޑް މުބާރާތުގެ އަންހެން ބައިގެ ފައިނަލުގެ ފުރަތަމަ ޖާގަ ހޯދީ ދީނާ އަހުމަދު އެވެ. ދީނާ ވަނީ ވިނާޒް ބްރެކްޓުގައި އާމިނަތު އަޒުރާ އަތުން 5-1 ފްރޭމުން މޮޅުވެފަ އެވެ.
ދީނާ އަތުން ބަލިވި ނަމަވެސް އަޒުރާ ވަނީ ބަލިވި ފަޅިން ކުޅުނު ސެމީ ފައިނަލު މެޗު ކާމިޔާބުކޮށް ފައިނަލުން ޖާގަ ހޯދައިފަ އެވެ. އާމިނަތު ހަލީމް (ދިލް)އާ ވާދަކޮށް އެ މެޗު އަޒުރާ ކާމިޔާބު ކުރީ 5-1 ފްރޭމުންނެވެ. ދިލް އަށް މުބާރާތުގެ ތިން ވަނަ ލިބުނުއިރު އަންހެން ބައިގެ ހަތަރު ވަނަ ލިބުނީ ބަލި ފަޅީގައި ދިލް އަތުން ބަލިވި އާމިނަތު އަޒީމާ އެވެ.
މިހާރު ކުރިއަށްދާ، 8 ބޯލް ޗެމްޕިއަންޝިޕްގެ އަންހެން އަދި ފިރިހެން ބައިގެ ފައިނަލް މެޗު ކުޅުމަށް ހަމަޖެހިފައިވާނީ މިރޭ އެވެ. މިރޭ 8 ޖަހާއިރު ކުޅޭ ދެ މެޗުވެސް އެމްޕީބީއޭގެ ޔޫޓިއުބު ޗެނަލުން ލައިވް ސްޓްރީމް ކުރާނެ އެވެ.
