ގައުމީ ފުޓްބޯޅަ ޓީމުގެ އެސިސްޓަންޓް ކޯޗަކަށް މިދިޔަ އަހަރު މަސައްކަތް ކުރި ޕޯޗުގަލްގެ ސިމާއޯ ކޮސްޓާ އަށް ދޭން ޖެހޭ ފައިސާ ދައްކަން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފީފާ އިން އެންގި ގޮތަށް އެ ފައިސާ އަދާކޮށްފި އެވެ.
ގައުމީ ޓީމުގެ ހެޑް ކޯޗު އިޓަލީގެ ފްރެންޗެސްކޯ މޮރިއޭރޯގެ އެސިސްޓެންޓް ކޯޗެއްގެ ގޮތުގައި ސިމާއޯ ހަމަޖެއްސީ 2021 ވަނަ އަހަރުގެ ޑިސެމްބަރު މަހު އެވެ. ސިމާއޯ އަށް މިދިޔަ އަހަރު ޖެނުއަރީ މަހުން ފެށިގެން ނުލިބި ހުރި މުސާރަ އަށް ވާ ފައިސާ ހޯދަން، އޭނާގެ ފަރާތުން މައްސަލަ، ފީފާ އަށް ހުށަހެޅީ މިދިޔަ ސެޕްޓެމްބަރު މަހު އެވެ. ސިމާއޯ އަށް ދޭން ޖެހޭ މުސާރަ އަށް ވާ 35،000 ޑޮލަރު (539،000 ރުފިޔާ)، ދައްކަން ފީފާ އިން ދިނީ 45 ދުވަހުގެ ތެރޭގަ އެވެ.
ސިމާއޯ، ވަނީ އޭނާ އަށް ފައިސާ ދީފައިވާކަމަށް މީޑިއާގައި ބުނެފަ އެވެ. "އަދަދު" އަށް އެނގިފައިވާ ގޮތުގައި ސިމާއޯ އަށް ދޭން ޖެހޭ ފައިސާ އެފްއޭއެމުން ދީފައިވަނީ ފީފާގެ އެންގުމުގައިވާ ގޮތަށެވެ.
ގައުމީ ޓީމުގެ އެސިސްޓަންޓް ކޯޗުގެ މަގާމުން ވަކިވުމަށް ފަހު ސިމާއޯ ވަނީ އޭނާގެ ސޯޝަލް މީޑިއާގައި ރާއްޖޭގެ ފުޓްބޯޅައިގައި ހުރި މައްސަލަތައް ކަމަށް ބުނެ، ގިނަ ވާހަކަތަކެއް ހިއްސާކޮށްފަ އެވެ. އެ ޕޯސްޓްތަކުގައި ރާއްޖޭގެ ފުޓްބޯލް އެސޯސިއޭޝަންގެ އިދާރީ ހިންގުމާއި އެހެނިހެން ކަންކަމަށް ވެސް ފާޑުކިޔައިފައިވެ އެވެ. އެކަމަކު، ފަހުން އޭނާ ވަނީ ސޯޝަލް މީޑިއާގައި ޕޯސްޓް ކުރި ހުރިހާ އެއްޗެއް ޑިލީޓްކޮށްލައިފަ އެވެ.
ގައުމީ ޓީމު އެންމެ ފަހުން، ސިންގަޕޫރާއި މެލޭޝިއާއާ ދެކޮޅަށް ކުުޅުނު މެޗުތަކުގައި ނަތީޖާ އާއި ކޯޗު މޮރިއޭރޯ އަށް ފާޑުކިޔުމަށް ވެސް ސިމާއޯ ވަނީ ސޯޝަލް މީޑިއާގައި އޭނާގެ ވިސްނުންތަކެއް ހިއްސާކޮށްފަ އެވެ.
މިދިޔަ ދެތިން އަހަރެއްހާ ދުވަހު ގައުމީ ޓީމުތަކަށް އިރުޝާދުދިން އެކި އޮފިޝަލުން ވަނީ މުސާރަ ނުލިބޭ މައްސަލައިގައި ފީފާ އަށް އެކަން ހުށަހަޅައިގެން ކާމިޔާބު ހޯދައިފަ އެވެ.
އެ ގޮތުން، އަންހެން ފުޓްބޯޅަ ޓީމުގެ ކޯޗަކަށް މިދިޔަ އަހަރު ހުރި ސާބިއާގެ ޑޭބޯ ބާބާ އާއި ކުރިން، ގައުމީ ޓީމުގެ ހެޑް ކޯޗަކަށް ކުރިން ހުރި މާޓިން ކޫޕްމަން އަދި އޭނާގެ އެސިސްޓަންޓް ކޯޗަކަށް ހުރި ރެނޭ ހިޑިންކް އަށް ދޭން ޖެހޭ މުސާރަ ދޭން ވެސް ފީފާ އިން އެފްއޭއެމަށް ވަނީ އަންގައިފަ އެވެ.
އެނގިފައިވާ ގޮތުގައި، އެފްއޭއެމުން ވަނީ ގައުމީ އަންހެން ޓީމުގެ ކޯޗަކަށް ހުރި ބާބާ އަށް ދޭން ޖެހޭ 39،919.34 ޑޮލަރު (615،556 ރުފިޔާ) ދައްކައިފަ އެވެ. ރެނޭ އަށް ދޭން ޖެހޭ ފައިސާގެ ޖުމްލަ އަދަދު 2.9 މިލިއަން ރުފިޔާ (187,375 ޑޮލަރު) އަށް އަރާއިރު، ކޫޕްމަން އަށް ދޭން ޖެހޭ ފައިސާގެ އަދަދުތަކެއް މީޑިއާގައި ހާމަކޮށްފައެއް ނުވެ އެވެ.
ގައުމީ ފުޓްބޯޅަ ޓީމު 2021 ވަނަ އަހަރުގެ އޮކްޓޫބަރު މަހު، މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު)ގެ ދައުވަތަކަށް، ޅ. ކުރެއްދޫގައި ކުޅުނު އެކްޒިބިޝަން މެޗުން މޮޅުވުމުން އެ ޓީމަށް އިނާމެއްގެ ގޮތުގައި ދިން 1.2 މިލިއަން ރުފިޔާ ކުޅުންތެރިންނަށް ލިބިފައިނުވާތީ، އެކަމާ ކުޅުންތެރިންގެ ހިތްހަމަނުޖެހުންތަކެއް އެބަހުއްޓެވެ.
