މިލާން (ޖެނުއަރީ 22) - އިޓާލިއަން ލީގުގައި މިރޭ ސެލަނިޓާނާ ދަނޑުގައި 2-0 އިން މޮޅުވެ، ނަޕޯލީން ލީގުގެ އެއް ވަނައިގައި 12 ޕޮއިންޓުގެ ލީޑެއް ނަގައިފި އެވެ.
މި ނަތިޖާއާ އެކު ނަޕޯލީ އަށް ވަނީ 19 މެޗުން 50 ޕޮއިންޓް ލިބިފަ އެވެ. ދެ ވަނައިގައި އޮތް އޭސީ މިލާނަށް 18 މެޗުން 38 ޕޮއިންޓް ލިބިފައިވާއިރު، ތިން ވަނައިގައި އޮތް އިންޓަ މިލާނަށް ވަނީ 18 މެޗުން 37 ޕޮއިންޓް ލިބިފަ އެވެ. އިޓަލީ ފުޓްބޯޅަ ފެޑެރޭޝަނުން، ޔުވެންޓަސްގެ 15 ޕޮއިންޓް އުނިކުރަން ނިންމުމާ އެކު އެ ޓީމުގެ މިހާރު އޮތީ 18 މެޗުން 22 ޕޮއިންޓެވެ. މިހާރު، ލީގުގެ ހަތަރެއްގައި އޮތީ، 18 މެޗުން 34 ޕޮއިންޓާ އެކު ލާޒިއޯ އެވެ.
ސެލަަނިޓާނާ އިން އެ ޓީމުގެ ކޯޗު، ޑޭވިޑޭ ނިކޯލާ ވަކިކުރިތާ 48 ގަޑިއިރު ފަހުން، އަނެއްކާވެސް އޭނާ އަށް މަގާމު ދިން ފަހުން އެ ޓީމު ކުޅުނު ފުރަތަމަ މެޗުގައި، މިރޭ ނަޕޯލީން ވަނީ ފުރަަތަމަ ހާފުގެ އިތުރު ވަގުތާއި ދެ ވަނަ ހާފުގެ ކުރީކޮޅުގައި ގޯލު ޖަހައިފަ އެވެ.
ނަޕޯލީ އަށް ލީޑުނަގައިދިނީ ފުރަތަމަ ހާފުގެ އިތުރު ވަގުތުގެ ތިން ވަނަ މިނިޓްގައި، އެ ޓީމުގެ ފުލްބެކް، ޖިއޮވާނީ ޑި ލޮރެންޒޯ އެވެ. ނަޕޯލީގެ މިޑްފީލްޑަރު، ޒަމްބޯ އަންގީސާ ތަނަވަސްކޮށްދިން ފުރުސަތަކުން ޑި ލޮރެންޒޯ ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގެ ކުޅުން ފެށިގެން ތިން މިނިޓް ތެރޭ، ނަޕޯލީ އަށް ކުޅޭ ނައިޖީރިއާގެ ފޯވާޑް ވިކްޓަ އޮސީމެން ގޯލު ޖެހީ އޭރިއާތެރެއިން ލިބުނު ރީބައުންސް ބޯޅައަކުންނެވެ. މިއީ ނަޕޯލީގެ ވިންގް، އެލްޔިފް އެލްމާސް ޖެހި ޝޮޓެއް ދަނޑީގައި ޖެހިފައި އައި ވަގުތު އޮސީމެން ޖެހި ގޯލެކެވެ. މިއީ ލީގުގައި އޮސީމެން ޖެހި 13 ވަނަ ލަނޑެވެ.
ލީގުގެ 16 ވަނައިގައި އޮތް ސެލަނިޓާނާ އިން ވެސް ރަނގަޅު ހަމަލާއެއް ފޮނުވާލި އެވެ. ސެލަނިޓާނާގެ ޕޮލެންޑް ފޯވާޑް، ކްރިސްޓޮފް ޕިއޮންޓެކް ފޮނުވާލި ބޯޅަ ނަޕޯލީގެ ކީޕަރު އަލެކްސް މެރެޓް ވަނީ މަތަކޮށްފަ އެވެ.
ނަޕޯލީން ލީގުގެ ކުރީގައި ބޮޑު ލީޑެއްނެގިއިރު، ލީގުގެ ރޭހުގައި ދެން އޮތް މިލާންގެ ދެ ޓީމުގެ މެޗުތައް އޮތީ ހަފްތާގެ މެދުތެރޭގަ އެވެ. އިންޓަ އިން އެމްޕޮލީއާ ކުޅޭއިރު، މިލާން ކުޅޭނީ ލާޒިއޯއާ އެވެ. ނަޕޯލީން މަސައްކަތް ކުރަމުން އަންނަނީ 1990 ވަނަ އަހަރުގެ ފަހުން ފުރަތަމަ ފަހަރަށް ލީގު ޗެމްޕިއަންކަން ހޯދުމަށެވެ.
