ލަންޑަން (ޖެނުއަރީ 12) - އެތުލެޓިކޯ މެޑްރިޑަށް ކުޅެމުންދިޔަ ޕޯޗުގަލްގެ ޕްލޭމޭކަރު، ޔާއޯ ފެލިކްސް، ލޯނު އެއްބަސްވުމެއްގެ ދަށުން މި ސީޒަންގެ ނިޔަލަށް ޗެލްސީއާ ގުޅިއްޖެއެވެ.
ޗެލްސީ އަށް މި ސީޒަންގެ ނިޔަލަށް ފެލިކްސް ގުޅުނުއިރު، އެތުލެޓިކޯ އިން އޭނާ ދޫކުރީ އިތުުރު އެއް އަހަރަށް އެ ކްލަބުގެ ކޮންޓުރެކްޓް އާކުރުމަށް ފަހު އެވެ. އެ ކްލަބާ އެކު އޭނާ ހަދާފައިވާ ކޮންޓުރެކްޓް މިހާރު ހަމަވާނީ 2027 ވަނަ އަހަރެވެ. ފެލިކްސް ،23، ޗެލްސީ އަށް ލޯނު އެއްބަސްވުމެއްގައި ސޮއިކުރީ 13 މިލިއަން ޑޮލަރުގެ ފީއަކާއެކު އެވެ. އަދި މުޅި މުސާރަ އެއްކޮށް ދައްކާނީ ވެސް ޗެލްސީންނެވެ.
އިންޖަރީގެ ގިނަ މައްސަލަތަކެއް ކުރިމަތިވެފައިވާ ޗެލްސީ މި ވަގުތު އޮތީ އިނގިރޭސި ޕްރިމިއާ ލީގު ތާވަލްގެ 10 ވަނައިގަ އެވެ. މި ފަހަކަށް އައިސް ނެރުނު ނަތީޖާތައް ދަށްވުމާ އެކު ޗެލްސީގެ ކޯޗު ގްރަހަމް ޕޮޓާ އަށް ވަނީ ޕްރެޝަރު ބޮޑުވެފަ އެވެ.
"ޗެލްސީ އަކީ ދުނިޔޭގެ އެންމެ ބޮޑު އެއް ކްލަބު. އަހަރެން އުންމީދުކުރަނީ އެ ކްލަބުގެ އަމާޒުތައް ހާސިލްކުރުމަށް އަހަންނަށް އެހީވެވޭނެ ކަމަށް،" ޗެލްސީގެ ރަސްމީ ވެބްސައިޓް މެދުވެރިކޮށް، އެ ކްލަބަށް ބަދަލުވުމަށް ފަހު ދެކޭ ގޮތް ހިއްސާކުރުމަށް ނެރުނު ބަޔާނެއްގައި ފެލިކްސް ބުނެފައިވެ އެވެ.
ފެލިކްސް ވަނީ ޗެލްސީ ޓީމުގައި ރަނގަޅު ކުޅުމެއް ދެއްކޭނެ ކަމުގެ އުންމީދު އެބައޮތް ކަމަށް ބުނެފައި.
ޗެލްސީގެ ކޯޗު، ޕޮޓާ ބުނީ ފެލިކްސް އަކީ ޒުވާން ކުޅުންތެރިޔަކަށް ވިޔަސް، އޭނާގެ ތަޖުރިބާ މަދެއް ނޫން ކަމަށެވެ.
"ފެލިކްސް ޓީމާ ގުޅުމުން އަހަރަމެންގެ ސްކޮޑު ކުރިއަށް ވުރެ ރަނގަޅުވާނެ. އިންޖަރީތަކާ ހެދި ފެލިކްސް ހޯދަން އިތުރު މަސައްކަތްތަކެއް ކްލަބުންކުރީ،" ޕޮޓާ ބުންޏެވެ.
ޕޯޗުގަލްގެ ބެންފީކާ ދޫކޮށް، 2019 ވަނަ އަހަރު، ޔާއޯ ފެލިކްސް، 23، 142 މިލިއަން ޑޮލަރުގެ ޓްރާންސްފާ ފީ އަކަށް އެތުލެޓިކޯ އަށް ބަދަލުވިއިރު، ފެލިކްސް ވަނީ އެ ކްލަބަށް މިހާތަނަށް ކުޅުނު 131 މެޗުން 34 ލަނޑު ޖަހައިފަ އެވެ. އެ ކްލަބާ އެކު އޭނާ ވަނީ 2021 ވަނަ އަހަރު ސްޕެނިޝް ލީގު ކާމިޔާބުކޮށްފަ އެވެ.
ޗެލްސީން ފެލިކްސް ގެނައިއިރު، އެ ޓީމަށް ކުޅޭ އެމެރިކާގެ ފޯވާޑް، ކްރިސްޓިއަން ޕުލިސިޗަށް ލިބިފައިވާ އަނިޔާގެ ސަބަބުން މަހަކަށް ވުރެ ގިނަ ދުވަހަށް އޭނާ ކުޅުމާ ދުރުގައި ހުންނަން ޖެހޭނެ އެވެ.
މި ފަހަރުގެ ޓްރާންސްފާ ބާޒާރުގައި އެންމެ އެކްޓިވް ކްލަބެއްގެ ގޮތުގައި ފެންނަނީ ޗެލްސީ އެވެ. ފެލިކްސް އަކީ މި ފަހަރު ޗެލްސީ އަށް ބަދަލުވި ހަތަރު ވަނަ ކުޅުންތެރިޔާ އެވެ.
ފެލިކްސްގެ ކުރިން، ޗެލްސީން ގެނައީ، 13 މިލިއަން ޑޮލަރު ދީފައި، ނޯވޭގެ މޯލްޑާ އިން ، އައިވަރީ ކޯސްޓްގެ ފޯވާޑް، ޑޭވިޑް ޑަޓްރޯ ފޮފާނާ އާއި 42 މިލިއަން ޑޮލަރު ދައްކާފައި މޮނާކޯ އިން ގަތް ފްރާންސްގެ ޑިފެންޑަރު، ބެނޮއިޓް ބާޑިއަޝިލް އަދި ބްރެޒިލްގެ ވަސްކޮޑަ ގަމާ އަށް 14 މިލިއަން ޑޮލަރު ދޭ ގޮތަށް އެއްބަސްވި ޑީލެއްގެ ދަށުން ހޯދި ބްރެޒިލްގެ މިޑްފީލްޑަރު އަންދްރޭ ސަންޓޯސް އެވެ.
