އަޑެލެއިޑް، އޮސްޓްރޭލިއާ (ޖެނުއަރީ 9) - މި މަހު 16 ވަނަ ދުވަހު ފަށާ އޮސްޓްރޭލިއަން އޯޕަންގައި ވާދަކުރަން ތައްޔާރުވުމުގެ ގޮތުން އަޑެލެއިޑް އިންޓަނޭޝަނަލް މުބާރާތުގައި ކުޅެ، މަޝްހޫރު ޓެނިސް ކުޅުންތެރިޔާ، ނޮވަކް ޖޮކޮވިޗް، މުބާރާތުގެ ޗެމްޕިއަންކަން ހޯދައިފި އެވެ.
މިއީ މިދިޔަ އަހަރު ކޮވިޑް-19 ވެކްސިންގެ މައުލޫމާތު މައްސަލައިގައި، އޮސްޓްރޭލިއާ އިން ޑީޕޯޓްކޮށްލި ފަހުން، އަލުން އެނބުރި އައިސް ޖޮކޮވިޗް އޮސްޓްރޭލިއާގައި ކުޅުނު ފުރަތަމަ މުބާރާތެވެ. އަޑެލެއިޑް އިންޓަނޭޝަނަލްގެ ފައިނަލުގައި ޖޮކޮވިޗް ވަނީ އެމެރިކާގެ ސެބަސްޓިއަން ކޯޑާ އަތުން 6-7، 7-6، 6-4 އިން މޮޅުވެފަ އެވެ.
މި ވަގުތު ރޭންކިންގެ ފަސް ވަނައިގައި އޮތް ޖޮކޮވިޗް ވަނީ ކެރިއަރުގައި އޭޓީޕީ މާސްޓާސްގެ 92 ސިންގަލްސް ތަށި ހޯދައިފަ އެވެ. ޖޮކޮވިޗަށް ވުރެ، އޭޓީޕީ މާސްޓާސް ސިންގަލްސް ތަށި ގިނައީ، ރޮޖާ ފެޑެރާ، ޖިމީ ކޮނާސް އަދި އިވާން ލެންޑްލް އެވެ. ޖޮކޮވިޗާއި ރަފައެލް ނަޑާލް ވަނީ އެއްވަރަކަށް އޭޓީޕީ މާސްޓާސް ސިންގަލްސް ތަށި ހޯދައިފަ އެވެ.
ޖޮކޮވިޗް ބުނީ އޮސްޓްރޭލިއާ އަށް އެނބުރި އައިސް މި ވޭތުވެދިޔަ 10 ވަރަކަށް ދުވަސް ދިޔައީ ވަރަށް ފުރިހަމަކޮށް ކަމަށެވެ.
"މިދިޔަ 10 ވަރަކަށް ދުވަހުގައި އަހަންނަށް އޮސްޓްރޭލިއާ އިން ލިބެމުންދިޔަ ފަދަ ސަޕޯޓެއް، އަަހަރެންގެ ހަޔާތުގައި ވެސް ތަޖުރިބާ ކުރެވިފައިވަނީ މަދު ފަހަރަކު. އަހަންނަށް ސަޕޯޓް ދޭން ކޮންމެ މެޗަކަށް ވެސް ގިނަ ބަޔަކު އައިސްފައިވޭ، އެ އެންމެނަށް ޝުކުރު އަދާކުރަން ބޭނުން،" ޖޮކޮވިޗް ބުންޏެވެ.
އަންނަ ހަފްތާގައި ފަށާ އޮސްޓްރޭލިއަން އޯޕަން އަށް ޖޮކޮވިޗްގެ ހާއްސަ އަމާޒެއް އެބައޮތެވެ. އެއީ 10 ވަނަ ފަހަރަށް އޮސްޓްރޭލިއަން އޯޕަންގެ ތަށި ހޯދުމުގެ އިތުރުން އެންމެ ގިނަ ގްރޭންޑް ސްލޭމް ތަށި ހޯދައިގެން ނަޑާލް ހަދާފައިވާ ރެކޯޑާ ހަމަކުރުމެވެ. ނަޑާލް 22 ގްރޭންޑް ސްލޭމް ތަށި އުފުލާލާފައިވާއިރު، އެ ރެކޯޑާ އެއްވަރުކުރަން ޖޮކޮވިޗަށް މަދުވަަނީ އެއް ތަށްޓެވެ.
