ލަންޑަން (ޖެނުއަރީ 6) - އިނގިރޭސި ޕްރިމިއާ ލީގުގައި ރޭ ޗެލްސީ އަތުން 1-0 އިން މޮޅުވެ، މެންޗެސްޓާ ސިޓީން ލީގުގެ އެއް ވަނައިގައި އޮތް އާސެނަލާ ދެމެދު ފަސް ޕޮއިންޓަށް ފަރަގު ކުޑަކޮށްފި އެވެ.
މި ހަފްތާގައި އާސެނަލް ކުޅުނު މެޗުން ނިއުކާސަލް ޔުނައިޓެޑާ ލަނޑެއް ނުޖެހި ވީ އެއްވަރެވެ. އެހެންވެ، ސިޓީ އަށް އޮތީ ލީގުގެ ރޭހުގައި ކުރިއަށް ޖެހިލަން ފުރުސަތެއް ލިބިފަ އެވެ.
މި ބުރުގެ ނަތީޖާތަކަށް ފަހު، އާސެނަލް އެއް ވަނައިގައި އޮތީ 17 މެޗުން 44 ޕޮއިންޓާ އެކު އެވެ. ދެ ވަނައިގައި ސިޓީ އޮތީ 17 މެޗު ކުޅެގެން 39 ޕޮއިންޓާ އެކު އެވެ. ތިން ވަނައިގައި އޮތް ނިއުކާސަލް އަށް 18 މެޗުން ވަނީ 35 ޕޮއިންޓް ލިބިފަ އެވެ. މެންޗެސްޓާ ޔުނައިޓެޑް، ހަތަރެއްގައި އޮތީ 17 މެޗުން 35 ޕޮއިންޓް ހޯދައިގެންނެވެ.
ޗެލްސީގެ ސްޓެމްފޯޑް ބްރިޖުގައި ރޭ ކުޅުނު މެޗު ފަށައިގެން އެ ޓީމަށް ދިމާވި އެންމެ ބޮޑު މައްސަލަ އަކީ އަނިޔާގެ ސަބަބުން ދެ ބަދަލެއް މެޗުގެ ކުރީކޮޅުގައި ގެންނަން ޖެހުމެވެ. އެ ގޮތުން ފުރަތަމަ 22 މިނިޓް ތެރޭ އަނިޔާގެ ސަބަބުން ޗެލްސީން ވަނީ ރަހީމް ސްޓާލިން އާއި ކްރިސްޓިއަން ޕުލިސިޗްގެ ބަދަލުގައި ޕިއޭ އެމެރިކް އޮބާމަޔަން އާއި ކާނީ ޗުކުމޭކާ ކުޅެން އަރުވައިފަ އެވެ.
ފުރަތަމަ ހާފުގައި ޗެލްސީ އަށް ލީޑުނަގައިދޭން އޭރިއާ ރޮނގުކައިރިން ޗުކުމޭކާ ޖެހި ޝޮޓް އަމާޒުވީ ގޯލުގެ ކައިރީ ދަނޑިއަށެވެ. ދެ ވަނަ ހާފުގައި ސިޓީ އަށް ލީޑުނަގައިދޭން އެ ޓީމުގެ ކެވިން ޑި ބްރޭނާ ނެގި ހުރަހަކުން ނޭތަން އަކޭ ބޮލުން ޖެހި ބޯޅަ ޖެހުނީ ގޯލުގެ ހުރަސްދަނޑީގަ އެވެ.
އޭގެ ފަހުން ސިޓީ އޭރިއާތެެރެއިން ލިބުނު ފުރުސަތެެއްގައި ޗެލްސީގެ ތިއާގޯ ސިލްވާ ޖެހި ބޯޅަ ދިޔައީބޭރުންނެވެ.
މެޗުގައި ފެނިގެންދިޔަ ހަމައެކަނި ލަނޑު ސިޓީން ކާމިޔާބުކުރީ 63 ވަނަ މިނިޓްގަ އެވެ. އޭރިއާތެރެއިން ޖެކް ގްރީލިޝް ނެގި ހުރަހަކުން މި ލަނޑު ޖެހީ ރިޔާދު މާރޭޒް އެވެ. މިއީ މި ފަހަރު ލީގުގައި މާރޭޒް ޖެހި ދެ ވަނަ ގޯލެވެ. މާރޭޒާއި ގްރީލިޝް ކުޅެން އެރީ މެޗުގެ 60 ވަނަ މިނިޓްގަ އެވެ. އެއީ ފިލް ފޯޑެން އާއި ބެނާޑޯ ސިލްވާގެ ބަދަލުގަ އެވެ. ކުޅެން އެރިތާ ކުޑަ ވަގުތު ކޮޅެއްގެ ތެރޭގައި ގްރީލިޝް އާއި މާރޭޒް ގުޅިގެން ކުރި އެޓޭކްގައި ސިޓީ އަށް ގޯލު ހުޅުވައިދިނީ އެވެ.
ޗެލްސީ އަށް އެއްވަރުކޮށްދޭން ލެވިސް ހޯލް އަށް ލިބުނު ފުރުސަތުން އޭރިއާތެރެއިން އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ.
ސިޓީން އެންމެ ފަހުން ހުރިހާ މުބާރާތެއްގައި ޗެލްސީއާ ދެކޮޅަށް ކުޅުނު ހަތަރު މެޗުން ވެސް މޮޅުވެފައިވަނީ ކޮޅަށް ގޯލެއް ނުވަދެ އެވެ. ސިޓީ އާއި ޗެލްސީ އަންނަ އާދިއްތަ ދުވަހު އެފްއޭ ކަޕްގެ ތިން ވަނަ ބުރުގައި ބައްދަލުކުރާނެ އެވެ.
ލީގުގައި އެންމެ ފަހުން ޗެލްސީ ކުޅުނު އަށް މެޗުގެ ތެރެއިން މޮޅުވީ އެންމެ މެޗަކުންނެވެ. ޗެލްސީގެ ކޯޗު ގްރަހަމް ޕޮޓާ އަށް ޕްރެޝަރު ބޮޑުވެފައިވާއިރު، އެ ޓީމު އޮތީ 17 މެޗުން 25 ޕޮއިންޓާ އެކު ލީގުގެ 10 ވަނައިގަ އެވެ.
ރޭގެ މެޗަށް ފަހު ޕޮޓާ ބުނީ މިއީ ޗެލްސީ އަށް މި ސީޒަނުގައި ކުރިމަތިވާނެ އެންމެ އުނދަގޫ ވަގުތު ކަމަށާއި މި ހާލަތު ބަދަލު ކުރެވޭނީ ޓީމެއްގެ ގޮތުގައި އެކުވެގެން މަސައްކަތްކޮށް ނަތީޖާ ނެރެން ކުރެވުނު ހުރިހާ ކަމެއް ކޮށްގެން ކަމަށެވެ.
