އަލިކާންޓޭ، ސްޕެއިން (ޖެނުއަރީ 5) - މެޗުގެ ފުރިހަމަ ވަގުތުގެ ކުޅުން ހަމަވެގެން ނަތީޖާ ނެރުމަށް ކުޅުނު އިތުރު ވަގުތުގެ ތެރޭގައި އަންސޫ ފަޓީ ޖަހައިދިން ގޯލުން ސްޕެނިޝް ކަޕް (ކޮޕަ ޑެލް ރޭ)ގެ ތިން ވަނަ ބުރުގައި އިންޓަ ސިޓީ އަތުން ބާސެލޯނާ މޮޅުވެއްޖެ އެވެ.
ސްޕެއިންގެ ތިން ވަނަ ޑިވިޝަންގައި ކުޅެމުން އަންނަ އިންޓަ ސިޓީ އަތުން ބާސެލޯނާ 4-3 އިން މޮޅުވިއިރު، މެޗުގައި ބާސެލޯނާ އިން ހަތަރު ފަހަރަށް ލީޑު ނެގި އެވެ. ތިން ފަހަރަށް އިންޓަސިޓީ އިން ވަނީ ނަތީޖާ ހަމަހަމަކޮށްފަ އެވެ.
ކޮޕަ ޑެލް ރޭގެ ތިން ވަނަ ބުރުގައި އިންޓަސިޓީ އަތުން ބާސެލޯނާ ފަސޭހަ މޮޅެއް ހޯދާނެކަމަށް ބެލެވުނީ މެޗު ފަށައިގެން މާ ގިނައިރުތަކެއް ނުވެ ބާސެލޯނާ އިން ގޯލު ޖެހުމާ އެކުގަ އެވެ. ރޮނާލްޑް އަރައުހޯގެ ގޯލުން ލީޑުގައި އޮއްވައި ސްޕެއިންގެ ތިން ވަަނަ ޑިވިޝަންގެ ރެލިގޭޝަނާ ހަނގުރާމަ ކުރަމުން އަންނަ އިންޓަސިޓީން ވަނީ ދެ ވަނަ ހާފުގެ ކުރީކޮޅު ނަތީޖާ ހަމަހަމަކޮށްފަ އެވެ.
އޭގެ ފަހުން އޮސްމާނޭ ޑެމްބެލޭ ގޯލެއް ޖަހައި ބާސެލޯނާ އިން ލީޑު ނެގި އެވެ. އަށް މިނެޓު ފަހުން އަނެއްކާ ވެސް އިންޓަސިޓީ އިން އެއްވަރުކުރި އެވެ. ތިން މިނެޓު ފަހުން ރަފިންހާގެ ގޯލުން ބާސެލޯނާ އިން އަނެއްކާވެސް ކުރިއަށް ޖެހިލި އެވެ. މެޗުގެ 86 ވަނަ މިނެޓުގައި އިންޓަސިޓީގެ ތިން ވަނަ ގޯލު އެ ޓީމުން ޖެހި އެވެ. ތިން ފަހަރަށް ވެސް އިންޓަސިޓީއަށް ނަތީޖާ ހަމަހަމަކޮށްދިން ގޯލު ޖަހައިދިނީ ފޯވާޑް އޮރިއެލް ސޮލްޑެވިލާ އެވެ.
ބާސެލޯނާ މެޗުން މޮޅުވީ ނަތީޖާ ނެރުމަށް ކުޅުނު އިތުރުވަގުތު ގައި ގޯލެއް ޖަހައިގެންނެވެ. އަންސޫ ފަޓީ ޖެހި ގޯލަކީ އޭނާ ފޮނުވާލި ހަމަލާ ކުޅުންތެރިއެއްގެ ގައިގައި ޖެހިފައި މިސްރާބު ބަދަލުވެ، ގޮސް ގޯލަށް ވަތް ބޯޅަ އެކެވެ. ސަސްޕެންޝަނުގެ ސަބަބުން ބާސެލޯނާގެ އެއްވަނަ ފޯވާޑް ރޮބާޓް ލެވަންޑޯސްކީ މި މެޗުގައި ނުކުޅެ އެވެ.
ކޮޕަ ޑެލް ރޭގައި ކުޅުނު އެހެން މެޗުތަކަށް ބަލާއިރު އެތުލެޓިކޯ މެޑްރިޑުން ވަނީ 2-0 އިން ރިއާލް އޮވިއޭޑޯ ބަލިކޮށްފަ އެވެ. އޭގެ އިތުރުން، 5-0 އިން ލިނަރޭސް އަތުން ސެވިއްޔާ ބަލިކުރިއިރު، ރެއާލް ސޮއިއެޑާޑުން ވަނީ ޔޫޑީ ލޮގްރޮނޭސް އަތުން 1-0 އިން މޮޅުވެފަ އެވެ.
ކޮޕަ ޑެލް ރޭގެ ގަދަ ސޯޅައިގެ މެޗުތައް ކުޅޭނީ ޖެނުއަރީ 17 އިން 19 އަށެވެ. ގަދަ 16ގެ ގުރުއަތު ނެގުން އޮންނާނީ އަންނަ ހޮނިހިރު ދުވަހު އެވެ.
