މެޑަލަކަށް ޓާގެޓްކޮށް ބަންގްލަދޭޝްގައި އަންނަ ބުދަ ދުވަހު ފަށާ އޭޝިއަން ސެންޓްރަލް ޒޯން ބީޗް ވޮލީބޯޅަ މުބާރާތަށް ގައުމީ ޓީމު ބަންގްލަދޭޝަށް ގޮސްފި އެވެ.
މި މަހުގެ 28-30 އަށް ބަންގްލަދޭޝްގެ ކޮކްސް ބަޒާރުގައި އޮންނަ ސަރަހައްދީ ބީޗް ވޮލީބޯޅަ މުބާރާތުގައި ފަސް ގައުމަކުން ވާދަކުރާނެ އެވެ. އެއީ މުބާރާތުގެ ހޯސްޓް ބަންގްލަދޭޝް އާއި ރާއްޖޭގެ އިތުރުން، ކިރްގިސްތާން، ބޫޓާން، ނޭޕާލް އަދި ޕާކިސްތާން އެވެ.
މި މުބާރާތަށް މިފަހަރު ގައުމީ ޓީމް ފުރީ ޓީމުގައި ކުރިން ހިމެނުނު މުހައްމަދު އަލީ (ޑެންޒޯ) ނުލަ އެވެ. ޑެންޒޯގެ ބަދަލުގައި މި މުބާރާތުގައި ރާއްޖޭގެ ޓީމްގައި ހިމެނުނީ އިންޑޯ ވޮލީގައި ފާހަގަކުރެވުނު ޒުވާން ކުޅުންތެރިޔާ ޝަމާއިލް ހުސައިން އެވެ.
މުބާރާތުގައި ޝަމާއިލް ޕެއާ ހަދާނީ އަހުމަދު މުހައްމަދު (ކޯކޭ) އާ އެވެ. ރާއްޖޭގެ އަނެއް ޕެއާ އަކީ އިސްމާއިލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) އެވެ. މިއީ ކުޑަކާއްޓެ އާއި އެޑަމްގެ ޕެއާ އަށް ބައިނަލްއަގުވާމީ ގިނަ މުބާރާތްތަކެއްގައި ވާދަކުރުމުގެ ފުރުސަތު ލިބޭ އަހަރެކެވެ. މެޑަލެއްގެ ޓާގެޓްގައި މަސައްކަތް ކުރަން ބާރު އެޅުމުގެ ގޮތުން، ޔޫތު މިނިސްޓްރީގެ "އަރުތަ" ޕްރޮގްރާމްގައި ވެސް މި ޕެއާ ވަނީ ހިމަނައިފަ އެވެ.
ބްރެޒިލް ކޯޗު ވިނީޝިއުސްއާ އެކު މި މުބާރާތަށް ތައްޔާރުވުމަށް ގައުމީ ޓީމުން ވަނީ މަހެއްހާ ދުވަހު ޕްރެކްޓިސްކޮށްފަ އެވެ. މުބާރާތަށް ތައްޔާރީތައް ފެށުމުގެ ކުރިން ކޯޗު ވިނީޝިއުސް އާއި ވޮލީބޯޅަ އެސޯސިއޭޝަނުންވެސް ތައްޔާރުވީ މުބާރާތުން މެޑަލް އެއް ހޯދުމަށެވެ. ސަބަބަކީ މި ވަގުތު ގައުމީ ޓީމުގައި ތިބި ކުޅުންތެރިންގެ ތަޖުރިބާއާއި ލެވެލަށް ބަލާއިރު މި ސަރަހައްދުގެ ގައުމުތައް ބަލިކުރެވޭނެކަމުގެ އިތުބާރު އޮތުމެވެ.
ބަންގްލަދޭޝަށް މުބާރާތަށް ދިޔައިރު، ގައުމީ ޓީމުގެ އެސިސްޓަންޓް ކޯޗުގެ ގޮތުގައި ހުރީ އަހުމަދު އަނިލް ނަސީރު އެވެ. ޓީމުގެ މެނޭޖަރަކީ ޝިއުނާޒް އަބްދުލް ވާހިދު (މަންކޭ) އެވެ. އަނިލް އާއި ޝިއުނާޒް އަކީ ކުރިން ގައުމީ ބީޗްވޮލީބޯޅަ ޓީމަށް ކުޅުނު ދެ ކުޅުންތެރިންނެވެ. މަންކޭ މި އަހަރު ޓީމާ އެކު ގިނަ މުބާރާތްތަކެއްގައި މަސައްކަތް ކުރީ މެނޭޖަރެއްގެ ގޮތުގަ އެވެ. މިއީ އެސިސްޓަންޓް ކޯޗެއްގެ ގޮތުގައި އަނިލްގެ ފުރަތަމަ ތަޖުރިބާ އެވެ.
މި މުބާރާތުގައި ރާއްޖޭގެ އިންޓަނޭޝަނަލް ބީޗް ވޮލީބޯޅަ ރެފްރީ އިސްމާއިލް އަބްދުﷲ (އިންމަ)ވެސް ބައިވެރިވާނެ އެވެ. އޭނާ އަކީ 2019 ގެ އިންޑިއަން އޯޝަން އައިލެންޑް ގޭމްސްގެ ބީޗު ވޮލީ އިވެންޓުގެ ބައެއް ފައިނަލްތަކުގައި ވެސް ރެފްރީކަން ކުރި ތަޖުރިބާކާރު ރެފްރީ އެކެވެ. އަދި މި އަހަރު ސްރީ ލަންކާގައި ބޭއްވި ބީޗްވޮލީ މުބާރާތުގައި ވެސް އިންމަ ވަނީ ރެފްރީކަން ކޮށްފަ އެވެ.
ރާއްޖޭގެ ގައުމީ ބީޗް ވޮލީބޯޅަ ޓީމުން މިއަހަރު ފެށީ ފެބްރުއަރީ މަހުގެ ތެރޭގައި އޮތް ސެންޓްރަލް އޭޝިއާ ޒޯންގެ ބީޗްވޮލީބޯޅަ މުބާރާތުންނެވެ. އޭގެ ފަހުން ކޮމަންވެލްތު ގޭމްސްގެ ކޮލިފައިންގައި ވާދަކުރި އެވެ. އަދި ރާއްޖޭގެ ފިރިހެން ޕެއާ ކަމަށްވާ ކުޑަކާއްޓޭ އާއި އެޑަމްގެ ޕެއާ އިން ކޮމަންވެލްތު ގޭމްސްގައި ވެސް ވާދަކުރި އެވެ.
އެންމެ ފަހުން، ގައުމީ ބީޗް ވޮލީ ޓީމުން މިއަހަރު ކުޅުނު ބައިނަލްއަގްވާމީ މުބާާރާތަކީ އޮކްޓޯބަރު މަހު ސަން އައިލެންޑުގައި އޮތް އެފްއައިވީބީ ބީޗް ޕްރޯ ޓުއާގެ މޯލްޑިވްސް ޗެލެންޖެވެ.
