ބޮޑިބޯޑިންގެ މުބާރާތެއް ރާއްޖޭގައި އެންމެ ފުރަތަމަ ބޭއްވި ދުވަހުގެ ހަނދާންތައް އާކުރަމުން ރާޅުގަނޑު ސަރަހައްދުގައި އިނދެ މުހައްމަދު މުސްތަފާ (މުސްތޮ) ދައްކަމުން ދިޔަ ވާހަކައިން ހާމަވި އެއް ކަމަކީ މި އަހަރުގެ ގައުމީ ބަނޑުފިލާ ޗެލެންޖާ އެކު ކުރީގެ ތަރިންނަށް ލިބުނު އަގުހުރި ފުރުސަތެވެ. ގައުމީ ލެވެލްގައި ފުރަތަމަ ފަހަރަށް މާސްޓާސް ކެޓަގަރީ ނުވަތަ 40 އަހަރުން މަތީގެ ރާޅާ އެޅުންތެރިންނަށް ހާއްސަ ކެޓަގަރީއެއް ހިމެނުމެވެ.
"އެންމެ ފުރަތަމަ ރާޅާ އަޅަން އެރުނީ 90 ގެ ފަހުކޮޅު، ހީވަނީ 1998 ހެން، ދޯ ޝިމާން" މުސްތޮ ކުރީގެ ހަނދާންތައް އާކުރި އެވެ.
ރާޅާ އެޅުމުގެ މުބާރާތެއް ރާއްޖޭގައި ބޭއްވި ފުރަތަމަ އަހަރު ކަމަށްވާ 2001 ވަނަ އަހަރުގެ މުބާރާތުގައި އޭނާ ވާދަކުރި އެވެ. އޭގެ ފަހުން 2002 ގައި އޮތް މުބާރާތަށް ފަހު އޭނާ ބޯޑު ބަހައްޓާފައި ނުކުތީ މި ކުޅިވަރަށް ހިދުމަތްކުރުމަށް އެހެން ދިމާލަކަށެވެ.
"އޭރު ރާޅާ އަޅާ މީހުން އުޅޭނެ. އެކަމަކު، ދެން ޖަޖުންވެސް ތިބެންޖެހޭނެތާ. އެހެންވެ، މި ކަމަށް ހުސްވެ މިވީހާ ދުވަހުކުރިކަމަކީ ޖަޖުކުރުން. ދޭތެރެއަކުން ދާނެ ބްރޭކެއް ވެސް. އެކަމަކު، ހަމަ ޖަޖުކުރުން ކަމަކީ" ރާއްޖޭގައި މިވަގުތު ތިބި އިންޓަނޭޝަނަލް ބޮޑީބޯޑިން އެޕްރޫވްޑް ޖަޖުންގެ ތެރޭގައި ހިމެނޭ މުސްތޮ ބުންޏެވެ.
ޖަޖެއްގެ ގޮތުގައި ހުރެ އެހެން ބޯޑަރުންގެ ހުނަރުތައް ބަލާލައިން ލިބޭ ހިތްހަމަޖެހުން ވެސް އޭނާ ފާހަގަކުރީ ރާާޅަށް އެރި އޮތުމާއި އެއް ފެންވަރެއްގަ އެވެ. ބާވީސް އަހަރު ފަހުން މުބާރާތެއްގައި ވާދަކޮށްލަން ފުރުސަތު ލިބޭނެ ކަމަށް އޭރު މުސްތޮ އުއްމީދެއް ނުކުރެ އެވެ.
މުސްތޮ އެކޭ އެއްގޮތަށް ކުރީގެ ބޮޑީބޯޑިން ޗެމްޕިއަން އިބްރާހިމް ޝިމާންގެ ވިސްނުން ވެސް ހުރީ ޒުވާން ބޯޑަރުންނަށް ފުރުސަތުދީ އެ ކުދިންނަށް އުނގަންނައި ދިނުމުގަ އެވެ. މަދުމަދުން ރާޅަށް އެރި އުޅުނު ނަމަވެސް ކުރީގެ އެކުވެރިންނާ އެކު ގައުމީ ފެންވަރުގެ މުބާރާތެއްގައި ވާދަކޮށްލަން ފުރުސަތު ލިބޭނެ ކަމަށް އޭނާ އެއްވެސް ވަރަކަށް އުއްމީދު ނުކުރެ އެވެ.
ރާއްޖޭގެ ބޮޑިބޯޑިންގެ ކުރީގެ ޗެމްޕިއަން އިބްރާހިމް ޝިމާން ރާޅަކާ އަޅާލަނީ - ފޮޓޯ: މުހައްމަދު ޝާބިން/އަދަދު
"މާސްޓާސް ކެޓަގަރީ އޮތީމަ އޭރުގެ މީހުންނާއިއެކު ވާދަކޮށްލައި މަޖާކޮށްލަން ޗާންސް މި ލިބުނީ މުބާރާތެއްގެ ތެރެއިން. ގާތް ގަނޑަކަށް 11 އަހަރު ފަހުން ވަރަށް ސަޅި އަނެއްހެން މި އޮޕޮޗުނިޓީ" ގައުމީ ފެންވަރުގެ ހަ މުބާރާތެއް މީގެ ކުރިން ކާމިޔާބު ކޮށްފައިވާ ޝިމާން ބުންޏެވެ.
އޭނާ ބުނީ މިހާރުގެ ކުދިން މި ކަމަށްދޭ އަހަމިއްޔަތާއި ފޯރިއަށް ބަލާއިރު ރާއްޖޭގެ ބޮޑީބޯޑިންގެ ކުރިމަގު ވަރަށް އުޖާލާ ކަމަށެވެ. އެކި އުމުރުގެ އުއްމީދީ ބޯޑަރުން ފެނުމުން އެކަމުގެ ހިތްހަމަޖެހުން އޭނާ ފާހަގަކުރި އެވެ.
"އަހަރުމެން އޭރު މުބާރާތްތަކުގައި ވާދަކުރިއިރު ކުޑަ އައްޔަ އެކަނި އުޅޭނީ. ދެން މިތިބީ ހުސް އާ ކުދިން. ވަރަށް ހުނަރުވެރި ކުދިން އެބައުޅޭ." ޝިމާން ބުންޏެވެ.
މި ފަހަރު ލިބުނު ފުރުސަތުގައި ޝިމާން ވަނީ ފިރިހެން އޯޕަން ބައިގައިވެސް ވާދަކޮށްފަ އެވެ. އޭނާ ކެޓީ ކުއާޓާ ފައިނަލާ ހިސާބުންނެވެ.
މުސްތޮ އާއި ޝިމާން އެކޭ އެއްގޮތަށް މާސްޓާސް ބައިގައި މި އަހަރު ވާދަކުރާ އަނެއް ހަތަރު ބައިވެރިން ވެސް ދެއްކީ އެއް ވާހަކަ އެކެވެ. އެމްބީބީއޭ އިން އިސްނަގައިގެން ކުރީގެ ބޯޑަރުންނަށް މި ހުޅުވާލި ފުރުސަތަކީ އޭރުގެ ހަނދާންތައް އާކޮށްލަން ލިބުނު އުފާވެރި ފުރުސަތެކެވެ. އޭރުގެ ބޮޑީބޯޑިންގެ ހާލަތާއި ފެންވަރު މިހާރުގެ މީހުންނަށް ދައްކާލަން ލިބުނު ފުރުސަތެކެވެ.
