މިހާރު ކުރިއަށްދާ އެމްޓީސީސީ ގައުމީ ބަނޑުފިލާ ޗެލެންޖު2022ގެ ޑްރޮޕް ނީ ބައިގެ ސެމީ ފައިނަލުން އަލީ ޚުޝްރުވާން އަހުމަދު (ކުޑަ އައްޔަ)، ދާވޫދު ފަޒީހު، އަލީ ޝާމް ރާފިއު އަދި މުހައްމަދު ވިއާމް ޖާގަ ހޯދައިފި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމްކޮށްގެން ކުރިއަށްގެންދާ ބަނޑުފިލާ ޗެލެންޖަކީ މި އަހަރުގެ ގައުމީ ބޮޑީބޯޑިން ލީގުގެ ފަހު މުބާރާތެވެ. މީގެ ކުރިން މި އަހަރު ލީގުގެ ތެރޭގައި ހިމަނައިގެން ޕޮއިންޓް ލިބުނު ދެ މުބާރާތަކީ ބުރުނުޝިކާރު ބޮޑީބޯޑިން ޗެލެންޖާއި މޯލްޑިވްސް ޕްރޯ 2022ގެ ޓްރަޔަލްސް އެވެ.
ގައުމީ ބަނޑުފިލާ ޗެލެންޖުގެ ޑްރޮޕް-ނީ ބައިގައި މިފަހަރު 11 އެތުލީޓެއް ވާދަކުރެ އެވެ. ސެމީ ފައިނަލު ފުރަތަމަ ހީޓުގައި ވާދަކުރާނީ ކުޑަ އައްޔަ އާއި ފަޒީހު އެވެ. ކުޑަ އައްޔަ ސެމީގެ ޖާގަ ހޯދީ ކުއާޓާ ފައިނަލުގައި އަމިން އުމަރު މޫސާ އާއި މުހައްމަދު ވިއާމްއާ ދެކޮޅަށް ނުކުމެ ހީޓުގެ އެއް ވަނަ ހޯދައިގެންނެވެ. މި ހީޓުގައި އައްޔަ 9.63ގެ ސްކޯއެއް ހޯދި އެވެ.
އައްޔަ ކުއާޓާ ފައިނަލުގައި ހޯދި ސްކޯއަކީ ޑްރޮޕް-ނީ ބައިގައި މި ފަހަރުގެ ތިން ވަނަ އަށް އެންމެ މަތީ ސްކޯ އެވެ. މީގެ ކުރިން އެންމެ މަތީ ދެ ސްކޯ ވެސް ހޯދީ އައްޔަ އެވެ. މި ގޮތުން ފުރަތަމަ ބުރުގައި 10.03ގެ ސްކޯއެއް ހޯދިއިރު، ތިންވަނަ ބުރުގައި 14.33ގެ ސްކޯއެއް ހޯދި އެވެ.
ފަޒީހު އަށް ސެމީގެ ޖާގަ ލިބުނީ ކުއާޓާ ފައިނަލުގެ ހީޓު ދޭއްގައި ވާދަކޮށް ދެ ވަނަ ލިބުމުންނެވެ. ފޯރިގަދަ ހީޓެއްގެ ގޮތުގައި ފާހަގަވި މި ހީޓުގެ ދެ ވަނަ އޭނާ އަށް ލިބުނީ 4.00ގެ ސްކޯ އަކުންނެވެ. އެއް ވަނަ ހޯދި ޝާމް ރާފިއު ވެސް ސެމީގެ ޖާގަ ހޯދި އެވެ. އޭނާ ވަނީ 5.10ގެ ސްކޯއެއް ހޯދައިފަ އެވެ.
ގައުމީ ބަނޑުފިލާ ޗެލެންޖުގެ ޑްރޮޕް ނީ ބައިގެ މުހައްމަދު ވިއާމް ރާޅާ އަޅާލަނީ - ފޮޓޯ: މުހައްމަދު ޝާބިން/އަދަދު
ކުއާޓާ ފައިނަލުގައި ކުޑަައައްޔައާ ވާދަކޮށް ވިއާމް ދިޔައީ ދެ ވަނަ އަށެވެ. އޭނާ އަށް ލިބުނީ ކުއާޓާ ފައިނަލު ހީޓުގައި 7.16ގެ ސްކޯ އެކެވެ. މިއީ މި މުބާރާތުގެ ޑްރޮޕް-ނީ ބައިގައި ވިއާމްގެ އެންމެ މަތީ ސްކޯ އެވެ.
ބަނޑުފިލާ ޗެލެންޖުގެ އެންމެ ފޯރިގަދަ ބައިކަމަށްވާ މެންސް އޯޕަން ބަޔަށް ބަލާއިރު، މި ބައިގެ ދެ ބުރުގެ ހީޓުތައް މިހާރު ވަނީ ނިމިފަ އެވެ. ދެ ވަނަ ބުރުގައި އެންމެ މަތިން ސްކޯ ހޯދައި މި މުބާރާތުގެ އެންމެ މަތީ ސްކޯ ހޯދީ އަޝްރަފް ހަސަން އެވެ. އޭނާ ވަނީ ދެ ވަނަ ބުރުގެ ހީޓު ތިނެއްގައި 15.50ގެ ސްކޯއެއް ހޯދާފައެވެ.
ތިން ވަނަ ބުރުގެ ހީޓުތަކަށް ބަލާއިރު، ހީޓު އެކެއް 5.70ގެ ސްކޯއަކުން ކާމިޔާބުކުރީ ހުސައިން ނޫރައްދީން އެވެ. ދެ ވަނަ ހީޓު 9.30ގެ ސްކޯއަކުން ހަސަން އަމަން ކާމިޔާބުކުރިއިރު، ހީޓު ތިނެއް ކާމިޔާބުކުރީ އަޝްރަފް އެވެ.
މެންސް އޯޕަން ބައިގެ ތިން ވަނަ ބުރުން ޖާގަ ހޯދާފައިވަނީ 19 އެތުލީޓުންނެވެ. ހަތަރު ވަނަ ބުރުން ޖާގަ ލިބޭނީ ތިންވަނަ ބުރުގެ ހަ ހީޓުގައި ވާދަކޮށް ކޮންމެ ހީޓަކުންވެސް ކުރި ލިބޭ ދެ ބައިވެރިންނަށެވެ.
