މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމް ކޮށްގެން ކުރިއަށްގެންދަ ބޮޑީބޯޑިން ލީގުގެ އަހަރުގެ ފަހު މުބާރާތް ކަމަށްވާ ގައުމީ "ބަނޑުފިލާ ޗެލެންޖު 2022" މާދަމާ ފަށަން ތައްޔާރުވެއްޖެ އެވެ.
މާދަމާއިން ފެށިގެން މި މަހުގެ 23 އަށް ކުރިއަށްގެންދާ ގައުމީ ބަނޑުފިލާ ޗެލެންޖު 2022 ގައި މި އަހަރު ފަސް ކެޓަގަރީއަކަށް އިއުލާންކުރި ނަމަވެސް އަންހެން ޑިވިޝަންގައި އެއްވެސް އެތުލީޓެއް ވާދަނުކުރާތީ އެ ޑިވިޝަން ނުހިމަނައި ކުރިއަށްދާނީ ހަތަރު ޑިވިޝަނެވެ. އޭގެ ތެރޭގައި މި އަހަރު މުޅިން އަލަށް ހިމެނި މާސްޓާސް ޑިވިޝަން ހިމެނެ އެވެ. މި ޑިވިޝަންގައި ވާދަކުރާނީ 35 އަހަރުން މަތީގެ އެތުލީޓުންނެވެ.
"ބަނޑުފިލާ ޗެލެންޖު 2022" އަކީ މި އަހަރު ބޮޑީބޯޑިންގެ ލީގުގައި ހިމެނޭ ފަސް ވަނަ މުބާރާތެވެ.
އެމްބީބީއޭ އިން މައުލޫމާތު ދިން ގޮތުގައި މި ފަހަރު މާސްޓާސް ޑިވިޝަން ހިމެނި މައިގަނޑު ސަބަބަކީ ބޮޑީބޯޑިންގެ ކުރީގެ އެތުލީޓުންނަށް ވާދަވެރި މާހައުލެއްގައި ރާޅާ އަޅައި ހުނަރުތައް ދައްކާލުމުގެ ފުރުސަތު ހޯދައިދިނުމެވެ.
ގައުމީ ލީގަށް ޕޮއިންޓް ލިބޭ އުސޫލުން މި އަހަރު ކުރިއަށް ގެންދިޔައީ ދެ މުބާރާތެކެވެ. އެއީ އަހަރުގެ ކުރީކޮޅު ކުރިއަށް ގެންދިޔަ ބުރުނުޝިކާރު ޗެލެންޖާއި، ގައުމީ ޓީމަށް ކުޅުންތެރިން ހޮވުމަށް މިދިޔަ ޖޫން މަހު ކުރިއަށްގެންދިޔަ މޯލްޑިވްސް ޕްރޯ ޓްރަޔަލްސް އެވެ. ދެ އިވެންޓުން ލިބުނު ޕޮއިންޓްތަކާ އެކު މި ވަގުތު ލީގުގެ އެއް ވަނައިގައި އޮތީ އަލީ ޚުޝްރުވާން އަހުމަދު (ކުޑަ އައްޔަ) އެވެ.
މިދިޔަ ދެ މުބާރާތަށް ވުރެ ގިނައިން ޕޮއިންޓް ކަނޑައަޅާފައިވާ ގައުމީ މުބާރާތަކީ އަންނަ އަހަރުގެ ގައުމީ ޓީމަށް ހޮވުމަށް ވެސް ލިބޭނެ ރަނުގެ ފުރުސަތެކެވެ. އެ ގޮތުން މި މުބާރާތަށް ފަހު ޖުމްލަ ރޭންކިން ޕޮއިންޓަށް ބަލައި އާ ގައުމީ ޓީމު ވެސް އިއުލާން ކުރާނެ އެވެ.
ގައުމީ ބަނޑުފިލާ ޗެލެންޖުގައި އެންމެ ވާދަވެރިވާނެކަމަށް ބެލެވެނީ ޖޫނިއާ ބައެވެ. ޖޫނިއާ ޑިވިޝަންގައި 15 އެތުލީޓުން ވާދަކުރާއިރު، ހުރިހާ އެތުލީޓުންވެސް ފެންނަނީ ވަރަށް އެއްވަރުކޮށެވެ. މިއީ އެމްބީބީއޭ އިން މިއަހަރު ޖޫނިއާ އެތުލީޓުން ބިނާ ކުރުމަށް ކުރި މަސައްކަތްތަކުގެ ނަތީޖާ އެވެ.
އެގޮތުން ރާއްޖޭގެ އެކި ސަރަހައްދުތަކުގައި އާ އެތުލީޓުން މީގެ ތެރެއަށް ނެރުމަށް ޑިވެލޮޕްމަންޓް ޕްރޮގްރާމްތައް ހިންގިއިރު، މި އަަހަރު ރާއްޖޭގައި ބޭއްވި ބައިނަލްއަގްވާމީ މުބާރާތް ކަމަށްވާ މޯލްޑިވްސް ޕްރޯގައި ވާދަކުރުމަށް ރާއްޖެ އައި ދުނިޔޭގެ ދެ ޗެމްޕިއަނުން ކަމަށްވާ ބްރެޒިލްގެ ނޭމަރާ ކަވާލިއޯ އާއި ފްރާންސްގެ އަމައުރީ ލަވާންގެ ހާއްސަ ކިޑްސް ކްލިނިކް ތަކެއް ވެސް ކުރިއަށް ގެންދިޔަ އެވެ.
އަލަށް ހިމެނި މާސްޓާސް ޑިވިޝަންގައި ހަ އެތުލީޓުން ވާދަކުރާއިރު ޑްރޮޕް ނީ ބައިގައި 11 އެތުލީޓުން އަދި ފިރިހެން އޯޕަން ބައިގައި 27 އެތުލީޓުން ވާދަކުރެ އެވެ.
ގައުމީ ބަނޑުފިލާ ޗެލެންޖާ އެކު މި އަހަރު އެމްބީބީއޭ އިން ހަ މުބާރާތެއް ބާއްވަން ތާވަލްކުރި އެވެ. އޭގެ ތެރޭގައި ހިމެނޭ ލަބޭރާ ބޮޑީބޯޑިން ޗެލެންޖާއި، ސުލްޓާން އޮފް ތަނބުރުދޫ އާއި އަދަހުކުރު ގޮންޖެހުމުގެ އިތުރުން މުލަ ބޮޑީބޯޑިން ޗެލެންޖް މި އަހަރު އެކި ސަބަބުތަކާ ހުރެ ބޭއްވޭ ގޮތް ވަނީ ނުވެފަ އެވެ. އެމްބީބީއޭގެ އަމާޒަކީ މި ހުރިހާ މުބާރާތެއް އަންނަ އަހަރުގެ ކަލަންޑަރުގައި ހިމަނައިގެން ބޭއްވުމެވެ.
