ފޯރިގަދަކޮށް ކުރިއަށްދިޔަ އެފްއޭއެމް 12 އަހަރުން ދަށުގެ ޔޫތު ލީގުގެ ޗެމްޕިއަންކަން، ސުޕަ ޔުނައިޓެޑް ސްޕޯޓްސް (ސަސް) އިން ހޯދައިފި އެވެ.
ސަސް އިން މުބާރާތުގައި ކުޅުނު 12 މެޗުގެ ތެރެއިން 10 މެޗުން މޮޅުވެ، އެއް މެޗުން އެއްވަރުވިއިރު، ބަލިވީ ވެސް އެއް މެޗުންނެވެ. ސަސް ނިންމާލީ 31 ޕޮއިންޓާ އެކު އެވެ.
ދެ ވަނަ އަށް ދިޔަ، މޯލްޑިވްސް ސޮކަ މޭޓްސް (އެމްއެސްއެމް) އެކެޑަމީ އާއި ތިން ވަނަ އަށް ދިޔަ ބީޖީ ސްޕޯޓްސް ކްލަބްގެ އެކެޑަމީ އަށް ލިބުނީ 30 ޕޮއިންޓެވެ. އެމްއެސްއެމް އަށް ދެ ވަނަ ލިބުނީ ލަނޑުގެ ތަފާތަށް ބަލާއިރު، ބީޖީ އަށް ވުރެ ކުރި ލިބޭތީ އެވެ.
ޓާފް ދަނޑުގައި ކުރިއަށްދިޔަ މުބާރާތުގެ ފަހު މެޗުގައި ސަސް އިން ނުކުތީ އީގަލްސްއާ ދެކޮޅަށެވެ. އީގަލްސް އަތުން ސަސް އެ މެޗުން މޮޅުވީ 5-1 އިންނެވެ. މި މެޗުގައި ސަސްގެ ގޯލުތައް ޖެހީ، ހުސެއިން އިލްހާމް ދެ ގޯލާއި، އިބްރާހިމް އަލްޔާން ޝާހިރު، މުހައްމަދު ވިފާގު ޖާދުﷲ އަދި އީހާން ބިން އިބްރާހިމް، ކޮންމެ ކުޅުންތެރިއަކު ގޯލެކެވެ. އީގަލްސްގެ ހަމައެކަނި ގޯލު ޖެހީ މުހައްމަދު ރައުޝަމް ސުއާދު އެވެ.
މުބާރާތުގެ ފެއާ ޕްލޭ ޓީމަކީ ފްރެންޑްސް ފުޓްބޯލް ފެމިލީ އެކެޑަމީ އެވެ. އެންމެ ގިނަ ގޯލު ޖެހި ކުޅުންތެރިއަކީ ސަސްގެ ހުސެއިން އިލްހާމް އެވެ. އޭނާ ޖުމްލަ އެކު 25 ގޯލު ޖެހި އެވެ.
އެފްއޭއެމް 12 އަހަރުން ދަށުގެ ލީގުގެ އެންމެ މޮޅު ނުވަ ކުޅުންތެރިން.
ލީގުގެ އެންމެ މޮޅު ނުވަ ކުޅުންތެރިންނަކީ، ފްރެންޑްސް ފުޓްބޯލް ފެމިލީ އެކެޑަމީގެ އަހުމަދު އާހިލް އާތިފް، ސަސްގެ އީގަން ބިން އިބްރާހިމް، ހުސެއިން އިލްހާމް، އިސްމާއިލް ޔަނާހު މުހައްމަދު މުބީން، އެމްއެސް މޭޓްސްގެ އައިކް އާދަމް، ޝާދިން އަބްދުލް ރައްޒާގު، މާޒިޔާގެ ޝިބާލް އަބްދުލް ޝުކޫރު އަދި ބީޖީގެ ލޫކް އަބްދުﷲ ޖަލީލް އެވެ.
އެފްއޭއެމް ޓުވާޑްސް ފިއުޗާ ބެނާގެ ދަށުން ކުރިއަށްދިޔަ 12 އަހަރުން ދަށުގެ ޔޫތު ލީގުގެ ހަތަރު ވަނަ އަށް ދިޔައީ 24 ޕޮއިންޓް ހޯދި އެޑްވެންޗާސް ފުޓްބޯލް އެކެޑަމީ (އޭއެފްއޭ) އެވެ. ފަސް ވަނައިގައި އޮތް ފްރެންޑްސް ފުޓްބޯލް ފެމިލީ އެކެޑަމީ އާއި ހަ ވަނައިގައި އޮތް މާޒިޔާ އަށް ވަނީ 22 ޕޮއިންޓް ލިބިފަ އެވެ.
ހަތް ވަނައިގައި ނިންމާލި ކްލަބް ވެލެންސިއާ އަށް 19 ޕޮއިންޓް ލިބުނުއިރު، އަށް ވަނަ ދިޔަ ދަ ގްރާންޑޭ ސްޕޯޓްސް ކްލަބްގެ އޮތީ 12 ޕޮއިންޓެވެ. ނުވަ ވަނަ އަށް ދިޔައީ 11 ޕޮއިންޓް ހޯދި ހުޅުމާލެ ޔޫތު ސްޕޯޓްސް އެވެ. ދިހަ ވަނައިގައި ކްލަބް އީގަލްސް އޮތީ ނުވަ ޕޮއިންޓް ހޯދައިގެންނެވެ. އެގާރަ ވަނައިގައި ނިންމާލި ޓީސީ ސްޕޯޓްސް ކްލަބަށް އަށް ޕޮއިންޓް ލިބުނުއިރު، ބާރަ ވަނަ އަށް ދިޔަ ހުޅުމާލެ ސްޕޯޓްސް ސްކޫލަށް ލިބުނީ ފަސް ޕޮއިންޓެވެ. އަދި ފުލުގައި ނިންމާލަން ޖެހުނު ޔުނައިޓެޑް ވިކްޓަރީ އެކެޑަމީގެ އޮތީ އެންމެ ޕޮއިންޓެކެވެ.
