ދޯހާ، ގަތަރު (ޑިސެމްބަރު 1) - މި ފަހަރުގެ ވޯލްޑް ކަޕް ފުޓްބޯޅަ މުބާރާތުގެ ގްރޫޕް ސްޓޭޖުން ޖަރުމަނު ކެޓިޔަސް އެ ޓީމުގެ ކޯޗުގެ މަގާމުން އިސްތިއުފާ ނުދޭނެ ކަމަށް ޖަރުމަނުގެ ކޯޗު ހަންސީ ފްލިކް ބުނެފި އެވެ.
މިދިޔަ އަހަރުގެ ޔޫރޯ ފުޓްބޯޅަ މުބާރާތަށް ފަހު ޖަރުމަނު ގައުމީ ޓީމުގެ ކޯޗުކަން 14 އަހަރަށް ފަހު ދޫކޮށްލަން ޔަކީމް ލޯ ނިންމުމުން ޖަރުމަނު ފުޓްބޯޅަ ފެޑެރޭޝަނުން ފްލިކް ގެނައީ އޭނާގެ މަސައްކަތް ބަޔާން މިއުނިކާއި ޖަރުމަނު ޓީމުގައި ވެސް ކަމުގޮސްފައިވާތީ އެވެ. ފްލިކް އަކީ 2014 ވަނަ އަހަރުގެ ޖަރުމަނުން ވޯލްޑް ކަޕް ކާމިޔާބުކުރިިއިރު، ޓީމުގެ އެސިސްޓަންޓް ކޯޗެވެ.
މި ފަހަރުގެ ވޯލްޑް ކަޕްގައި ޖަރުމަނަށް އަދި މޮޅެއް ނުލިބެ އެވެ. ފުރަތަަމަ މެޗުން ޖަރުމަނު ވަނީ ޖަޕާން އަތުން 2-1 އިން ބަލިވެފަ އެވެ. ދެ ވަނަ މެޗުން ޖަރުމަނު ވަނީ 1-1 އިން ސްޕެއިނާ އެއްވަރުވެފަ އެވެ.
ގްރޫޕް އީގެ ފަހު މެޗުތަކަށް ނުކުންނައިރު، ޖަރުމަނު އޮތީ ފުލުގަ އެވެ. އެ ގްރޫޕްގެ އެއް ވަނައިގައި އޮތް ސްޕެއިނަށް ވަނީ ހަތަރު ޕޮއިންޓް ލިބިފަ އެވެ. ދެ ވަނައިގައި އޮތް ޖަޕާނާއި ތިން ވަނައިގައި އޮތް ކޮސްޓަ ރިކާ އަށް ވަނީ ތިން ޕޮއިންޓް ލިބިފަ އެވެ. ޖަރުމަނަށް ލިބިފައިވަނީ އެންމެ ޕޮއިންޓެކެވެ. ޖަރުމަނަށް ދެ ވަނަ ބުރުގެ ކިރިޔާ ވެސް ފުރުސަތެއް އޮތީ މިރޭގެ މެޗުން ކޮސްޓަ ރިކާ އަތުން މޮޅުވެގެންނެވެ.
އެންމެ ފަހުން 2018 ވަނަ އަހަރު ބޭއްވި ވޯލްޑް ކަޕްގައި ޖަރުމަނު ގްރޫޕް ސްޓޭޖުން ކެޓިއިރު، ޖެހިޖެހިގެން ދެ ވޯލްޑް ކަޕްގެ ގްރޫޕް ސްޓޭޖާ ހަމައިން މުބާރާތުން ކެޓުމުގެ ބިރު ވަނީ ބޮޑުވެފަ އެވެ. ޖަރުމަނު މި ފަހަރު ވެސް ގްރޫޕް ސްޓޭޖުން ކަޓައިފިނަމަ، ފްލިކް މަގާމުން އިސްތިއުފާ ދޭނެތޯ މީޑިއާ އިން އަންނަނީ ސުވާލުކޮށްފަ އެވެ.
"އަހަންނަށް ޔަގީންކަމާ އެކު ބުނެވޭނެ މިއީ އެއްވެސް ގޮތަކުން އަހަރެންގެ ފަހު މެޗެއް ނޫން، އެކަމަކު، މިހެން ބުންޏަސް ކުރިއަށްވާނެ ގޮތެއް ބުނާނެ ގޮތެއް ނޭނގޭ. އަހަރެން ޔަގީނުން ވެސް މި ހުރީ ކޮންޓްރެކްޓްގައި އޮތްގޮތަށް އަމިއްލަ ގައުމުގައި 2024 ވަނަ އަހަރު ބާއްވާ ޔޫރޯ އަށް ވެސް ފޯކަސް ކޮށްގެން މަސައްކަތް ކުރަން،" ފްލިކް ބުންޏެވެ.
މިރޭ ސްޕެއިން އަތުން ޖަޕާން މޮޅުވެއްޖެނަމަ ޖަރުމަނަށް ދެ ވަނަ ބުރުގެ ފުރުސަތު ލިބޭނީ ކޮސްޓަަ ރިކާ ކޮޅަށް އަށް ގޯލުގެ ފަރަގަކުން މޮޅުވެގެންނެވެ. ފްލިކް ބުނީ ލަނޑުގެ ތަފާތަށް ބަަލައިގެން މޮޅުވެގެން، އަނެއް ބުރަށް ދާން އެ ކަހަލަ ގޮތްގޮތަށް ޖަރުމަނުގެ ވިސްނުން ބައްޓަން ކުރަން ބޭނުންނުވާ ކަމަށެވެ.
ޕްރެޝަރު ބޮޑުވެފައިވާ ހާލަތެއް ފްލިކަށް އޮތް ކަމަށް ބުނެ، ދެކެވޭ ވާހަކަތަކަށް ރައްދުދެމުން އޭނާ ބުނީ ފުޓްބޯޅައިގައި ކޮންމެ ކަމެއްގެ ވެސް ޕްރެޝަރު އަބަދު އޮންނާނެ ކަމަށެވެ.
