ދޯހާ، ގަތަރު (ނޮވެމްބަރު 21) - މި ފަހަރުގެ ވޯލްޑް ކަޕްގެ މެޗުތަކަށް 2.9 މިލިއަން ޓިކެޓް ވިއްކައި، ގަތަރުން ރަޝިއާގެ ވޯލްޑް ކަޕްގެ ޓިކެޓް ވިއްކުމުގެ ރެކޯޑަށް ވުރެ ކުރިއަށް ޖެހިލައިފި އެވެ.
ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގައި ޖުމްލަ އެކު ވިކިފައިވަނީ 2.4 މިލިއަން ޓިކެޓެވެ. އެކަަމަކު، ގަތަރުން ވަނީ މި ފަހަރުގެ ވޯލްޑް ކަޕްގެ މިހާތަނަށް ވެސް 2.9 މިލިއަން ޓިކެޓް ވިއްކައިފަ އެވެ. މިއީ ގަތަރު ވޯލްޑް ކަޕް ބޮއިކޮޓް ކުރަން ހުޅަނގުގެ މީޑިއާތަކުން ކުރާ މަސައްކަތުގެ ބާރެއް ނެތްކަން ދައްކުވައިދޭ ކަމުގެ ހެއްކެއް ކަމަށް ގަތަރު ވޯލްޑް ކަޕް ކޮމިޓީން ގަބޫލުކުރެ އެވެ.
ގަތަރު ވޯލްޑް ކަޕް ކޮމިޓީގެ ތަރުޖަމާނު މީޑިއާ އަށް ބުނެފައިވަނީ އެންމެ ގިނަ ޓިކެޓް ގަނެފައިވަނީ ގަތަރުގެ އިތުރުން ސައުދީ އަރަބިއްޔާ، އެމެރިކާ، މެކްސިކޯ، އިންގްލެންޑް، ޔުނައިޓެޑް އަރަބް އެމިރޭޓްސް، އާޖެންޓީނާ، ފްރާންސް، އިންޑިއާ އަދި ބްރެޒިލް އެވެ.
ވޯލްޑް ކަޕްގެ ހުޅުވުމުގެ ރަސްމިއްޔާތުގެ ތެރެއިން ގަތަރުގެ ޝާހީ އާއިލާގެ ބޭފުޅުންނާއި ފީފާގެ ރައީސް ޖިއާނީ އިންފަންޓީނޯ.-
މި ފަހަރު ގަތަރުގައި ބާއްވާ ވޯލްޑް ކަޕާ އެކު އަހަރު ނިމޭއިރު، ފީފާގެ އާމްދަނީ ޖުމްލަ އެކު މި ހަތަރު އަހަރަށް ބަލާއިރު އުޅޭނީ 7.5 ބިލިއަން ޑޮލަރުގައި ކަމަށް ފީފާގެ ރައީސް ޖިއާނީ އިންފަންޓީނޯ ވަނީ ދާދި ފަހުން ވިދާޅުވެފަ އެވެ. މިއީ މީގެ ހަތަރު އަހަރު ކުރިން، ނިމުނު ދައުރަށް ވުރެ އެއް ބިލިއަން ޑޮލަރު އިތުރު އަދަދެކެވެ.
ދެން ވޯލްޑް ކަޕް ބާއްވަން ނިންމާފައިވާ، އެމެރިކާ އާއި މެކްސިކޯ އަދި ކެނަޑާގައި 2026 ހޯސްޓްކުރާ ވޯލްޑް ކަޕްގައި 48 ގައުމު ވާދަކުރާއިރު، އެ ކަމަށް އިޝާރާތް ކުރައްވައި އިންފަންޓީނޯ ވިދާޅުވީ ތަފާތު ބައްރު ގައުމުތަކުގެ ގައުމުތަކުގެ ގިނަ މެޗުތަކެއް ބަލާލަން ލިބުމަކީ ފުޓްބޯޅަ ސަޕޯޓަރުންނަށް ލިބޭނެ ހިތްހަމަޖެހުމެއް ކަމަށެވެ.
