މިއުނިކް (ނޮވެމްބަރު 16) - ގަތަރުގައި އަންނަ އާދިއްތަ ދުވަހު ފަށާ ފީފާ ވޯލްޑް ކަޕް ފުޓްބޯޅަ މުބާރާތުން ޖަރުމަނުގެ ޑިފެންޑަރު، އެންޓޯނިއޯ ރޫޑިގާ އަށް ލިބޭ ބޯނަސް ހަދިޔާކުރާނީ އޭނާއާ އާއިލީ ގޮތުން ގުޅުން އޮތް ގައުމު، ސިއެރަ ލިއޯންގެ ކުދިންތަކެއްގެ އޮޕަރޭޝަނަށް ކަމަށް ހާމަކޮށްފި އެވެ.
ރޫޑިގާގެ މަންމަ އުފަންވީ ސިއެރަ ލިއޯނަށެވެ. މީގެ ކުރިން ވެސް ރޫޑިގާ ވަނީ ސިއެރަ ލިއޯނަށް އެކި ގޮތްގޮތުން އެހީތެރިކަން ފޯރުކޮށްދީފަ އެވެ.
ޖަރުމަނުން ވޯލްޑް ކަޕަށް ނެގި 26 ކުޅުންތެރިންގެ ސްކޮޑުގައި ހިމެނޭ ރޫޑިގާއާ ހަވާލާދީ ސްޕެއިނާއި ޖަރުމަނުގެ މީޑިއާތަކުން ރިޕޯޓްކުރާގޮތުގައި ވޯލްޑް ކަޕު ކުޅެގެން ޖަރުމަނުން އޭނާ އަށް ލިބޭ ބޯނަސް ފައިސާ ހަދިޔާކުރާނީ ސިއެރަ ލިއޯންގައި މި ވަގުތު އެންމެ އަވަހަށް އޮޕަރޭޝަން ކުރަން ޖެހިފައިވާ 11 ކުދިންނަށް ކަމަށް މިހާރު ވަނީ ކަނޑައަޅައިފަ އެވެ.
ޖަރުމަނުގެ ފައުންޑޭޝަން، ބިގްޝޫއާ ގުޅިގެން ރޫޑިގާ މިކަން ކުރިއަށްގެންދާއިރު، މީގެ ކުރިން މި އަހަރުގެ ޖެނުއަރީ މަހުގައި ވެސް ރޫޑިގާ ވަނީ ސިއެރަ ލިއޯންގެ ކުދިންތަކެއްގެ އޮޕަރޭޝަނަށް ފަންޑު ކޮށްފަ އެވެ.
"އަހަންނަކީ ސިއެރަ ލިއޯނަށް ނިސްބަތްވާ މީހެއް ވިޔަސް، އަހަރެން ބޮޑުވީ ޖަރުމަނުގައި، އަހަރެން ބޮޑުވިއިރު، ލިބުނު ވަރަށް ބޮޑެތި އެހީތަކުން، ސިއެރަ ލިއޯންގައި މި ތިބި ކުދިން މި ތިބީ މަހުރޫމްވެފައި، އަހަރެން ބޭނުންވަނީ ކޮންމެ ވެސް ވަރަކަށް މި ކަަންތައްތަކަށް ހައްލުތަކެއް ހޯދަން،" މިދިޔަ ޖެނުއަރީ މަހު ރޫޑިގާ ދިން .އިންޓަވިއުއެއްގައި ބުނެފައިވެ އެވެ.
ޗެލްސީ ދޫކޮށް މި ސީޒަނުގައި ރެއާލް މެޑްރިޑަށް ބަދަލުވި ރޫޑިގާ ވަނީ މީގެ ކުރިން ލަންޑަންގައި އެހީ އަށް ބޭނުންވާ ކުދިންނަށްޓަކައި އެކި ޕްރޮގްރާމްތަކެއްގައި ބައިވެރިވެފަ އެވެ. އަދި ސިއެރަ ލިއޯންގެ ކުދިންނަށް ރޫޑިގާގެ ފައުންޑޭޝަންގެ ފަރާތުން ގަވާއިދުން އެކި ފަހަރު މަތިން ހަދިޔާ ފޮނުވައި ހަދަ އެވެ.
އޮފް ސީޒަން ނުވަތަ، ސީޒަނުގެ ތެެރެއިން ލިބޭ ބައެއް ބްރޭކްތަކުގައި ރޫޑިގާ ވަނީ މީގެ ކުރިން ސިއެރަ ލިއޯނަށް ގޮސް، އެ ގައުމުގެ އެކި އުމުރުފުރާގެ މީހުންނާ އެކު ވަގުތު ހޭދަކޮށްފަ އެވެ.
